თვე: აგვისტო 2024

ისრაელის მიმდინარე ოპერაციის ფარგლებში მოკლულია დაჯგუფება „ჰამასის“ ლიდერი ქალაქ ჯენინში, ვისამ ხაზემი და კიდევ ორი მებრძოლი. ინფორმაციას BBC ავრცელებს. „ისრაელის უსაფრთხოების ძალებმა მოკლეს ვისამ ხაზემი, შემდეგ კი საჰაერო დარტყმები განახორციელეს დანარჩენ ორზე, როცა ისინი გაქცევას ცდილობდნენ“-  ნათქვამია განცხადებაში. პალესტინის ადმინისტრაციის ჯანდაცვის სამინისტროში ამბობენ, რომ სამი მამაკაცი მოკლულია ქალაქ ზაბაბდეს მახლობლად, ჯენინის სამხრეთ-აღმოსავლეთით. დაჯგუფება „ჰამასმა“ ასევე დაადასტურა მათი გარდაცვალება.

აშშ-ის რესპუბლიკური პარტიის პრეზიდენტობის კანდიდატი დონალდ ტრამპი აცხადებს, რომ 5 ნოემბრის არჩევნებში გამარჯვების შემთხვევაში „საზღვარგარეთ მიმდინარე ომებს“ დაასრულებს. ამის შესახებ დონალდ ტრამპმა პენსილვანიაში სიტყვით გამოსვლისას ისაუბრა. პრეზიდენტობის კანდიდატმა ასევე პირობა დადო, რომ თეთრ სახლში დაბრუნების შემთხვევაში ქვეყნის მთავრობაში კორუფციას დაამარცხებს. „ერთად ვიბრძვით ჩვენი საზღვრების უსაფრთხოებისთვის, საზღვარგარეთ დავასრულებთ დაუსრულებელ ომებს. ჩვენ ვაერთიანებთ ძალისხმევას, რათა დავამარცხოთ კორუფცია მთავრობაში, აღვადგინოთ სიტყვის თავისუფლება“, – განაცხადა ტრამპმა. აშშ-ის ყოფილმა პრეზიდენტმა თქვა, რომ ქვეყნის მოქმედი პრეზიდენტი ჯო ბაიდენი და ვიცე- პრეზიდენტი კამალა ჰარისი დემოკრატიისთვის საფრთხეს წარმოადგენენ.  

 ბელგოროდის ოლქის გუბერნატორის, ვიაჩესლავ გლადკოვის ინფორმაციიტ, უკრაინის მიერ ქალაქ ბელგოროდსა და ბელგოროდის ოლქზე განხორციელებული თავდასხმების შედეგად, სულ მცირე, ხუთი ადამიანი დაიღუპა და 37 მშვიდობიანი მოქალაქე დაშავდა, მათ შორის ექვსი ბავშვია. მისივე განცხადებით, შვიდი მოზრდილი და სამი ბავშვი მძიმე მდგომარეობაში იმყოფება. მისი თქმით, რამდენიმე საჰაერო სამიზნე ქალაქთან მიახლოებისას ჩამოაგდეს. ბელგოროდში დაზიანდა მრავალსართულიანი სახლები, რამდენიმე სოციალური და კომერციული ობიექტი, ავტომობილები. უკრაინის სამხედროებს თავდასხმასთან დაკავშირებით კომენტარი არ გაუკეთებიათ.  

ნატო-ს გენერალურმა მდივანმა, იენს სტოლტენბერგმა გერმანულ მედიასთან საუბრისას განაცხადა, რომ უკრაინის შეჭრა რუსეთის კურსკის ოლქში კანონიერია და კიევის თავდაცვის უფლების ნაწილს წარმოადგენს. ინფორმაციას „როიტერი“ ავრცელებს. „უკრაინას აქვს თავდაცვის უფლება და საერთაშორისო სამართლის თანახმად, ეს უფლება საზღვარზე არ მთავრდება“ – აღნიშნა ნატო-ს გენერალურმა მდივანმა. სტოლტენბერგმა ასევე განაცხადა, რომ ნატო-ს ხელმძღვანელობას წინასწარ არ ჰქონდა ინფორმაცია უკრაინის გეგმების შესახებ და მათში არანაირი როლი არ უთამაშია. მანამდე ანალოგიური განცხადებები სხვა დასავლელმა პოლიტიკოსებმაც გააკეთეს.  

