დღე: სექტემბერი 25, 2024

ისრაელის პრემიერ-მინისტრმა, ბენიამინ ნეთანიაჰუმ მთავრობას ნება დართო, ითანამშრომლოს აშშ-თან ლიბანში ცეცხლის შეწყვეტის შუამავლობასთან დაკავშირებით.  ინფორმაციას ამის შესახებ „სიენენი“ ავრცელებს. როგორც „სიენენი“ წერს, მაღალჩინოსნის განმარტებით, ნეთანიაჰუს თანხმობა გულისხმობს, რომ ნებისმიერი შეთანხმება უნდა ითვალისწინებდეს ისრაელის მოქალაქეების დაბრუნებას საკუთარ სახლებში, ჩრდილოეთ ისრაელში. აშშ-ს სპეციალური წარმომადგენელი ამოს ჰოხშტეინი ასევე ჩართულია ამ პროცესში, თუმცა, ამერიკული მხარე „ჰეზბოლასთან“ პირდაპირ არ საუბრობს.  

აშშ-ის სახელმწიფო მდივნის, ენტონი ბლინკენის განცხადებით, რუსეთის პრეზიდენტი ვლადიმერ პუტინი ცდილობდა უკრაინა მსოფლიო რუკიდან წაეშალა, მაგრამ მას ეს არ გამოუვიდა და არც გამოუვა. აღნიშნული   განცხადებით ბლინკენმა უპასუხა პრეზიდენტობის კანდიდატის, დონალდ ტრამპის იმ განცხადებასთან დაკავშირებით დასმულ შეკითხვას, სადაც ტრამპი ამბობს, რომ რუსეთს შეუძლია უკრაინას დამარცხება. „ახლა ამოცანა იმაში მდგომარეობს, რომ დავრწმუნდეთ, რომ უკრაინას შეუძლია, იყოს ძლიერი დამოუკიდებელი ქვეყანა, რომელიც ფეხზე დგას სამხედრო, ეკონომიკური და დემოკრატიული თვალსაზრისით. ჩვენ ვმუშაობთ ამაზე და არა მხოლოდ ჩვენ – 50-ზე მეტი ქვეყანა“-აღნიშნა ბლინკენმა. როგორც ბლინკენმა აღნიშნა, ერთ ქვეყანას არ შეუძლია, უბრალოდ, თავს დაესხას მეორეს, ძალით შეცვალოს მისი…

“რუსეთი იტოვებს უფლებას, გამოიყენოს ბირთვული იარაღი აგრესიის შემთხვევაში, მათ შორის, თუ მტერი შექმნის კრიტიკულ საფრთხეს ჩვეულებრივი იარაღის გამოყენებით”– ამის შესახებ რუსეთის პრეზიდენტმა, ვლადიმერ პუტინმა, უსაფრთხოების საბჭოს სხდომაზე  განაცხადა. რუსეთის პრეზიდენტი ამბობს, რომ მოსკოვი ასევე გამოიყენებს ბირთვულ იარაღს ბელარუსის წინააღმდეგ აგრესიის შემთხვევაში. „აუცილებელია სტრატეგიული დაგეგმვის დოკუმენტის დებულებების მორგება არსებულ რეალობასთან. ჩატარდა რუსეთის მიდგომების ღრმა და ყოვლისმომცველი ანალიზი ბირთვული ძალების შესაძლო გამოყენების და მათი შესაძლო კორექტირების შესახებ. ამავდროულად, ჩვენ ვხედავთ, რომ არსებული სამხედრო და პოლიტიკური ვითარება დინამიკურად იცვლება. ჩვენ ვალდებულნი ვართ, გავითვალისწინოთ ეს, მათ შორის, არის რუსეთისა და ჩვენი მოკავშირეებისთვის სამხედრო საფრთხეებისა…

რუსეთის ძალებმა დონეცკის ოლქის ქალაქი კრამატორსი დაბომბეს. დონეცკის საოლქო სამხედრო ადმინისტრაციის ხელმძღვანელის ვადიმ ფილაშკინის ინფორმაციით, დაღუპულია ორი და დაშავებულია თორმეტი ადამიანი. მისივე ცნობით, რუსეთის საოკუპაციო ძალებმა ქალაქის ცენტრზე მართვადი ავიაბომბებით მიიტანეს იერიში. დაზიანებულია ორი მრავალსართულიანი შენობა, მაღაზიები და ავტომობილები.

