თვე: აგვისტო 2024

6 წლის დანგ ტიენ ლამი, რომელიც ვიეტნამში, 17 აგვისტოს დაიკარგა, 5-დღიანი ძებნის შემდეგ, ტყეში იპოვეს. ბავშვი, თავის 9 ძმასთან ერთად, ნაკადულში თამაშობდა და ხეტიალისას დაიკარგა. 21 აგვისტოს, ადგილობრივმა ფერმერებმა ბავშვის ტირილის ხმა გაიგონეს და ბიჭუნას დაკარგვის ადგილიდან 6 კმ-ში, ბუჩქებში მჯდარს მიაკვლიეს. ბავშვი იმდენად იყო დასუსტებული, რომ ფეხზე დგომა არ შეეძლო. ხელისუფლების თქმით, ამ 5 დღის განმავლობაში, ბავშვი ფოთლებითა და ველური ხილით იკვებებოდა, სასმელად კი ნაკადულის წყალს იყენებდა, რამაც, საბოლოოდ, მისი სიცოცხლე იხსნა. პოლიციის განცხადებით, ბავშვის ჯანმრთელობის მდგომარეობა სტაბილურია. 6 წლის დანგ ტიენ ლამის ძებნაში 150 ადამიანი იყო ჩართული, მათ…

უცნობმა პირებმა პაკისტანის პროვინცია პენჯაბში სასკოლო ავტობუსს ცეცხლი გაუხსნეს, რის შედეგადაც ორი მოსწავლე დაიღუპა, ხოლო ექვსი ადამიანი დაშავდა. „უცნობმა მამაკაცებმა სასკოლო ავტობუსს ცეცხლი გაუხსნეს, ორი ბავშვი დაიღუპა, ხოლო ხუთი დაშავდა“, – აღნიშნულია ინფორმაციაში. მეექვსე დაშავებული ავტობუსის მძღოლია. დაღუპული ბავშვების ასაკი 10-დან 12 წლამდე მერყეობს. ინციდენტის შემდეგ თავდამსხმელები ადგილიდან მიიმალნენ. ერთ-ერთი ვერსიის თანახმად, თავდამსხმელებს ავტობუსის მძღოლთან პირადი უთანხმოება ჰქონდათ. მომხდარი დაგმო პაკისტანის პრეზიდენტმა ასიფ ალი ზარდარიმ. „თავდასხმა უდანაშაულო ბავშვებზე სასტიკი და სამარცხვინო აქტია“, – ნათქვამია პრეზიდენტის განცხადებაში.

უნგრეთში უკრაინული ლტოლვილებისთვის ახალი რეგულაცია ამოქმედდა. დღეიდან მთავრობის დახმარებას უკრაინის მხოლოდ იმ რეგიონების მცხოვრებლები მიიღებენ, რომლებიც რუსეთის შეჭრის შედეგად დაზარალდნენ. ჩამონათვალში უნგრეთის მთავრობამ 13 რეგიონი შეიყვანა, სადაც საომარი მოქმედებები მიმდინარეობდა ან დღესაც გრძელდება. ცნობისათვის, უკრაინაში რუსეთის შეჭრის შემდეგ, უნგრეთში თავშესაფარი 31 ათასმა უკრაინელმა მიიღო.

პორტუგალიამ ევროკავშირს კუნძულ მადეირაზე ტყის ხანძრის ჩაქრობაში დახმარების თხოვნით მიმართა. ცეცხლი ტყის დაცულ მასას უახლოვდება და საფრთხეს უქმნის „იუნესკოს“ მსოფლიო მემკვიდრეობის სიაში შეტანილ დაფნის ტყეს. ხანძარი რიბეირა-ბრავას მუნიციპალიტეტში ჯერ კიდევ 14 აგვისტოს დაიწყო და ძლიერი ქარის გამო მეზობელ მუნიციპალიტეტებშიც გავრცელდა. სისტემა „კოპერნიკის“ თანამგზავრების მონაცემებით უკვე დაიწვა 4 392 ჰექტარი. კვამლით მოწამვლის საშიშროების გამო ევაკუირებულია 200-მდე ადამიანი. ინფორმაცია დაშავებულებისა ან გარდაცვლილების შესახებ არ გავრცელებულა.

ბოსნია და ჰერცეგოვინის ჩრდილო-დასავლეთით, ქალაქ სანსკი მოსტში სკოლის თანამშრომელმა კოლეგებს ცეცხლი გაუხსნა. დაიღუპა სამი ადამიანი. მსროლელმა თავადაც სცადა თვითმკვლელობა, თუმცა გადარჩა. პოლიციამ ის მძიმე მდგომარეობაში საავადმყოფოში გადაიყვანა. პოლიციის თქმით, მსროლელი შეიარაღებული იყო სამხედრო ავტომატით. მოკლულია სკოლის დირექტორი, მისი მდივანი და მასწავლებელი. არდადეგების გამო სკოლაში ბავშვები არ იყვნენ. პოლიციამ მსროლელის ვინაობა დაადგინა. ის სკოლაში დამლაგებლად მუშაობდა და მედიის ინფორმაციით, კონფლიქტი ჰქონდა ხელმძღვანელობასთან. თანამშრომლების ინფორმაციით, მას პოსტტრავმული სტრესული აშლილობა ჰქონდა 1990-იან წლების სამოქალაქო ომის შემდეგ. როგორც Associated Press აღნიშნავს, ბალკანეთის რეგიონში გასული საუკუნის 90-იანი წლების სამოქალაქო ომების შემდეგ, მოსახლეობას დიდი რაოდენობით სხვადასხვა…