რუსების მიერ ხარკოვის დაბომბვის შედეგად დაშავებულთა რაოდენობა 97-მდე გაიზარდა. ინფორმაციას ხარკოვის საოლქო-სამხედრო ადმინისტრაციის ხელმძღვანელი, ოლეგ სინეგუბოვი ავრცელებს. „განახლებული ინფორმაციით, ხარკოვზე მტრის თავდასხმის შედეგად, 97 ადამიანი დაშავდა, მათგან 22 არასრულწლოვანია“, – წერს სინეგუბოვი „ტელეგრამის“ არხზე. შეგახსენებთ, რუსულმა ძალებმა ხარკოვი გუშინ, 30 აგვისტოს დაბომბეს, რის შედეგადაც, 7 ადამიანი დაიღუპა.

უკრაინის პრეზიდენტმა, ვოლოდიმირ ზელენსკიმ უკრაინის საჰაერო ძალების მეთაური ნიკოლაი ოლეშჩუკი თანამდებობიდან გაათავისუფლა. შესაბამისი ბრძანება პრეზიდენტის ვებგვერდზე გამოქვეყნდა. ზელენსკიმ ამ საკითხზე ვიდეომიმართვაც გამოაქვეყნა, სადაც ამბობს, რომ უკრაინის სამხედრო საჰაერო ძალები სამეთაურო დონეზე უნდა გაძლიერდეს. „გადავწყვიტე, შევცვალო უკრაინის შეიარაღებული ძალების საჰაერო ძალების მეთაური. უსაზღვროდ მადლიერი ვარ ჩვენი ყველა სამხედრო მფრინავის, ინჟინრის, მობილური საცეცხლე ჯგუფების მეომრების, საჰაერო თავდაცვის ეკიპაჟების. ყველასი, ვინც ნამდვილად იბრძვის უკრაინისთვის – შედეგისთვის. ეს საჭიროა ასევე სამეთაურო დონეზეც. ჩვენ უნდა გავძლიერდეთ და დავიცვათ ხალხი. დავიცვათ პირადი შემადგენლობა. დავიცვათ ჩვენი ყველა მეომარი“-  აღნიშნა ზელენსკიმ. უკრაინის პრეზიდენტის განკარგულებით, საჰაერო ძალების მეთაურის მოვალეობის შემსრულებლად…

ევროკავშირმა უარი განაცხადა კიევის თხოვნაზე, გაწვრთნას უკრაინელი სამხედროები უკრაინაში, თუმცა მათ უკრაინის ტერიტორიისგან მაქსიმალურად ახლოს მოამზადებს. როგორც ევროკავშირის უმაღლესმა წარმომადგენელმა, ჯოზეფ ბორელმა განაცხადა, ევროკავშირის ზოგიერთი წევრი სახელმწიფო ამის წინააღმდეგი იყო. „უკრიანაში მომზადება – რატომაც არა? ისინი (უკრაინელი სამხედროები) იქნებოდნენ უფრო ახლოს გარემოსთან, სადაც მათ ბრძოლა მოუწევდათ. ეს უფრო შესაბამისი იქნებოდა. ზოგიერთი წევრი სახელმწიფო იყო მზად, ზოგი წინააღმდეგი. საბოლოოდ, ჩვენ გადავწყვიტეთ, რომ წვრთნა მოხდება რაც შეიძლება ახლოს უკრაინასთან, თუმცა არა უკრაინის ტერიტორიაზე“ – განაცხადა განაცხადა ევროკავშირის უმაღლესმა წარმომადგენელმა. ბორელი აცხადებს, რომ  რუსეთის ფართომასშტაბური ინტერვენციის შემდეგ, ევროკავშირში მომზადება გაიარა 60 ათასამდე უკრაინელმა სამხედრომ…