ლიბანში პეიჯერების და რაციების აფეთქების შედეგად დაჯგუფება „ჰეზბოლას“ 1 500-მდე მებრძოლი ქმედითუუნარო გახდა. მებრძოლთა უმეტესობამ მხედველობა დაკარგა, ხოლო ნაწილი ზედა კიდურების გარეშე დარჩა. როგორც Reuters-ი იუწყება, მიუხედავად იმისა, რომ პეიჯერების აფეთქებამ „ჰეზბოლას“ სერიოზული ზიანი მიაყენა, დაჯგუფებას მაინც ჰყავს 40-დან 50 ათასამდე მებრძოლი. დაჯგუფების ლიდერის ჰასან ნასრალას განცახებით კი, „ჰეზბოლას“ 100 ათასი მებრძოლი ჰყავს. სექტემბერში ლიბანში პეიჯერები და რაციები აფეთქდა, რომლებსაც „ჰეზბოლას“ წევრები იყენებდნენ. შედეგად 39 ადამიანი დაიღუპა. ლიბანი და „ჰეზბოლა“ მომხდარში ისრაელს ადანაშაულებენ, რომელიც ბრალდებებს უარყოფს.

აშშ-ის სენატში „ქართველი ხალხის აქტის“ შესახებ მოსმენა გადაიდო. ინფორმაცია აშშ-ის სენატის საგარეო ურთიერთობათა კომიტეტის ვებგვერდზე ვრცელდება. ორპარტიული კანონპროექტის შესახებ გასამართი შეხვედრის თარიღი, ჯერჯერობით უცნობია. შეგახსენებთ, რომ ,,ქართველი ხალხის აქტი” დემოკრატმა სენატორმა ჯინ შაჰინმა და რესპუბლიკელმა ჯიმ რიშმა შეიმუშავეს. დოკუმენტი ქართველი მაღალჩინოსნების სანქცირებასა და ქართველი ხალხის მხარდაჭერას გულისხმობს.

აზერბაიჯანის საგარეო საქმეთა მინისტრი ჯეიჰუნ ბაირამოვი აშშ-ის სახელმწიფო მდივნის ენტონი ბლინკენის შუამავლობით 26 სექტემბერს ნიუ-იორკში სომეხ კოლეგას არარატ მირზოიანს შეხვდება. ინფორმაციას აზერბაიჯანული მედია ქვეყნის საგარეო საქმეთა სამინისტოს პრეს-სპიკერზე აიჰან გაჯიზადეზე დაყრდნობით ავრცელებს. „26 სექტემბერს ნიუ-იორკში აშშ-ის სახელმწიფო მდივნის ენტონი ბლინკენის ინიციატივითა და მონაწილეობით აზერბაიჯანის საგარეო საქმეთა მინისტრის ჯეიჰუნ ბაირამოვის და სომხეთის საგარეო საქმეთა მინისტრის არარატ მირზოიანის შეხვედრა იგეგმება“, – თქვა გაჯიზადემ. როგორც აზერბაიჯანის საგარეო უწყების წარმომადგენელმა აღნიშნა, შეხვედრის დეტალები ჯერჯერობით უცნობია. ბაირამოვი და მირზოიანი ნიუ-იორკში გაეროს გენერალური ასამბლეის სხდომაში იღებენ მონაწილეობას.

,,ჩვენ არც რუსეთის და არც ამერიკის სამსახურში ვართ, გვაქვს ჩვენი პოლიტიკა და ჩვენი ინტერესები”, – განაცხადა სერბეთის პრეზიდენტმა გაეროს გენერალური ასამბლეის 79-ე სესიაზე სიტყვის გამოსვლისას. ალექსანდრ ვუჩიჩმა დასავლეთის ქვეყნებს მოუწოდა ტერიტორიული მთლიანობის საკითხებში სერბეთს ისევე დაუჭირონ მხარი, როგორც ამას უკრაინასთან მიმართებით აკეთებენ. „როდესაც ლიდერები აქ დიდი ენთუზიაზმით საუბრობენ უკრაინის თავისუფლების აუცილებლობაზე, გაეროს და მისი წესდების, რეზოლუციების დაცვაზე, გვიჩნდება კითხვა – რატომ არ იცავენ ისინი გაეროს რეზოლუციას, როდესაც საქმე ეხება სერბეთის ტერიტორიულ მთლიანობას? მსოფლიო უკრაინაზე ლაპარაკობს, სერბეთზე ლაპარაკს კი ვერ ბედავს. ამბობენ, თითქოს ჩვენ ბალკანეთში ომს დავიწყებთ რუსეთის დაკვეთით. ისინი ორ…

თურქეთის პრეზიდენტმა გაეროს გენერალურ ასამბლეაზე სიტყვით გამოსვლისას პარიზის ზაფხულის ოლიმპიადის გახსნის ცერემონია გააკრიტიკა და მას სამარცხვინო უწოდა. რეჯეფ თაიფ ერდოღანის თქმით, ცერემონიაზე ნაჩვენებმა სცენებმა დეგენდერიზაციის საფრთხის მასშტაბი გამოავლინა. მსოფლიოს იმ ქვეყნების ლიდერებს, რომლებიც თურქეთის შეშფოთებას იზიარებენ, მან ოჯახური ღირებულებების დაცვისკენ მოუწოდა. „საზოგადოების ფუნდამენტურ საყრდენზე, ოჯახის ინსტიტუტზე თავდასხმა სულ უფრო ინტენსიური ხდება. 2024 წლის ოლიმპიური თამაშების გახსნაზე ნაჩვენებმა სცენებმა გამოავლინა საფრთხის მასშტაბები, რომლის წინაშეც კაცობრიობა დგას. სპორტული ღონისძიება, რომელსაც ბავშვები და ყველა ასაკისა და რწმენის ასობით მილიონი ადამიანი უყურებდა, გამოყენებული იყო ყველაზე მახინჯი გზით დეგენდერიზაციის პროპაგანდისთვის. ამ უზნეო სცენებმა ღრმა ჭრილობა…

