დღე: ოქტომბერი 8, 2024

რუსებმა ხარკოვი დაბომბეს – დაშავდა 16 ადამიანი. ინფორმაციას უკრაინული მედია ავრცელებს. ხარკოვის საოლქო-სამხედრო ადმინისტრაციის ხელმძღვანელმა, ოლეგ სინეგუბოვმა განაცხადა, რომ რუსული ძალების იერიშის შედეგად საცხოვრებელი კორპუსები დაზიანდა. სინეგუბოვის ცნობით, დაშავებულთაგან 7 საავადმყოფოში გადაიყვანეს, ხოლო დანარჩენებს ექიმებმა სამედიცინო დახმარება ადგილზე აღმოუჩინეს.

საგარეო პოლიტიკისა და უსაფრთხოების საკითხებში ევროკავშირის უმაღლესმა წარმომადგენელმა, ჟოზეფ ბორელმა განაცხადა, რომ ევროკავშირის მხარდაჭერის გარეშე უკრაინა ვერ გადარჩება რუსეთის წინააღმდეგ სრულმასშტაბურ ომში. „თუ უკრაინის მხარდაჭერას შევწყვეტთ, 15 დღეში ომი დასრულდება და პუტინი თავის მიზნებს მიაღწევს“, – აღნიშნა ბორელმა. ბორელი მიიჩნევს, რომ დასავლეთმა ყველაფერი უნდა გააკეთოს იმისათვის, რომ „როდესაც დრო მოვა“ სამშვიდობო მოლაპარაკებები წარიმართოს უკრაინის სუვერენიტეტისა და ტერიტორიული მთლიანობისთვის ხელსაყრელი პირობებით.

აშშ-ის პრეზიდენტობის კანდიდატის „რესპუბლიკური“ პარტიიდან დონალდ ტრამპის აზრით, ამერიკის საპრეზიდენტო არჩევნები, რომელიც 5 ნოემბერს გაიმართება, ისრაელისთვის ყველაზე მნიშვნელოვანი იქნება. მისი თქმით, თუ არჩევნებში მისმა კონკურენტმა „დემოკრატიული“ პარტიიდან კამალა ჰარისმა გაიმარჯვა, ეს ისრაელისთვის ეგზისტენციალური საფრთხის შემცველი იქნება. „თუ გსურთ იცოდეთ სიმართლე, მე ამის მჯერა. ვფიქრობ, თქვენც გჯერათ. თუ ჩვენ არჩევნებში არ გავიმარჯვებთ, ამას ყველაფერში დიდი შედეგები მოჰყვება“, – განაცხადა ტრამპმა. გამოცემა აღნიშნავს, რომ 7 ოქტომბერს დაჯგუფება „ჰამასის“ წევრების ისრაელში შეჭრის წლისთავთან დაკავშირებით ტრამპმა და ჰარისმა წინასაარჩევნო კამპანია შეაჩერეს. ტრამპმა მორიგ ჯერზე დაადანაშაულა „დემოკრატების“ ადმინისტრაცია იმაში, რაც ერთი წლის წინ ისრაელში მოხდა.…

,,დამოუკიდებელი მედიის პირადი საქმეა, რა წესებს მიჰყვება”, – ამბობს ევროკავშირის ელჩი პაველ ჰერჩინსკი ,,ქართული ოცნების” მოთხოვნაზე, კრიტიკული მედიის ეთერში მისი პროპაგანდისტული საარჩევნო ვიდეორგოლის გასვლასთან დაკავშირებით.  ,,ევროკავშირი მხარს უჭერს თავისუფალ და დამოუკიდებელ მედიას არა მხოლოდ საქართველოში, არამედ მსოფლიოს ნებისმიერ ქვეყანაში, რადგან ეს არის დემოკრატიული სისტემის წინაპირობა. მედიამ თავად უნდა გადაწყვიტოს, რა სურს და რა არ სურს, რა განცხადებებს ეთანხმება რა რას არ ეთანხმება. დამოუკიდებელი მედიის პირადი საქმეა, რა წესებს მიჰყვება”, – განაცხადა ჰერჩინსკიმ.