სიცილიის სანაპიროსთან მყვინთავებმა ხუთი ცხედარი იპოვეს. მედიის ცნობით, დაღუპულები იმ სამგზავრო იახტის მგზავრები არიან, რომელიც მოულოდნელად, ჯერჯერობით დაუდგენელი მიზეზის გამო ორშაბათს ჩაიძირა. ერთ-ერთი ვერსიით განიხილება მეხის დაცემაც. იტალიის სანაპირო დაცვას მათი ვინაობა ოფიციალურად არ დაუსახელებია, თუმცა, ცნობილია, რომ ზღვაში გაუჩინარებულ მგზავრებს შორის იყვნენ იახტის მფლობელი, ბრიტანელი მეწარმე და ბიზნესმენი მაიკ ლინჩი, შვილთან ერთად და ამერიკული ბანკის ,,მორგან სტენლის” ერთ-ერთი დირექტორი. იახტის ჩაძირვის შემდეგ, მაშველებმა 22 მგზავრიდან 15-ის გადარჩენა შეძლეს, 1-ის ცხედარი კი მალევე იპოვეს.

ინდოეთში, ფარმაცევტულ ქარხანაში აფეთქების შედეგად 15 ადამიანი დაიღუპა, 40 კი დაშავდა. ინფორმაციას Reuters ავრცელებს და წერს, რომ აფეთქება ინდოეთის სამხრეთით, ანდრა პრადეშის შტატში მდებარე კერძო ფარმაცევტულ ქარხანაში შუადღისას მოხდა. დაჭრილები საავადმყოფოში გადაიყვანეს, სამაშველო სამუშაოები კი ამ დრომდე მიმდინარეობს. მსხვერპლთა რაოდენობა, შესაძლოა, გაიზარდოს. აფეთქების გამომწვევი მიზეზი, ჯერჯერობით, უცნობია.

ისრაელის ჩრდილოეთ ნაწილში ჰეზბოლას მასშტაბური სარაკეტო თავდასხმის შედეგად ერთი ადამიანი დაშავდა. „ცაჰალის“ განცხადებით, დაჯგუფებამ ისრაელის მიმართულებით 50 რაკეტა გაუშვა. მათი მნიშვნელოვანი ნაწილი საჰაერო თავდაცვის სისტემა „რკინის გუმბათმა“ ჰაერში გაანეიტრალა, თუმცა რამდენიმე რაკეტა ქალაქ კაცრინში ჩავარდა და საცხოვრებელი სახლები დაზიანდა. „ჰეზბოლას“ განცხადებით, შეტევის სამიზნე ქალაქთან ახლოს მდებარე სამხედრო ბაზა იყო. ისრაელის ჩრდილოეთში „ჰეზბოლას“ თავდასხმა მას შემდეგ განხორციელდა, რაც „ცაჰალმა“ ლიბანში დაჯგუფების იარაღის საცავსა და სამეთვალყურეო ცენტრზე ავიაიერიში მიიტანა.

ჩიკაგოში ისრაელის საკონსულოსთან დემონსტრაცია პოლიციასა და აქტივისტებს შორის შეტაკებაში გადაიზარდა. არეულობის დროს სამართალდამცველებმა რამდენიმე ადამიანი დააკავეს. ისრაელის საკონსულოსთან პალესტინის მხარდამჭერი დემონსტრაცია ქალაქში დემოკრატიული პარტიის ყრილობის მეორე დღეს გაიმართა. პოლიციის განმარტებით, მასშტაბურ დემონსტრაციას დაახლოებით 50 ადამიანისგან შემდგარი ჯგუფი გამოეყო და სამართალდამცველებს დაუპირისპირდა.

აშშ-ში კაცმა შვილისთვის ალიმენტის გადახდის თავის არიდების მიზნით თავი გარდაცვლილად გამოაცხადა. CNN-ის ცნობით, კენტუკელმა კაცმა, ჰავაის გარდაცვლილთა რეესტრის მონაცემთა ბაზაში სხვა შტატში მცხოვრები ექიმის მონაცემებით მოახერხა შეღწევა და საკუთარი თავი გარდაცვლილად დაარეგისტრირა. ოფიციალური ინფორმაციით, ჯესი კიპფს შვილისთვის ალიმენტის გადახდა არ სურდა. კიფმა, სხვა ადამიანების პირადი მონაცემების გამოყენებით, სხვა შტატების გარდაცვლილთა რეესტრებში, კერძო ბიზნესისა და სამთავრობო ქსელებში შეღწევაც შეძლო და მოპოვებული მონაცემების გაყიდვას ცდილობდა. კაცს სასამართლომ 6 წლით პატიმრობა მიუსაჯა.