,,აზერბაიჯანს არ სურს, რომ საფრანგეთი მონაწილეობას იღებდეს სომხეთთან სამშვიდობო მოლაპარაკებებში და 7 დეკემბერს, ბრიუსელში საფრანგეთის პრეზიდენტ ემანუელ მაკრონთან და ევროკავშირის საბჭოს პრეზიდენტ შარლ მიშელთან დაგეგმილ ოთხმხრივ შეხვედრას ვაუქმებ” – ამის შესახებ აზერბაიჯანის პრეზიდენტმა ილჰამ ალიევმა ბაქოში გამართულ კონფერენციაზე განაცხადა.
ალიევის განცხადებით, მაკრონი “თავს დაესხა” და “შეურაცხყოფა მიაყენა” ბაქოს და შუამავლის როლში არ უნდა გამოდიოდეს. ალიევის აზრით, სომხეთის პრემიერ-მინისტრი ნიკოლ ფაშინიანი მოლაპარაკებების შემდეგი ეტაპის ჩაშლას ცდილობს, როდესაც მოითხოვს საფრანგეთის შუამავლობას.
“მაკრონი… თავს დაესხა აზერბაიჯანს და დაგვაბრალა ის, რაც არ გაგვიკეთებია. ნათელია, რომ ასეთ გარემოებებში, ასეთი დამოკიდებულებით საფრანგეთს არ შეუძლია იყოს აზერბაიჯანსა და სომხეთს შორის მშვიდობიანი პროცესის ნაწილი”, – განაცხადა აზერბაიჯანის პრეზიდენტმა.
ცნობისთვის, სექტემბრის ბოლოს აზერბაიჯანსა და სომხეთს შორის ცეცხლის შეწყვეტის შეთანხმება იქნა მიღწეული, ხოლო წინა თვეს პრაღაში ორი ქვეყანა საზრვარზე ევროკავშირის სამოქალაქო მისიის განთავსებაზე შეთანხმდა.
