ვნახეთ, რომ რაც სულ ახლახან ე.წ. კატარგეითის სკანდალად მოინათლა, ზუსტად იგივე მეთოდები ვიხილეთ მიხეილ სააკაშვილის შემთხვევაშიც, ფაქტობრივად, გვაქვს ახალი სკანდალი მიშაგეითის სახით, – ამის შესახებ საქართველოს პარლამენტის თავმჯდომარემ, შალვა პაპუაშვილმა განაცხადა.
პაპუაშვილმა ამერიკულ ფარას კანონზეც ისაუბრა და აღნიშნა, რომ კანონპროექტი, რომლის მიღებასაც აპირებდნენ სიტყვა-სიტყვით იყო ნათარგმნი ამერიკული კანონიდან. მისივე თქმით, მაშინ ქართულ საზოგადოებას ფაქტობრივად წაართვეს უფლება, სცოდნოდათ და ჰქონოდათ იმავე დონის ცოდნა, რაც აქვთ ამერიკელ მოქალაქეებს.
,,ჩვენ ასევე ვნახეთ ლობიზმის მთელი სიღრმე სადამდე არის, ვნახეთ, რომ პრეზიდენტთან უნდოდათ რატომღაც ამერიკის საელჩოს მეშვეობით შეხვედრების ორგანიზება მისი ნიუ იორკში ვიზიტის დროს. რა შუაშია ამერიკის საელჩო, როდესაც პრეზიდენტი არის ნიუ იორკში, საერთოდ რატომ ესაუბრება ამერიკის საელჩო ლობისტებს, რომლებიც ვხედავთ, რომ დეზინფორმაციის გავრცელებით არიან დაკავებული. ბევრ კითხვას გასცა პასუხი და აჩვენა კიდევ ერთხელ, თუ რა ზიანს აყენებენ ასეთი კოორდინირებული კამპანია საქართველოს.
რაც შეეხება ევროპარლამენტს, ჩვენ ვნახეთ, რომ რაც სულ ახლახან ე.წ. კატარგეითის სკანდალად მოინათლა, ზუსტად იგივე მეთოდები იყო, იქაც მთავარი ბრალდებაა, რომ ხდებოდა გარე ზეგავლენა ევროპარლამენტზე, ხდებოდა რეზოლუციების პროექტების წინ წაწევა და ლობირება, რათა რაღაც რეზოლუციების პროექტი მიეღოთ, რომელიც იქნებოდა ვიღაცისთვის სასარგებლო თუ ვიღაცაზე იქნებოდა საზიანო და ა.შ. ზუსტად იგივე მეთოდები ვიხილეთ ჩვენ ამ შემთხვევაშიც, რაც ახლა გვაქვს, ფაქტობრივად, გვაქვს ახალი სკანდალი მიშაგეითის სახით“,- განაცხადა პაპუაშვილმა.
