დღე: აგვისტო 24, 2024

რუსეთმა და უკრაინამ 115-115 სამხედრო ტყვე გაცვალეს. ტყვეთა გაცვლა არაბთა გაერთიანებული საამიროების შუამავლობით მოხდა რუსეთის თავდაცვის სამინისტროში აცხადებენ, რომ გაცვლილი რუსი სამხედროები კურსკის რაიონში იყვნენ ტყვედ აყვანილები. მათივე თქმით, ახლა ყველა გათავისუფლებული ჯარისკაცი ბელარუსში იმყოფება. პარალელურად, უკრაინის პრეზიდენტმა, ვოლოდიმირ ზელენსკიმ გამოაქვეყნა ფოტო, რომელზეც დაბრუნებული უკრაინელი სამხედრო ტყვეები არიან ასახული. უკრაინის პრეზიდენტის განცხადებით, დაბრუნებულები მესაზღვრეები, ეროვნული გვარდიის, საზღვაო ძალებისა და შეიარაღებული ძალების სამხედროები არიან. არაბთა გაერთიანებული საამიროების საგარეო საქმეთა სამინისტრომ აღნიშნა, რომ მათი შუამავლობით გაცვლილი ტყვეების საერთო რაოდენობა ახლა 1788-ს შეადგენს.  

აშშ-ის ვიცე-პრეზიდენტი და დემოკრატების საპრეზიდენტო კანდიდატი  კამალა ჰარისი უკრაინას დამოუკიდებლობის დღეს ულოცავს. მისი განცხადებით, აშშ გააგრძელებს ომში მყოფი ქვეყნის მხარდაჭერას თავისუფლებისთვის ბრძოლაში. “უკრაინის დამოუკიდებლობის დღეს ჩვენ ვუერთდებით იმ საერთო ღირებულებების აღნიშვნას, რომლებსაც უკრაინელი ხალხი გაბედულად იცავს ყოველ დღე: დამოუკიდებლობა, სუვერენიტეტი და თავისუფლება. ჩვენ გავაგრძელებთ უკრაინის გვერდით დგომას რუსეთის აგრესიის წინააღმდეგ თავისუფლებისთვის ბრძოლაში.” – წერს კამალა ჰარისი.

ლიეტუვა უკრაინისთვის 5 ათასზე მეტი დრონის გადაცემას გეგმავს. ამის შესახებ ლიეტუვის პრემიერ-მინისტრმა, ინგრიდა შიმონიტემ კიევში გამართულ პრესკონფერენციაზე განაცხადა. პრემიერი ამბობს, რომ ომში ლიეტუვის პოზიცია გასაგები და მარტივია. „ასევე, ვიმედოვნებთ, რომ შემოდგომის ბოლოსთვის ლიეტუვური წარმოების 5 ათასზე მეტი დრონის გადაცემას შევძლებთ“, – აღნიშნა ლიეტუვის პრემიერ-მინისტრმა.

„მხოლოდ რუსეთია დამნაშავე იმაში, რაც მის ტერიტორიაზე ხდება“ – ამის შესახებ ლიეტუვის პრემიერ-მინისტრმა ინგრიდა შიმონიტემ უკრაინისა და პოლონეთის პრეზიდენტებთან გამართულ ერთობლივ პრესკონფერენციაზე განაცხადა. „რუსეთმა დაიწყო ეს ომი. უკრაინა თავს იცავს. ხანდახან მაკვირვებს, რომ ხალხი ფიქრობს რაკი უკრაინა რუსეთის შეჭრის მსხვერპლი გახდა, მაშინ ომი მხოლოდ უკრაინის ტერიტორიაზე შეიძლება გრძელდებოდეს. ეს ასე არ უნდა გამოიყურებოდეს, ვინაიდან უბრალოდ არასამართლიანია. ამიტომ, რა თქმა უნდა, რუსებს აკისრიათ რისკები და პასუხისმგებლობა იმაზე, თუ რა შეიძლება მოხდეს მათ ტერიტორიაზე” – განაცხადა შიმონიტემ.    

