კოლექტიურ „ნაცმოძრაობას“ და სალომე ზურაბიშვილს ჰყავთ საერთო პატრონი. მთავარია, საზოგადოებამ დაინახა უკვე, რომ სალომე ზურაბიშვილმა უხეშად დაარღვია საქართველოს კონსტიტუცია,- ამის შესახებ „ქართული ოცნების“ თავმჯდომარემ, ირაკლი კობახიძემ განაცხადა.
მისი თქმით, სალომე ზურაბიშვილმა სწორედ კოლექტიური „ნაცმოძრაობის“ იმედით დაარღვია საქართველოს კონსტიტუცია.
„რა გამოდის? თუ არ გადააყენებს კოლექტიური „ნაცმოძრაობა“ სალომე ზურაბიშვილს, თუ მხარს არ დაუჭერს მის იმპიჩმენტს, გამოდის, რომ 2018 წელს სამ მილიონ ამომრჩეველს უთხრეს ტყუილი. ტყუილი იმის შესახებ, რომ სალომე ზურაბიშვილი იყო მოღალატე და რეზიდენტი. ხვალ შეიძლება მათ იმის აღიარებაც მოუწიოთ. როცა ჩვენ გვეძახიან პრორუსებს და ა.შ. ესეც არის ცარიელი ტყუილი. იტყუებიან, მერე აიძულებენ, რომ საკუთარი ტყუილი უკან წაიღონ. როცა ხარ აგენტი, სხვა რესურსი უბრალოდ არ გაქვს. აგენტის თავისუფლების სივრცე არის აბსოლუტურად შეზღუდული. კოლექტიურ „ნაცმოძრაობას“ და სალომე ზურაბიშვილს ჰყავთ საერთო პატრონი. ჩვენთვის მთავარია, რომ ჩვენი დეპუტატები იყვნენ იმპიჩმენტის პროცედურისთვის მობილიზებული. ეს არის ერთადერთი, რაზეც ჩვენ ვზრუნავთ. არ გვაინტერესებს ოპოზიციასთან მუშაობა ამ თემაზე. მთავარია, საზოგადოებამ დაინახა უკვე, რომ სალომე ზურაბიშვილმა უხეშად დაარღვია საქართველოს კონსტიტუცია. მან ეს თვითონაც აღიარა, როდესაც გამოაცხადა, რომ შესაბამის ქვეყნებში ჩავიდა საკუთარი სახსრებით. თუ ლეგიტიმური იყო ვიზიტი და კონსტიტუციური, მაშინ რატომ არ დახარჯა ბიუჯეტის ფული? თვითონვე უკვე აღიარა, რომ კონსტიტუცია უხეშად დაარღვია, შესაბამისად საკონსტიტუციო სასამართლოს სამსჯელოც კი არაფერი დაუტოვა. ყველამ იცის დღეს, რომ სალომე ზურაბიშვილი არად დაგიდევთ ქვეყნის ძირითად კანონს, რაზეც მან ფიცი დადო თავის დროზე. ის უხეშად არღვევს საქართველოს კონსტიტუციას. ეს საზოგადოებამ დაინახა და ამაზე დასკვნები უნდა გამოიტანოს“, – განაცხადა კობახიძემ.