უკრაინის შეიარაღებული ძალების მთავარსარდალი ალექსანდრ სირსკი აცხადებს, რომ ქვეყნის სამხედროები ბოლო დღე-ღამის განმავლობაში კურსკის ოლქში გარკვეულ მიმართულებებზე ორი კილომეტრით წინ წაიწიეს და ხუთი კვადრატული კილომეტრი დაიკავეს. ამის შესახებ სირსკიმ პრეზიდენტ ვოლოდიმირ ზელენსკის ხელმძღვანელობით გამართულ სამხედრო სარდლობის სხდომას ვიდეოკონფერენციის რეჟიმში აცნობა. „კურსკის მიმართულებით გრძელდება შეტევითი ოპერაცია. დღე-ღამეში ჩვენი ძალები ცალკეულ მიმართულებებზე ორ კილომეტრამდე წინ წაიწიეს, კონტროლი დაამყარეს ხუთი კვადრატული კილომეტრის ტერიტორიაზე“– განაცხადა სირსკიმ. უკრაინის შეიარაღებული ძალების ოპერაცია კურსკის ოლქში 6 აგვისტოს შემდეგ გრძელდება.  

რუსების მიერ ხარკოვის დაბომბვის შედეგად 5 ადამიანი გარდაიცვალა, 28 დაიჭრა. ინფორმაციას ხარკოვის მერი, იგორ ტერეხოვი და ხარკოვის საოლქო-სამხედრო ადმინისტრაციის ხელმძღვანელი, ოლეგ სინეგუბოვი ავრცელებენ. „ერთ-ერთი დარტყმა ქალაქის ცენტრალურ ნაწილზე, სამოქალაქო ინფრასტრუქტურაზე განხორციელდა. ზიანისა და დაზიანებულების შესახებ ინფორმაცია ზუსტდება“ – დაწერა ტერეხოვმა. ხარკოვის მერმა ინფორმაცია გაავრცელა, რომ ამ მომენტისთვის რუსების დაბომბვას 4 ადამიანის სიცოცხლე შეეწირა, მათ შორის ერთი ბავშვის, ხოლო 28 დაშავდა. მოგვიანებით გარდაცვლილთა რაოდენობა 5-მდე გაიზარდა.  

„ყველაზე მნიშვნელოვანია უკრაინის მხარდაჭერის თემა, გერმანია არის და იქნება ქვეყნის ყველაზე დიდი მატერიალური მხარდამჭერი“– ამის შესახებ გერმანიის თავდაცვის სამინისტროს საპარლამენტო მდივანმა, ტომას ჰიჩლერმა ბრიუსელში, ევროკავშირის თავდაცვის მინისტრების არაფორმალური შეხვედრის დაწყებამდე განაცხადა. მისივე ინფორმაციით, ევროკავშირში 60 000 უკრაინელი ჯარისკაცის გაწვრთნასთან დაკავშირებით მიზანი მიღწეული იქნება. „ყველაზე მნიშვნელოვანი და ვრცელი არის უკრაინის მხარდაჭერის თემა. გერმანია არის და იქნება უკრაინის ყველაზე დიდი მატერიალური მხარდამჭერი და დღეს კიდევ ერთხელ მკაფიოდ ვაცხადებ, რომ უკრაინელ ხალხს შეუძლია, კვლავ ჰქონდეს გერმანიის იმედი. იგივე ეხება წვრთნის სფეროს. ხვალიდან ჩვენ მივაღწევთ მიზანს ევროკავშირში 60 000 უკრაინელი ჯარისკაცის გაწვრთნასთან დაკავშირებით. ამაში თავისი წვლილი…

1-ელი იანვრიდან უკრაინის ტერიტორიაზე „დრუჟბას“ ნავთობსადენით რუსული ნავთობის ტრანზიტი შეწყდება. ამის შესახებ უკრაინის პრეზიდენტის ოფისის ხელმძღვანელის მრჩეველმა, მიხაილო პოდოლიაკმა განაცხადა. „გარდა გაზისა, 2025 წლის 1-ელი იანვრიდან მუშაობას „დრუჟბას“ ნავთობსადენიც შეწყვეტს“ – განაცხადა მან. პოდოლიაკის თქმით, ევროპის ზოგიერთი ქვეყანა – სლოვაკეთი, ჩეხეთი და უნგრეთი -რუსულ ნავთობს ამ ნავთობსადენით ღებულობს, მაგრამ ევროკავშირის რეზოლუციის თანახმად, ამ ქვეყნებმა ნავთობის მიწოდების დივერსიფიკაცია უნდა მოახდინო და უკრაინის გავლით ტრანზიტი უნდა შეწყვიტონ. პოდოლიაკის განმარტებით, ეს ეხება გაზსაც და 2025 წლის 1-ელი იანვრიდან ტრანზიტი შეწყდება.