დღე: აგვისტო 17, 2024

ლიეტუვის საგარეო საქმეთა მინისტრმა, გაბრიელიუს ლანდსბერგისმა ევროკომისრის თანამდებობაზე საკუთარი კანდიდატურის წარდგენაზე უარი თქვა. ამის შესახებ მან სოციალურ ქსელ X-ში დაწერა. „ჩემთვის დიდი პატივი იქნებოდა, მემსახურა ლიეტუვის ევროკომისრად, თუმცა მე გავაგრძელებ ჩემი ქვეყნის სამსახურში ყოფნას, უკრაინის დახმარებას და ევროპის მომავლისთვის ბრძოლას სხვა გზებით“ – დაწერა ლანსბერგისმა. როგორც „პოლიტიკო“  ლანდსბერგისის ეს განცხადება მასსა და ლიეტუვის პრეზიდენტ გიტანას ნაუსედას შორის განხეთქილების ფონზე გაკეთდა. ნაუსედამ უარი განაცხადა ლანდსბერგისის კანდიდატურის მხარდაჭერაზე იმის მიუხედავად, რომ მინისტრს სხვა წამყვანი პოლიტიკოსები უჭერდნენ მხარს.  

“ცნობები იმის შესახებ, თითქოს გერმანია უკრაინისთვის სამხედრო დახმარებას წყვეტს, არაკორექტულია და მანიპულაციას წარმოადგენს”- განაცხადა უკრაინის საგარეო საქმეთა სამინისტროს პრესსპიკერმა, გეორგი ტიხიმ გამოცემა “უკრინფორმთან” საუბარში. „ცნობები იმის შესახებ, თითქოს გერმანია უკრაინისთვის სამხედრო დახმარებას წყვეტს, არაკორექტულია. ეს ისეთივე მანიპულაციაა, როგორც წინა ცნობები მომდევნო წელს დახმარების ორჯერ შემცირების შესახებ” – განაცხადა ტიხიმ. მან აღნიშნა, რომ გერმანიაში ნამდვილად გრძელდება საბიუჯეტო პროცესი, „რომელსაც ყურადღებით ვაკვირდებით.” მისივე ინფორმაციით, მოსალოდნელია, რომ ბიუჯეტი ნოემბერში იქნება დამტკიცებული, და მხოლოდ მაშინ იქნება მომდენო წელს უკრაინის დახმარების დონე.    

გერმანია უკრაინისთვის ახალი სამხედრო დახმარების მიწოდებას შეაჩერებს. ინფორმაციას Politico გერმანულ გამოცემა FAZ-ზე დაყრდნობით ავრცელებს. Politico-ს ცნობით, აკრძალვა, რომელიც გერმანიის მმართველი კოალიციის ხარჯების შემცირების გეგმის ნაწილს წარმოადგენს, უკვე ძალაშია. გერმანიის ფინანსთა მინისტრმა, კრისტიან ლინდნერმა უკრაინისთვის ახალი სამხედრო დახმარების დაფინანსების შეჩერების შესახებ თავდაცვის მინისტრს, ბორის პისტორიუსს თხოვნით 5 აგვისტოს მიმართა.

„უკრაინულმა ძალებმა კურსკის ოლქში პოზიციები გაიმყარეს“- ამის შესახებ უკრაინის შეიარაღებული ძალების მთავარსარდალმა, ალექსანდრ სირსკიმ  პრეზიდენტ, ვოლოდიმირ ზელენსკის განუცხადა. სირსკიზე დაყრდნობით, ზელენსკი აცხადებს, რომ “უკრაინელმა ჯარისკაცებმა კურსკის ოლქში პოზიციები გაიმყარეს და სტაბილიზებული ტერიტორია გააფართოვეს“. „მადლობა ყველა ჯარისკაცსა და მეთაურს, რომლებსაც რუსი სამხედროები ტყვეებად აჰყავთ და ამით ჩვენი ჯარისკაცებისა და სამოქალაქო პირების, რომლებიც რუსეთის ტყვეობაში იმყოფებიან, გათავისუფლებას აახლოებენ“ – აღნიშნა უკრაინის პრეზიდენტმა.

ბელარუსის პრეზიდენტმა, ალექსანდრ ლუკაშენკომ საპროტესტო ქმედებებში მონაწილეობისთვის მსჯავრდებული 30 ადამიანი შეიწყალა. ამის შესახებ ინფორმაციას ბელარუსის პრეზიდენტის ადმინისტრაცია ავრცელებს. შეწყალებულებს შორის 14 ქალი და 16 კაცია. მათგან ზოგიერთს ჯანმრთელობის პრობლემები აქვს, არის რამდენიმე პენსიონერი. როგორც ბელარუსის პრეზიდენტის პრესსამსახური აცხადებს, ყველა მათგანმა დანაშაული აღიარა და ვალდებულება აიღო, კანონმორჩილი ცხოვრების წესით იცხოვროს. შეწყალებას გამოეხმაურა ოპოზიციის ლიდერი სვეტლანა ციხანოვსკაია. მისი თქმით, ბრძოლა არ შეწყდება, ვიდრე ბელარუსში ყველა პოლიტპატიმარი არ გათავისუფლდება.

