გაერთიანებული კომიტეტების სხდომაზე, სალომე სამადაშვილს იურიდიული კომიტეტის თავმჯდომარემ ანრი ოხანაშვილმა მიკროფონი გაუთიშა. ეს ყველაფერი კი მას შემდეგ, რაც სამადაშვილმა “ოლიგარქი ივანიშვილი” ახსენა. ოხანაშვილმა მისგან ივანიშვილის საპატიო თავმჯდომარედ მოხსენიება მოითხოვა:
,,მშვენივრად საუბრობთ მიკროფონის გარეშე… მეგაფონი მიიტანეთ სადაც მიჩვეული ხართ მეგაფონით სიარულს. მე თქვენ მოგიწოდებთ ისაუბროთ კორექტულად, შეურაცხყოფის გარეშე კონკრეტულ კანდიდატებთან მიმართებაში. აქ არ ვართ იმისთვის, რომ თქვენს პერფორმანსებს ვუსმინოთ”, – მიმართა ოხანაშვილმა სამადაშვილს.
კამათის შემდეგ, ოხანაშვილმა სამადაშვილი რეგლამენტის დარღვევაში დაადანაშაულა და დარბაზიდან გააძევა – “მოქცევას როდესაც ისწავლით, მაშინ შემობრძანდებით”.
შეგახსენებთ, პარლამენტმა დღეს განახლებული მინისტრთა კაბინეტის დამტკიცების პროცედურები დაიწყო. დღეიდან მინისტრობის კანდიდატებს საკომიტეტო ფორმატში მოუსმენენ. 8 თებერვალს კი საპარლამენტო უმრავლესობა ახალ პრემიერსა და კაბინეტს განახლებულ შემადგენლობას უკვე სასესიო ფორმატში დაამტკიცებს.