„რეგიონულ მაუწყებელთა ალიანსის“ დირექტორი, ნათია კუპრაშვილი ამბობს, რომ მასთან დროის სხვადასხვა მონაკვეთში, რამდენიმე ზარი განხორციელდა. კუპრაშვილის თქმით, უცნობმა პირებმა მას სახლის მისამართი დაუსახელეს და უთხრეს, რომ ბინასთან ელოდებოდნენ. ის აღნიშნულ ფაქტს საპროტესტო აქციებს უკავშირებს.
„დაასახელეს ჩემი მისამართი და მითხრეს, რომ მოვედი უკვე ბინასთან და ქვემოთ გელოდებითო. ცხადია [აქციას] უკავშირდება. მანამდე კიდევ სამი ზარი განხორციელდა. პირველი ზარი იყო უკრაინული ნომრიდან, შემდეგ უკვე დაახლოებით ათსაათიანი შუალედებით იყო ორი ზარი, გერმანიიდან.
მე ვფიქრობ, რომ ჩემი საჯარო განცხადებაც საკმარისი უნდა იყოს, რომ გამოძიება დაიწყონ. ამდენი ადამიანი საუბრობს ამაზე და მე ვფიქრობ, უკვე უნდა ჰქონდეთ გამოძიება დაწყებული და თვითონ უნდა მირეკავდნენ, მაგრამ ვაპირებ მე თვითონ დავუკავშირდე, შევიტან განცხადებას. როცა მისამართს გიცხადებენ და გეუბნებიან, რომ ქვემოთ გელოდებიან, ეს უკვე ჩვეულებრივი ზარი აღარ არის. პერსონალური ინფორმაციის გამოყენებით პირდაპირი მუქარაა“, – განაცხადა ნათია კუპრაშვილმა.
