დღე: სექტემბერი 1, 2024

უკრაინის შეიარაღებული ძალების მიერ ქალაქ ბელგოროდსა და ბელგოროდის ოლქის დასახლებებზე განხორციელებული თავდასხმის შედეგად დაშავებულია 11 ადამიანი, მათ შორის ორი ბავშვია. ამის შესახებ ოლქის გუბერნატორის, ვიაჩესლავ გლადკოვმა განაცხადა. მან ასევე აღნიშნა, რომ ბავშვების მდგომარეობა უკიდურესად მძიმეა. გლადკოვის ინფორმაციით, დაზიანდა 14 მრავალსართულიან სახლში მდებარე 22 ბინა, სადაც ფანჯრები ჩაიმსხვრა. გარდა ამისა, ნამსხვრევებით დაზიანდა 21 ავტომობილი. ასევე დაზიანდა რვა კერძო სახლი. რუსეთის ბელგოროდის ოლქი უკრაინის ხარკოვის ოლქს ესაზღვრება.      

დონალდ ტრამპმა განაცხადა, რომ მხარს დაუჭერს ფლორიდაში პირადი მოხმარებისთვის მარიხუანის ლეგალიზაციას. ამის შესახებ ინფორმაციას „ბიბისი“ ავრცელებს. რესპუბლიკელმა პრეზიდენტობის კანდიდატმა თავის სოციალურ ქსელ Truth Social-ზე დაწერა, რომ ნოემბერში დაგეგმილ კენჭისყრაზე ამომრჩევლები, დიდი ალბათობით, მარიხუანის ლეგალიზაციას მისცემენ ხმას და ამიტომ „ეს სწორად უნდა გაკეთდეს“. „ადამიანი არ უნდა იყოს კრიმინალი ფლორიდაში, როდესაც მარიხუანა ლეგალურია ამდენ სხვა შტატში. ჩვენ არ უნდა დავუნგრიოთ ადამიანს ცხოვრება და არაა საჭირო გადასახადების გადამხდელების ფულის ფუჭად ხარჯვა ზრდასრული ადამიანების დასაპატიმრებლად, რომლებსაც პირადი მოხმარებისთვის განკუთვნილი რაოდენობის მარიხუანა აქვთ“ – განაცხადა ტრამპმა. აშშ-ის ყოფილი პრეზიდენტის ეს პოზიცია ეწინააღმდეგება სხვა მაღალი რანგის რესპუბლიკელების მოსაზრებებს.…

უკრაინის პრეზიდენტი ვოლოდიმირ ზელენსკი რუსული მხარის მიერ ხარკოვზე განხორციელებულ თავდასხმას ეხმაურება და ამბობს, რომ „ტერორის“ შესაჩერებლად მსოფლიოს ყველა საჭირო ძალა უნდა იყოს მობილიზებული. „რუსეთი კვლავ ატერორებს ხარკოვს. დარტყმები განხორციელდა სამოქალაქო ინფრასტრუქტურაზე. ამ დროისთვის უკვე 30-ზე მეტია დაჭრილია. სამაშველო ოპერაციისთვის ყველა საჭირო ძალაა მობილიზებული და ამ ტერორის შესაჩერებლად მსოფლიოს ყველა საჭირო ძალა უნდა იყოს მობილიზებული. ამისთვის საჭირო არ არის განსაკუთრებული ძალები, არამედ საკმარისია ლიდერების სიმამაცე – სიმამაცე, მისცენ უკრაინას ყველაფერი, რაც აუცილებელია დასაცავად“- განაცხადა ზელენსკიმ. პროკურატურის ინფორმაციით, ხარკოვი ბალისტიკური რაკეტებით რუსეთის ტერიტორიიდან დაბომბეს. ადგილობრივი ხელისუფლების ცნობით, 40-ზე მეტი მშვიდობიანი მოქალაქე დაშავდა,…