რუსეთის ძალებმა უკრაინის ქალაქ სუმიში, საცხოვრებელ რაიონზე სარაკეტო დარტყმა განახორციელეს, დაშავებულია ორი ადამიანი. ინფორმაციას სუმის ოლქის პროკურატურა ავრცელებს.  სუმიზე სარაკეტო იერიში დაახლოებით დილის ექვს საათზე მიიტანეს. „ისკანდერის“ ტიპის რაკეტა ავტოსადგომზე ჩამოვარდა. აფეთქების შედეგად დაზიანდა სავაჭრო ცენტრის შენობა, ხუთი საცხოვრებელი კორპუსი და 15-ზე მეტი ავტომობილი.

„შეთანხმების ან რეალური მოლაპარაკებების ზღვარზე არ ვართ“-  ამის შესახებ „ჰამასის“ უფროსმა სპიკერმა, სამუ აბუ ზუჰრიმ განაცხადა. მისივე განმარტებით, ოპტიმიზმი იმასთან დაკავშირებით, რომ ცეცხლის შეწყვეტის შესახებ შეთანხმების მიღწევა მალე მოხდება, „ილუზიას“ წარმოადგენს. „ჩვენ შეთანხმების ან რეალური მოლაპარაკებების ზღვარზე არ ვართ, არამედ ამერიკული ბრძანების დაწესების“ – განაცხადა სამუ აბუ ზუჰრიმ.      

ნიგერიაში, შეიარაღებულმა პირებმა, სულ მცირე, 20 სტუდენტი გაიტაცეს. ინფორმაციას ნიგერიის პოლიცია ავრცელებს. პოლიციის ცნობით, შემთხვევა ბენუეს შტატში მოხდა, როდესაც სტუდენტები ქვეყნის სამხრეთში, კონფერენციაზე დასასწრებად მიემგზავრებოდნენ. ჯერჯერობით უცნობია, თუ რომელმა დაჯგუფებამ გაიტაცა სტუდენტები.

„ჩვენ ვხედავთ, რომ ოკუპანტი დიდ ზარალს განიცდის და ეს ძალიან სასარგებლოა ჩვენი თავდაცვისთვის“- ამის შესახებ უკრაინის პრეზიდენტმა ვოლოდიმირ ზელენსკიმ ფრონტზე არსებული მდგომარეობის შეფასებისას განაცხადა. ზელენსკიმ კიდევ ერთხელ დიდი მადლობა გადაუხადა უკრაინისთვის მებრძოლებს გამძლეობისა და თავდადებისთვის.  „ჩვენ ვხედავთ, რომ ოკუპანტი დიდ ზარალს განიცდის და ეს ძალიან სასარგებლოა ჩვენი თავდაცვისთვის: საუბარია რუსული არმიის ლოგისტიკის განადგურებაზე და მათი რეზერვების ამოწურვაზე. ჩვენ ყველა რუსეთის პოზიციას მაქსიმალური ზიანი უნდა მივაყენოთ და ამას ვაკეთებთ. მადლობას ვუხდი თითოეულ ჩვენს მეომარს სიზუსტისთვის, სიძლიერისთვის და გამძლეობისთვის. მთავარსარდალმა სირსკიმ მოახსენა ჩვენი თავდაცვითი ნაბიჯების შესახებ დონბასში. პოკროვსკის და ტორეცკის მიმართულებები. ისევე…

უკრაინამ კურსკის ოლქში მდებარე ხიდი დასავლური რაკეტებით დაბომბა.  ამის შესახებ რუსეთის საგარეო საქმეთა სამინისტროს პრესსპიკერმა, მარია ზახაროვამ განაცხადა. „პირველად, კურსკის ოლქს ცეცხლი დასავლური წარმოების სარაკეტო გამშვები დანადგარების, სავარაუდოდ, ამერიკული HIMARS-ებით გაუხსნეს“ – განაცხადა ზახაროვამ. ზახაროვა ამბობს, რომ სარაკეტო დარტყმის შედეგად, მოხალისეები დაიღუპნენ, რომლებიც მშვიდობიანი მოსახლეობის ევაკუაციას ცდილობდნენ.