ევროკომისიის პრეზიდენტი ურსულა ფონ დერ ლაიენი და ევროპარლამენტის პრეზიდენტი რობერტა მეცოლა უკრაინას დამოუკიდებლობის დღეს ულოცავენ. როგორც რობერტა მეცოლა წერს, ევროპა ყოველთვის უკრაინის გვერდით იქნება.  „ევროპა ყოველთვის უკრაინის გვერდით იქნება, რადგან უკრაინა ევროპაა. თქვენი თავისუფლება ჩვენი თავისუფლებაა. თქვენი უსაფრთხოება ჩვენი უსაფრთხოებაა. თქვენს გვერდით პირველივე დღიდან ვდგავართ და ამას გავაგრძელებთ იმდენ ხანს, რამდენიც საჭირო იქნება. ჩვენს მეგობრებს საამაყო დამოუკიდებლობის დღეს ვულოცავ“, – განაცხადა ევროკომისიის პრეზიდენტმა, ურსულა ფონ დერ ლაიენმა. „დამოუკიდებლობის გულში თავისუფლება დევს. ღირებულებები, რომელთათვის მამაცი უკრაინელები ყოველდღე იბრძვიან. მშვიდობაში, დემოკრატიაში ცხოვრების თავისუფლება. დღეს, როდესაც საერთო ევროპული მომავლისკენ ჩვენს გზას განვამტკიცებთ, დამოუკიდებლობის…

ირანი უკრაინას დამოუკიდებლობის დღეს ულოცავს. ამის შესახებ ირანის საგარეო საქმეთა სამინისტრო სოციალურ ქსელში წერს. „ირანის ისლამური რესპუბლიკა უკრაინის მთავრობასა და ხალხს დამოუკიდებლობის დღეს ულოცავს“- წერს ირანის საგარეო უწყება X-ზე. დღეს უკრაინა დამოუკიდებლობის 33-ე წლისთავს აღნიშნავს.

ბელორუსის პრეზიდენტი ალექსანდრ ლუკაშენკო უკრაინას დამოუკიდებლობის დღეს ულოცავს. ლულაშენკო ამბობს, რომ ბელორუსში უკრაინელებს “პატივისცემითა და სითბოთი” ეპყრობიან. „ბელორუსის მიწაზე უკრაინის გულთბილ და შრომისმოყვარე მოსახლეობას ყოველთვის განსაკუთრებული პატივისცემითა და სითბოთი ეპყრობოდნენ ჩვენი ერები ერთად იზიარებდნენ სიხარულსა და მწუხარებას, თავშესაფარს და პურს, ერთად გადალახეს უბედურება. ვამაყობდით მათი წარმატებებით, ჩვენ გვაერთიანებს არა მხოლოდ საერთო ბედი და ოჯახური კავშირები, არამედ მეგობრობისა და მეზობლებთან ურთიერთობის სურვილი” – განაცხადა ლუკაშენკომ.

ზოლინგენში მომხდარ თავდასხმასთან დაკავშირებით 15 წლის მოზარდი დააკავეს. ამის შესახებ დიუსელდორფის პოლიციის უფროსმა და პროკურორმა პრესკონფერენციაზე განაცხადეს. პროკურორის განცხადებით, თავდასხმის მოტივი ჯერჯერობით უცნობია, მაგრამ ტერორიზმი არ გამორიცხა. ფესტივალზე დანით შეიარაღებული ადამიანმა თავდასხმის შედეგად, ორი მამაკაცი და ერთი ქალი დაიღუპა, ხოლო რვა ადამიანი დაშავდა, მათგან ოთხის მდგომარეობა მძიმეა.