,,რესპუბლიკური” პარტიის პრეზიდენტობის კანდიდატმა დონალდ ტრამპმა განაცხადა, რომ აშშ არ უნდა იყოს ჩართული უკრაინაში მიმდინარე ომში. მისი თქმით, ამ ომში ქვეყანა ბაიდენმა და ჰარისმა ჩაითრია და ახლა მისი უკან გამოყვანა აღარ შეუძლიათ. ეს განცხადება პრეზიდენტობის კანდიდატმა ჯორჯიის შტატში სიტყვით გამოსვლისას გააკეთა. ,,ბაიდენმა და ჰარისმა ჩაგვითრიეს ამ ომში და ახლა უკან ვეღარ გამოვყავართ, არც აქვთ გეგმაში, რომ უკან გამოგვიყვანონ”, – განაცხადა დონალდ ტრამპმა. მისივე თქმით, მართალია, აშშ პირდაპირ არ იღებს მონაწილეობას ომში, მაგრამ უკრაინას მილიარდობით საბრძოლო და ჰუმანიტარული მასალით ამარაგებს.

ირანის პრეზიდენტმა მასუდ პეზეშკიანმა გაეროს გენერალურ ასამბლეაზე გამოსვლის დროს განაცხადა, რომ მისი ქვეყანა მზადაა იმუშაოს მსოფლიოს ძლიერ სახელმწიფოებთან, რათა ბირთვული დაპირისპირება დასრულდეს. მისი თქმით, რუსეთ-უკრაინის ომი დიალოგის გზით უნდა დასრულდეს. პეზეშკიანმა თავისი გამოსვლის დროს ისრაელი, რომელსაც ირანი მტრად აღიქვამს, ღაზის სექტორში გენოციდში დაადანაშაულა და აღნიშნა, რომ ეს დაუყოვნებლივ უნდა შეჩერდეს. ირანის ლიდერმა იმედი გამოთქვა, რომ აშშ ბირთვული პროგრამის გამო შემოღებულ სანქციებს შეარბილებს. „ჩვენ ვეძებთ მშვიდობას ყველასთვის და არცერთ ქვეყანასთან კონფლიქტს არ ვაპირებთ. ირანი ომის წინააღმდეგ გამოდის და უკრაინაში სამხედრო კონფლიქტის დაუყოვნებლივ შეჩერების აუცილებლობას ხაზს უსვამს“, – აღნიშნა პეზეშკიანმა.

სლოვაკეთის მთავრობის კანცელარიამ პრემიერ-მინისტრ რობერტ ფიცოს სახელზე კონვერტი მიიღო, რომელშიც ცეცხლსასროლი იარაღის ტყვია იდო. ინფორმაციას ადგილობრივი მედია ავრცელებს. ტყვია კონვერტში სახელმწიფო დაცვის სამსახურის წევრებმა აღმოაჩინეს, რომლებიც დილით პრემიერის სახელზე მოსულ კორესპონდენციას ამოწმებდნენ. კონვერტის გამომგზავნის ვინაობა, ჯერჯერობით, უცნობია. შეგახსენებთ, რომ სლოვაკეთის პრემიერ-მინისტრზე თავდასხმა 15 მაისს განხორციელდა, რის შედეგადაც ის მძიმედ დაიჭრა.

უცნობმა ადამიანებმა ცეცხლსასროლი იარაღიდან არიზონის შტატის ქალაქ ტემპეში მდებარე „დემოკრატიული“ პარტიის ოფისი დაცხრილეს. ამერიკული ტელეარხის ცნობით, შემთხვევა აშშ-ის პრეზიდენტობის კანდიდატის „დემოკრატიული“ პარტიიდან კამალა ჰარისის ტემპეში ჩასვლამდე რამდენიმე დღის წინ მოხდა. უცნობმა პირებმა ცეცხლი „დემოკრატების“ ოფისის მიმართულებით გვიან ღამით გახსნეს. იმ დროს შენობაში არავინ იმყოფებოდა, თუმცა, როგორც ადგილობრივი პოლიცია იუწყება, სროლა შემთხვევით გამვლელებს სერიოზულ საფრთხეს უქმნიდა. NBC News-ის ცნობით, ეს ტემპეში მდებარე „დემოკრატების“ ოფისის დაცხრილვის უკვე მეორე შემთხვევაა. პირველად პარტიის ოფისი 16 სექტემბერს დააზიანეს.