გრიპი გადამდები რესპირაციული დაავადებაა, რომელსაც იწვევს გრიპის ვირუსი. ის აზიანებს სასუნთქ სისტემას (ცხვირი, ხახა, ფილტვები). სხვა რესპირაციული ვირუსებისაგან განსხვავებით, გრიპი სერიოზულ დაავადებას და სიცოცხლისათვის საშიშ გართულებებს იწვევს.
გრიპის ვირუსი ჰაერწვეთოვანი გზით გადადის, ვრცელდება ხველების ან ცხვირცემინების დროს. შედარებით იშვიათად მაშინ, როდესაც პიროვნება ხელით შეეხება იმ საგანს, რომელზეც მოხვდა დაავადებული ადამიანის გამონაყოფი, შემდეგ ამ დაინფიცირებულ ხელს შეახებს პირს ან ცხვირს. გრიპის სიმპტომებია: ცხელება, თავის ტკივილი, საერთო სისუსტე, მშრალი ხველა, ყელის ტკივილი, ცხვირიდან გამონადენი, კუნთების ტკივილი.
ბავშვებში დამატებით შეიძლება აღინიშნოს გულისრევა, პირღებინება და ნაწლავთა მოქმედების გახშირება. გრიპის გართულებებია: ფილტვების ანთება, ყურის ინფექცია, ცხვირის დანამატი ღრუების ინფექცია და ქრონიკული დაავადებების გართულება, როგორიცაა გულის უკმარისობა, ასთმა, დიაბეტი და სხვა. გადადების პერიოდი დამოკიდებულია ადამიანის ასაკსა და ჯანმრთელობის მდგომარეობაზე.
ხშირ შემთხვევაში დაავადებულს შეუძლია ინფექციის გადაცემა დაავადების ნიშნების გამოვლენამდე ერთი დღით ადრე და დაავადების ნიშნების გამოვლენიდან 5 დღის განმავლობაში. გრიპით დაავადებულთან კონტაქტის შემდეგ დაავადების ნიშნები ვლინდება ერთი-ოთხი დღის განმავლობაში, საშუალოდ 2 დღეში.