“დარწმუნებული ვარ, ომი მალე თავისუფლების გამარჯვებით დასრულდება” – ამის შესახებ პოლონეთის პრეზიდენტმა, ანჯეი დუდამ კიევში, უკრაინის დამოუკიდებლობის დღესთან დაკავშირებულ ღონისძიებაზე სიტყვით გამოსვლისას განაცხადა. პოლონეთის პრეზიდენტი ამბობს, რომ უკრაინის დამოუკიდებლობის დღე გარკვეულწილად არის მთელი ევროპის დამოუკიდებლობის დღე. „ეჭვი არ მეპარებოდა და არც ახლა მეპარება, რომ გაერთიანებული და მამაცი უკრაინელი ხალხი თავისი ბრძოლისუნარიანობით დაიცავს დამოუკიდებლობას. მიუხედავად იმისა, რომ დღეს უკრაინა ებრძვის რუსეთის აგრესიას, იბრძვის არა სიცოცხლისთვის, არამედ დამოუკიდებლობისთვის. დარწმუნებული ვარ, ეს ომი თავისუფლების ძალების გამარჯვებით დასრულდება და ომის სიბნელიდან, ნანგრევებიდან და გადამწვარი ტერიტორიებიდან დაიწყება ახალი სამყაროს შენება“, – განაცხადა დუდამ. დუდამ კიდევ ერთხელ…

უკრაინამ რუსეთის ტყვეობიდან კიდევ 115 უკრაინელი სამხედრო დაიბრუნა. ამის შესახებ უკრაინის პრეზიდენტი, ვოლოდიმირ ზელენსკი სოციალურ ქსელში წერს. „კიდევ 115 ჩვენი დამცველი დღეს სახლში დაბრუნდა. ეროვნული გვარდიის, შეიარაღებული ძალების, საზღვაო ძალებისა და სახელმწიფო სასაზღვრო სამსახურის ჯარისკაცები“ – წერს უკრაინის პრეზიდენტი.

რუსეთმა ვორონეჟის რეგიონის ნაწილში საგანგებო მდგომარეობა გამოაცხადა. ინფორმაციას ამის შესახებ რეგიონის გუბერნატორი, ალექსანდრ გუსევი ავრცელებს. გუსევი ამბობს, რომ გადაწყვეტილება მას შემდეგ მიიღეს, რაც რეგიონში უკრაინიდან გამოშვებული ხუთი უპილოტო საფრენი აპარატი გაანადგურეს. როგორც რეგიონის გუბერნატორი აცხადებს, ჩამოვარდნილი დრონის ნამსხვრევების გამო ხანძარი გაჩნდა. ინციდენტის შედეგად შენობები არ დაზიანებულა, თუმცა, უსაფრთხოების მიზნით, ოსტროგოჟსკის რაიონის სამი დასახლებიდან 200 ადამიანია ევაკუირებული.

უკრაინის პრეზიდენტმა, ვოლოდიმირ ზელენსკიმ ქვეყანაში რუსეთთან დაკავშირებული რელიგიური ორგანიზაციების აკრძალვის შესახებ კანონს ხელი მოაწერა. ინფორმაცია ამის შესახებ რადას ვებგვერდზეა გამოქვეყნებული. კანონის მიზანია უკრაინაში აიკრძალოს რუსეთის მართლმადიდებლური ეკლესიისა და მასთან დაკავშირებული რელიგიური ორგანიზაციების საქმიანობა, აიკრძალოს „რუსული სამყაროს“ იდეოლოგიის პროპაგანდა. ამასთან, უკრაინის პრეზიდენტმა ხელი მოაწერა რადას მიერ მხარდაჭერილ კანონს სისხლის სამართლის საერთაშორისო სასამართლოს რომის სტატუტის რატიფიცირების შესახებ. რომის სტატუტის რატიფიცირების შესახებ კანონპროექტების პაკეტი ზელენსკიმ რადას 15 აგვისტოს წარუდგინა, რაც ნიშნავს უკრაინის სისხლის სამართლის საერთაშორისო სასამართლოში სრულ გაწევრიანებას.