„შეძრწუნებული ვარ „ჰამასის” ექვსი ისრაელელი მძევლის მკვლელობით, რომელთა ცხედრები ღაზაში იპოვეს, საჭიროა ცეცხლის შეწყვეტა ამ ტრაგედიის დასასრულებლად და ყველა მძევლის სახლში დასაბრუნებლად“ – ამის შესახებ ევროკავშირის უმაღლესი წარმომადგენელი საგარეო საქმეთა და უსაფრთხოების საკითხებში, ჯოზეფ ბორელი სოციალურ პლატფორმა X-ზე წერს. „ეს ახალგაზრდა უდანაშაულო მამაკაცები და ქალები დიდი ხანია უსაფრთხოდ უნდა მიეყვანათ საყვარელ ადამიანებთან. ყველა მძევლის გვერდით ვდგავართ. საჭიროა ცეცხლის შეწყვეტა ამ ტრაგედიის დასასრულებლად და ყველა მძევლის სახლში დასაბრუნებლად“, – აცხადებს ბორელი. ისრაელის თავდაცვის ძალების ცნობით, ისრაელელმა სამხედროებმა „ჰამასის” მიერ 7 ოქტომბერს გატაცებული კიდევ ექვსი მძევლის ცხედარი ღაზას სამხრეთით, რაფაჰში მდებარე ერთ-ერთ გვირაბში…

რუსულმა ძალებმა ხარკოვს 10-მდე დარტყმა მიაყენეს, რის შედეგადაც 28 ადამიანი დაშავდა. ინფორმაციას უკრაინული მედია ხარკოვის საოლქო-სამხედრო ადმინისტრაციის ხელმძღვანელზე, ოლეგ სინეგუბოვსა და ხარკოვის მერზე, იგორ ტერეხოვზე დაყრდნობით ავრცელებს. ტერეხოვმა განაცხადა, რომ 22 ადამიანი სალტოვსკის რაიონში დაშავდა, ექვსი კი – ნემიშლიანსკში, მათ შორის ექვსი წლის ბავშვი. დაშავებულებს შორის მედიკოსებიც არიან. დაზიანებულ ინფრასტრუქტურას შორისაა სავაჭრო ცენტრი, სპორტული ინფრასტრუქტურის ობიექტი და საცხოვრებელი კორპუსები  

პოლონეთის პრეზიდენტმა, ანჯეი დუდამ  გერმანიას მეორე მსოფლიო ომის დროს მიყენებული ზარალის ანაზღაურებისკენ მოუწოდა. „პატიება და ბრალის აღიარება ერთია, ზარალის ანაზღაურება კი – სხვა წლისთავზე… და ეს საკითხი კვლავ გადაუჭრელია, უკვე 80 წელია, თუ მეორე მსოფლიო ომის წლებს ჩავთვლით“-განაცხადა დუდამ ქალაქ ველუნში, ნაცისტური გერმანიის პოლონეთში შეჭრის 85-ე წლისთავზე. ველუნი იყო ერთ-ერთი პირველი პოლონური დასახლება, რომელიც ჰიტლერის ავიაციამ დაბომბა მეორე მსოფლიო ომის დროს. მაშინ თავდასხმის შედეგად დაახლოებით 1 200 ადგილობრივი მცხოვრები დაიღუპა. ომის წლებში პოლონეთში სულ დაახლოებით ექვსი მილიონი ადამიანი დაიღუპა, ქვეყნის დედაქალაქი ვარშავა კი თითქმის მთლიანად განადგურდა.

1 სექტემბრის ღამეს ხა თავს.  ხანძარი გაუჩნდა მოსკოვის ჩრდილოეთით, ტვერის რეგიონში მდებარე კონაკოვსკის ჰიდროელექტრო სადგურს. რუსეთის ხელისუფლებამ განაცხადა, რომ ხანძარი ჩააქრო. უცნობია, თუ რა ზიანი მიადგა ჰიდროელექტრო სადგურს. ხანძრის ამსახველი ფოტო და ვიდეო მასალა ტვერის მცხოვრებლებმა ატვირთეს ტელეგრამის არხში.

გაერო-ს გენერალური მდივანი, ანტონიო გუტერეში 6 ისრაელელი მძევლის ცხედრის პოვნას ეხმაურება და აცხადებს, რომ ღაზას სექტორში ომის კოშმარი უნდა დასრულდეს. „დღევანდელი ტრაგიკული ამბები არის დამანგრეველი შეხსენება იმისა, რომ ყველა მძევალი უპირობოდ უნდა გათავისუფლდეს და ღაზაში ომის კოშმარი აუცილებლად უნდა დასრულდეს“, – წერს გუტერეში სოციალურ პლატფორმა X-ზე. ისრაელის თავდაცვის ძალების ცნობით, ისრაელელმა სამხედროებმა „ჰამასის” მიერ 7 ოქტომბერს გატაცებული კიდევ ექვსი მძევლის ცხედარი ღაზას სამხრეთით, რაფაჰში მდებარე ერთ-ერთ გვირაბში აღმოაჩინეს.