აფგან სადიგოვი ციხის სამედიცინო დაწესებულებაში გადაიყვანეს. ინფორმაციას სოციალურ ქსელში ,,სოციალური სამართლიანობის ცენტრის” ხელმძღვანელი, თამთა მიქელაძე ავრცელებს. მათი თქმით, უკანონოდ დაკავებული აზერბაიჯანელი ჟურნალისტის ჯანმრთელობის მდგომარეობა უკიდურესად დამძიმდა. ,,როგორც მოსალოდნელი იყო, აფგან სადიგოვის ჯანმრთელობის მდგომარეობა უკიდურესად დამძიმდა. მეუღლეს ახლა შეატყობინეს, რომ ციხის სამედიცინო დაწესებულებაში გადაიყვანეს დაუძლურებული პატიმარი. არაადამიანურია, რაც ამ პატიოსანი ჟურნალისტის და მისი ოჯახის თავს ხდება. ორივე მთავრობას დანაშაულებრივად აქვს პირი შეკრული ჟურნალისტების ოჯახის წინააღმდეგ და ყველაფერს კადრულობს. მნიშვნელოვანია, ჩვენმა საზოგადოებამ ერთსულოვანი სოლიდარობა ვაჩვენოთ სადიგოვების ოჯახის მიმართ. ამ საქმეზე უფრო დეტალურ ინფორმაციას უახლოეს დღეებში მივაწვდით საზოგადოებას და მედიას”, – წერს მიქელაძე.…

,,უახლოეს მომავალში, უკრაინა წარუდგენს თავის გამარჯვების გეგმას ყველა პარტნიორს, ვისაც შეუძლია გააძლიეროს უკრაინა რუსული აგრესიის წინააღმდეგ ბრძოლაში”, – განაცხადა უკრაინის პრეზიდენტმა ვოლოდიმირ ზელენსკიმ. ,,დღეს შევთანხმდი მოლაპარაკებების განრიგზე ერთი კვირის განმავლობაში. ეს არის შეხვედრები, მოლაპარაკებები ბევრ პარტნიორთან. ჩვენ წარვუდგენთ ჩვენი გამარჯვების გეგმას ყველას, ვისაც შეუძლია უკრაინის გაძლიერება – ყველა ქვეყანას, რომელიც ნამდვილად შეძლებს დახმარებას მშვიდობის დამყარებაში. რა თქმა უნდა, ჩვენი პარტნიორების პოზიციებისა და უკრაინის რეალური შესაძლებლობის გაცნობიერებით, გამარჯვების გეგმის გაძლიერებით, ჩვენ გავასაჯაროებთ ჩვენს სტრატეგიას შემდგომი ქმედებებისთვის”, – განაცხადა ზელენსკიმ.

აშშ-ის ვიცე-პრეზიდენტი და დემოკრატების საპრეზიდენტო კანდიდატი კამალა ჰარისი ამბობს, რომ პრეზიდენტად არჩევის შემთხვევაში, არ შეხვდება პუტინს სამშვიდობო მოლაპარაკებებზე, უკრაინის მონაწილეობის გარეშე: ,,ორმხრივად, უკრაინის გარეშე – არა. უკრაინამ უნდა თქვას თავისი სიტყვა უკრაინის მომავალზე”, – განაცხადა ჰარისმა 60 Minutes-თან ინტერვიუს დროს. ჰარისმა აღნიშნა, რომ ომის დასრულებაში წარმატების მიღწევა ვერ მოხდება, თუ უკრაინა და გაერო-ს წესდება არ მიიღებენ მონაწილეობას ამ წარმატების ფორმირებაში. მისივე თქმით, გააგრძელებს უკრაინის მხარდაჭერას.

დღეს ევროპარლამენტში საქართველოს შესახებ იმსჯელებენ. ევროპარლამენტის სესიაზე ჩვენ ქვეყანაში დემოკრატიული პროცესების საფრთხეებს განიხილავენ. განხილვა თბილისის დროით 5 საათზე დაიწყება, სადაც მოხსენებით წარდგება ევროკავშირის უმაღლესი წარმომადგენელი, ჯოზეფ ბორელი. განსახილველ საკითხებს შორის ყველა ის პრობლემატური თემა მოხვდება, რამაც საქართველოს ევროკავშირში ინტეგრაციის პროცესი შეაჩერა. საქართველოს საკითხის განხილვის პარალელურად კი სტრასბურგში ქართველი ემიგრანტები შეიკრიბებიან და საპროტესტო აქციას გამართავენ და კიდევ ერთხელ მოითხოვენ მათთვის კონსტიტუციით გარანტირებული, ხმის მიცემის უფლების დაცვას. ემიგრანტები ,,ქართულ ოცნებას” არჩევნებში მონაწილეობაში მიზანმიმართულად ხელშეშლაში ადანაშაულებენ და ხელისუფლებას კიდევ ერთხელ მოუწოდებენ გახსნას დამატებითი საარჩევნო უბნები მათთვის.