წინ გვაქვს ახალი წელი, შობა. ხვალ ჩემი დაბადების დღეც არის, საზეიმოდ გამოვეწყვე, მაგრამ საზეიმოდ გამოვეწყვე ძირითადად იმის გამო, რომ მივიღეთ ევროკავშირის კანდიდატის სტატუსი, იმის გამო, რომ საქართველოში ხალხმა ამჯერადაც გაიმარჯვა და ხალხმა შემდგომი გამარჯვებები უნდა მოიპოვოს, – ამის შესახებ მიხეილ სააკაშვილმა განაცხადა.
„ხომ გეუბნებოდით თავიდანვე, როცა ევროპის დროშა აღვმართე, ყველა დაგვცინოდა, მე ვამბობდი, რომ ჩვენ გვექნებოდა ასოცირების ხელშეკრულება. აღმოსავლეთ პარტნიორობის ერთ-ერთი შემქმნელი ვიყავი, ახლა დაბრუნდა სიკორსკი პოლონეთის საგარეო საქმეთა მინისტრად, ჩემი მეგობარი, ჩვენ ერთად ვქმნიდით აღმოსავლეთ პარტნიორობას. აღმოსავლეთ პარტნიორობამ დაუდო საფუძველი ასოცირების ხელშეკრულებას. მე ვთქვი, რომ იქნებოდა ასოცირების ხელშეკრულება და ზუსტად მოეწერა ხელი ჩემი პრეზიდენტობის დასრულებისას, ერთ თვეში. ვამბობდი, რომ იქნებოდა უვიზო მიმოსვლა, მივიღეთ ის 1-2 წელიწადში. ასოცირების ხელშეკრულებას რომ მოეწერა ხელი, უკვე აღარ ვიყავი პრეზიდენტი, მაგრამ მაშინ ევროპარლამენტმა მიმიწვია თავის სესიაზე. უკვე უკანონო სისხლის სამართლის საქმეები იყო ჩემზე აღძრული და ფეხზე ამდგარი ევროპარლამენტი მომესალმა მე. რაღაცნაირად სასიამოვნო იყო, რომ მათ მაინც არ დაივიწყეს ჩემი ღვაწლი. მე ვამბობდი, რომ იქნებოდა კანდიდატის სტატუსი და ჩვენ მივიღეთ კანდიდატის სტატუსი. ახლა ვამბობ, რომ ჩვენ აუცილებლად ვიქნებთ ევროკავშირის წევრები, ოღონდ მანამდე ჩვენ უნდა მოვიგოთ არჩევნები, ჩვენ, ქართველმა ხალხმა აუცილებლად გავიმარჯვოთ ამ არჩევნებზე. არ შეიძლება, ქართველი ხალხი იყოს დამცირებულ მდგომარეობაში, არ შეიძლება, ჩვენ ვიყოთ ერთი კაცის საკუთრება, საქართველო უნდა იყოს თქვენი სკაუთრება. ახლა მთავარი ტაქტიკა იქნება დაშინება, დაშინება, დაშინება. ამიტომ ნუ უჯერებთ იმას, ვინც იძახის, რომ ვაიმე, ესენი თუ არ იყვნენ, მაშინ ვინ, ესენი თუ არ იყვნენ რაღაც საშინელება დაიწყება – საშინელება კიარ დაიწყება, დაიწყება სწრაფი სვლა ევროპისკენ. ჩვენ არავის მივცემთ საშუალებას, რომ ამ გზიდან გადაგვიყვანოს და ევროპაც არავის მისცემს საშუალებას, რომ საქართველოს შიგნით ვინმემ ბოროტად გამოიყენოს ძალაუფლება, ეს იქნება სრულიად ახალი ეპოქა, ჩვენ ეს საცობი უნდა მოვიშოროთ, ეს არის საცობი, დაცობილი ჩვენი ევროკავშირის გზაზე და უნდა გავიდეთ ავტობანზე, ავტობანით შევიდეთ. მე გაძლევთ გარანტიას, რომ ოთხ წელიწადში, ხელისუფლების შეცვლის შემდეგ საქართველო იქნება ევროკავშირის სრულფასოვანი წევრი. მე არასდროს არაფერში მომიტყუებიხართ და არ გამიცრუებია თქვენი იმედი“, – განაცხადა მიხეილ სააკაშვილმა.
