მჯერა, რომ ჩვენი ამ მშვიდობიანი პოლიტიკით, სწორი და ეროვნული პოლიტიკით, ჩვენს ქვეყანას გავიყვანთ მშვიდობის და გაერთიანების გზაზე – ამის შესახებ საქართველოს პრემიერ-მინისტრმა ირაკლი ღარიბაშვილმა, ქართული დიასპორის დღისადმი მიძღვნილ ფორუმზე სიტყვით გამოსვლისას განაცხადა.
მისი თქმით, ფრენები არის ეკონომიკური და სავაჭრო ურთიერთობების შემადგენელი ნაწილი და ამას არავითარი შემხებლობა არ აქვს არც პოლიტიკასთან.
„ ფრენები არის შემადგენელი სავაჭრო-ეკონომიკური ურთიერთობების, ამას არავითარი შემხებლობა არ აქვს არც პოლიტიკასთან, არც საერთოდ არაფერთან და ვთქვით, რომ რა თქმა უნდა, ჩვენს ერთ მილიონ დიასპორას და მათ ნათესავებს, ოჯახის წევრებს, სჭირდებათ თავისუფალი გადაადგილება, უვიზო რეჟიმი. მოლდოვას დღეს აქვს უვიზო რეჟიმი. უკრაინას, მე მგონი აქვს დღესაც უვიზო რეჟიმი. ყოველ შემთხვევაში ქონდა ომამდე, თუ არ ვცდები. ამიტომ აქ არაფერი არ არის განსაკუთრებული. პირიქით, ყველაფერი რაც გაუიოლებს ჩვენს თანამოქალაქეებს, ჩვენს დიასპორას მოძრაობას, გადაადგილებას და ბიზნესს რა თქმა უნდა არის ძალიან კარგი. და კიდევ ერთი მინდა ვთქვა, ესე იგი ყოველ დღე ათასობით მანქანა გადადის და კვეთს საზღვარს, ლარსის გამშვებ პუნქტს. მათ შორის სამგზავრო, მათ შორის სატვირთო, ათასობით მანქანა და რა განსხვავებაა ვერ გავიგე, მაშინ დავკეტოთ ესეც. მეორე ეტაპი იქნება და დაკეტეთ მაშინ საზღვრები. გააჩერეთ ვაჭრობა. ჩვენ ყოველწლიურად ასეულობით მილიონ დოლარს ვიღებთ გადმორიცხვებით ჩვენი დიასპორისგან, მილიარდებზეა საუბარი უკვე. რუსეთში მცხოვრები ჩვენი დიასპორიდან ასეულობით მილიონი დოლარი შემოდის, ინახავენ ოჯახის წევრებს, ავითარებენ ბიზნესს, ნათესავებს, რატომ უნდა ჩავკეტოთ ეს, რა ხდება, რატომ? ეს არის ჩვენი ვალდებულება, რომ პირიქით დავეხმაროთ ჩვენს ხალხს ყველგან, ქვეყნის შიგნით თუ ქვეყნის გარეთ,“- განაცხადა პრემიერმა.
