ირანში, მაჰსა ამინის ბიძას, რომელიც დემონსტრანტების მხარდასაჭერი განცხადებების გამო დააკავეს, 5-წლიანი პატიმრობა მიუსაჯეს. საფა აელს “საშინაო უსაფრთხოების წინააღმდეგ შეკრებების და შეთქმულების”, “სისტემის საწინააღმდეგო პროპაგანდის” და “ისლამური რესპუბლიკის ლიდერის შეურაცხყოფის” ბრალდებების საფუძველზე 5 წლითა და 4 თვით და 17 დღით მიესაჯა პატიმრობა.
აელი თავის სახლში 21 სექტემბერს, მაჰსა ამინის დაღუპვის პირველი წლისთავის წინ დააკავეს. Hengaw -ის ცნობით, მას სასტიკად ეპყრობოდნენ დაკავების 42 დღის განმავლობაში, სანამ წინასწარი პატიმრობიდან გირაოთი გაუშვებდნენ.
შეგახსენებთ, რომ 22 წლის მაჰსა ამინი 2022 წლის 16 სექტემბერს გარდაიცვალა მას შემდეგ, რაც “მორალის პოლიციამ” დააკავა ისლამური რესპუბლიკის სავალდებულო ჩაცმულობის კოდექსის სავარაუდო დარღვევისთვის. მის გარდაცვალებას მასშტაბური ანტისამთავრობო პროტესტი მოჰყვა, რომელსაც ხელისუფლება ხშირად ძალადობრივად შლიდა.