„რუსეთი უკვე პასუხობს და გააგრძელებს პასუხის გაცემას კურსკის ოლქზე უკრაინის თავდასხმაზე“ – ამის შესახებ რუსეთის პრეზიდენტის პრესსპიკერმა, დიმიტრი პესკოვმა განაცხადა. ”პასუხის გაცემა, ფაქტობრივად, უკვე ხდება, რატომ ფიქრობთ, რომ ეს არის რაღაც ერთჯერადი მოვლენა? თქვენ ხედავთ ჩვენი შეიარაღებული ძალების გადამწყვეტ მოქმედებებს, უდავოა, რომ ისინი გაგრძელდება, – აღნიშნა პესკოვმა. უკრაინის შეიარაღებული ძალები რუსეთის კურსკის ოლქში ოპერაციას 6 აგვისტოდან ახორციელებს.  

ისრაელის პრემიერ-მინისტრის, ბენიამინ ნეთანიაჰუს განცხადებით, ისრაელი არ მოისვენებს მანამ, სანამ პასუხს არ აგებინებს მათ, ვინც პასუხისმგებლები არიან ექვსი მძევლის მკვლელობაში. „ვეუბნები “ჰამასის” ტერორისტებს, რომლებმაც დახოცეს გატაცებულები და მათ ლიდერებს – დაკარგეთ სიცოცხლის უფლება. არ დავისვენებთ და არ გავჩუმდებით, დაგედევნებით, დაგეწევით და ანგარიშს გავასწორებთ თქვენთან“ – აღნიშნა ნეთანიაჰუმ. მისი თქმით, ისრაელი მზად არის მიაღწიოს შეთანხმებას დარჩენილი მძევლების გათავისუფლებისა და ისრაელის უსაფრთხოების უზრუნველსაყოფის მიზნით.    

ცენტრალური საარჩევნო კომისიის წარმომადგენლის ფარიდ ორუჯევის განცხადებით, ხმის მიცემის დაწყებიდან პირველი ოთხი საათის განმავლობაში ამომრჩეველთა აქტივობამ 20,39 პროცენტი შეადგინა, რაც ნიშნავს, რომ საკუთარი არჩევანი 1 309 522-მა ამომრჩეველმა გააკეთა. საარჩევნო უბნები მთელი ქვეყნის მასშტაბით დილის რვა საათზე გაიხსნა. ცესკო-ს მონაცემებით, მთელი ქვეყნის მასშტაბით 6,343 საარჩევნო უბანი ფუნქციონირებს. უბნები 19:00 საათზე დაიხურება. სულ ქვეყანაში დაახლოებით 6.5 მილიონი ამომრჩეველია რეგისტრირებული, მათგან 51 ათასზე მეტი პირველად მიიღებს მონაწილეობას არჩევნებში.  

ამერიკის პრეზიდენტი ჯო ბაიდენი ღაზაში მდებარე „ჰამასის“ გვირაბში ექვსი ისრაელელი მძევლის ცხედრის პოვნას ეხმაურება, რომელთაგან ერთ-ერთი აშშ-ის მოქალაქე იყო. „განადგურებული და აღშფოთებული ვარ. ის იმ უდანაშაულო ადამიანთა შორის იყო, რომელთაც სასტიკად დაესხნენ თავს, როდესაც ისინი მუსიკალურ ფესტივალს ესწრებოდნენ ისრაელში 7 ოქტომბერს“ – აღნიშნავს ბაიდენი 23 წლის ისრაელ-აშშ-ის მოქალაქე, ჰერშ გოლდბერგ-პოლინის შესახებ. ამერიკის პრეზიდენტმა აღნიშნა, რომ ისინი განაგრძობენ მუშაობას, რათა მხარეებმა მიაღწიონ შეთანხმებას, რაც თავის მხრივ, დარჩენილი მძევლების გათავისუფლებას ითვალისწინებს. „ჰამასის“ ლიდერები გადაიხდიან საფასურს ამ დანაშაულებისთვის“ – აღნიშნა ჯო ბაიდენმა.