ტელეგრამ არხები ავრცელებენ კადრებს სუჯადან, სადაც ჩანს, რომ ქალაქში რომელსაც რამდენიმე დღეა უკრაინელი სამხედროები აკონტროლებენ მხოლოდ კვარცხლბეკია დარჩენილი. ძეგლის გარეშე დარჩენილი კვარცხლბეკის ფოტო სოციალურ ქსელში თავდაპირველად  უკრაინის პრეზიდენტის ოფისის ხელმძღვანელის მრჩეველმა დარია ზარივ – ნაიამ გამოაქვეყნა.

პატიმრობაში მყოფი ოპოზიციონერის, ჯან ატალაის საკითხის განხილვა თურქეთის პარლამენტში ფიზიკურ დაპირისპირება მოჰყვა. მემარცხენე „თურქეთის მუშათა პარტიის“ წევრმა, აჰმეტ სიკმა პატიმრობაში მყოფი თანაპარტიელი ჯან ატალაი თურქეთის მმართველი „სამართლიანობის და განვითარების პარტიის“ წევრების თავდასხმებისგან დაიცვა და მისი პატიმრობიდან გათავისუფლება მოითხოვა. „არ არის გასაკვირი, რომ ატალაის ტერორისტს ეძახით. ყველა მოქალაქემ უნდა იცოდეს, რომ ამ ქვეყნის ყველაზე დიდი ტერორისტები იმ სკამებზე მსხდომნი არიან“, – განაცხადა აჰმაეტ სიკმა და მმართველი პარტიის წევრებისკენ მიუთითა. ოპოზიციონერი დეპუტატის განცხადებას თურქეთის მმართველი პარტიის დეპუტატების აგრესიული გამოხმაურება მოჰყვა, რის შემდეგაც აჰმეტ სიკს რამდენჯერმე დაარტყეს მუშტი. ჩხუბის დროს, სულ მცირე, ორი…

სამხრეთ ლიბანზე ისრაელის დარტყმის შედეგად დაიღუპა ცხრა და დაშავდა ხუთი ადამიანი. ლიბანური მედიის ცნობით, დარტყმა ქალაქ ნაბათიაში საცხოვრებელ შენობაზე განხორციელდა. ისრაელის თავდაცვის ძალებში აცხადებენ, რომ სამიზნე დაჯგუფება „ჰეზბოლას“ იარაღის საწყობი იყო. ამასთან, ისრაელის არმიის ცნობით, დარტყმები განხორციელდა სამხრეთ ლიბანის ორ სოფელში მდებარე შენობებზე, რომლებსაც „ჰეზბოლა“ იყენებდა.

“ომი ბრუნდება სახლში” – ასე ეხმაურება ლატვიის თავდაცვის მინისტრი, ანდრის სპრუდსი კურსკის ოლქში უკრაინული ჯარის შესვლას. სპრუდსი ამბობს, რომ უკრაინას რუსეთის ტერიტორიაზე აბსოლუტური დარტყმის უფლება აქვს. მისი აზრით, ომის რუსეთის ტერიტორიაზე, ძალიან მნიშვნელოვანი სიგნალია იმისა, რომ რუსეთი ამ ომს ვერ მოიგებს. “ადრე თუ გვიან, მოკავშირეების მხარდაჭერით, რა თქმა უნდა, უკრაინა მოიგებს ამ ომს და მე აბსოლუტურად დარწმუნებული ვარ ამაში” – თქვა სპრუდსმა.

პუტინი ხვალ აზერბაიჯანში ჩადის. რუსეთის პრეზიდენტს მოლაპარაკებები ილჰამ ალიევთან ექნება. კრემლის პრესსამსახურის ცნობით, სახელმწიფოს მეთაურები განიხილავენ მოსკოვსა და ბაქოს შორის დიპლომატიური ურთიერთობების სამომავლო განვითარებას, სტრატეგიულ პარტნიორობასა და ყველაზე აქტუალურ საერთაშორისო და რეგიონულ პრობლემებს. ასევე ვიზიტისას ხელი მოეწერება სამთავრობო შეთანხმებებს. რუსი დიქტატორის ოფიციალური ვიზიტი აზერბაიჯანში ორდღიანია.

ჯო ბაიდენის განცხადებით, ღაზაში ცეცხლის შეწყვეტის შეთანხმების მიღწევის შესახებ ოპტიმისტურად არის განწყობილი. „მე ოპტიმისტურად ვარ განწყობილი. დასრულებამდე ჯერ შორს არის. კიდევ რამდენიმე საკითხია. ვფიქრობ, ჩვენ შანსი გვაქვს“ – განუცხადა აშშ-ის პრეზიდენტმა ჟურნალისტებს. ცნობისთვის, აშშ-ის სახელმწიფო მდივანი, ენტონი ბლინკენი დღეს ისრაელში გაემგზავრება. ენტონი ბლინკენი ისრაელს ეწვევა