რუსეთის პრეზიდენტმა, გაეროს გენერალურ მდივანს კრემლში, ცნობილ „გრძელ მაგიდასთან“ თავად უმასპინძლა. როგორც პუტინმა ანტონიო გუტერეშს უთხრა, ის შეცდომაშია შეყვანილი, უკრაინაში ჰუმანიტარული დერეფანი მუშაობს და მშვიდობიან მოსახლეობას არავინ ერჩის.
ეს განცხადება პუტინმა მას შემდეგ გააკეთა, რაც გუტერეშმა შეშფოთება გამოხატა უკრაინაში რუსეთის შეჭრისა და იქ არსებული კატასტროფული ვითარების გამო.
„ნუ იტყვით, რომ ჰუმანიტარული დერეფნები არ მუშაობს. თქვენ შეცდომაში შეგიყვანეს. ჰუმანიტარული დერეფნები მუშაობს. მარიუპოლიდან დაახლოებით 130-140 ათასი ადამიანი გამოვიდა და მათ შეუძლიათ, სადაც უნდათ, იქ წავიდნენ. ვისაც რუსეთში სურს – რუსეთში, ვისაც უკრაინაში სურს – უკრაინაში“ – აღნიშნა პუტინმა გაეროს გენერალურ მდივანთან შეხვედრაზე.
ანტონიო გუტერეშის თქმით, გაერო დიალოგის მომხრეა.
„ჩვენ არ ვართ მოლაპარაკებების ნაწილი, მაგრამ მხარს ვუჭერთ დიალოგს, ასევე მხარს ვუჭერთ თურქეთის კეთილ ნებას ამ მიდგომის გასავითარებლად, თუმცა ჩვენი მთავარი ამოცანა უკავშირდება ჰუმანიტარულ ვითარებას უკრაინაში. ჩვენ ღრმად ვართ შეშფოთებული იმის გამო, რაც ახლა ხდება და მიგვაჩნია, რომ მოხდა შეჭრა უკრაინის ტერიტორიაზე“ – აღნიშნა გუტერეშმა პუტინთან შეხვედრაზე.
