მგონია, რომ უკრაინის ხელისუფლების ყოფილი თუ მოქმედი მაღალჩინოსნების მხრიდან დასავლეთზე რაღაცების გადაბრალება არასწორია, – ამის შესახებ პარტია „ქართული ოცნების“ თავმჯდომარემ, ირაკლი კობახიძემ განაცხადა.
ირაკლი კობახიძეს კითხვა დაუსვეს უკრაინის პრეზიდენტის ადმინისტრაციის ყოფილმა მრჩეველის, ალექსეი არესტოვიჩის განცხადებაზე.
„ჩვენ ამ საკითხში ღრმად ვერ შევალთ. ზოგადად, მგონია, რომ უკრაინის ხელისუფლების ყოფილი თუ მოქმედი მაღალჩინოსნების მხრიდან დასავლეთზე რაღაცების გადაბრალება არასწორია. რა თქმა უნდა, ნებისმიერი ხელისუფლება მოქმედებს საკუთარი პასუხისმგებლობით, როცა გადაწყვეტილებებს იღებს და განსაკუთრებით მაშინ, როცა ეს დაკავშირებულია ომის შეწყვეტასთან თუ გაგრძელებასთან. ეს ის პოლემიკაა, რაშიც ჩვენ ვერ ჩავერთვებით. ეს არის უკრაინელი მაღალჩინოსნებისა და დასავლეთის საქმე“, – განაცხადა კობახიძემ.
