თავდაცვის მდივანი ლოიდ ოსტინი დღეს პენტაგონში სამუშაოდ დაბრუნდა. 15 იანვარს, უოლტერ რიდის ეროვნული სამხედრო სამედიცინო ცენტრიდან გაწერის შემდეგ, მინისტრი მოვალეობას სახლიდან ასრულებდა. ინფორმაციას აშშ-ის თავდაცვის დეპარტამენტი ავრცელებს.
ცნობისთვის, 5 იანვარს პენტაგონის სპიკერმა, გენერალმა პატრიკ რაიდერმა განაცხადა, რომ ლოიდ ოსტინი მცირე გეგმური სამედიცინო პროცედურის შემდგომი გართულებების გამო, 1 იანვარს უოლტერ რიდის ეროვნულ სამხედრო სამედიცინო ცენტრში გადაიყვანეს. მანამდე კი ოსტინის ჰოსპიტალიზაციის შესახებ ცნობები მედიაში გავრცელდა. მოგვიანებით პენტაგონმა გამოაცხადა, რომ მინისტრი პროსტატის კიბოს მკურნალობას გადიოდა, რომელიც ადრეულ ეტაპზე გამოვლინდა.
