„ნაციონალური მოძრაობა“ დანაშაულებრივ-მოღალატეობრივი ძალაა, რომელსაც გასამართლება სჭირდება საქართველოს კონსტიტუციისა და კანონმდებლობის მიხედვით, – ამის შესახებ მოძრაობა „ხალხის ძალის“ წევრმა, მიხეილ ყაველაშვილმა განაცხადა.
მისი თქმით, დადგა დრო და აუცილებელია, რომ ეს ძალა გასამართლდეს.
„დადგა დრო და აუცილებელია, რომ ეს ძალა გასამართლდეს. ვხედავთ, ეს ძალა რა დღეშია. უკვე ერთმანეთს აქილიკებენ და დაშლის პირას არიან, რაც ჩვენთვის მნიშვნელოვანი არ არის. ჩვენთვის მთავარია ჩვენი ქვეყნის ხვალინდელი დღე. ამ ქვეყანაში პოლარიზაცია ვერ დასრულდება, თუ ის ძალა იარსებებს, რომელსაც საკუთარი მოქალაქეების მიმართ ამდენი დანაშაული აქვს ჩადენილი და რომელიც პოლიტიკურ სივრცეში კიდევ არსებობს, პოლიტიკური საქმიანობის გაგრძელება სურს. თუ გვინდა, რომ საქართველოს ხვალინდელი განვითარება იყოს, საჭიროა, საქართველოს კონსტიტუციისა და კანონის მიხედვით იყოს გასამართლებული ის, ვინც ამდენი დანაშაული ჩაიდინა საკუთარი მოქალაქეების მიმართ. უნდა გასამართლდნენ საქართველოს სასამართლოს მიერ“, – განაცხადა მიხეილ ყაველაშვილმა
