დღე: ივლისი 31, 2024

„ჰეზბოლამ“ თავისი მეთაურის, ფუად შუქრის დაღუპვა დაადასტურა. ამის შესახებ დაჯგუფების მიერ გავრცელებულ განცხადებაშია აღნიშნული. ისრაელმა ბეირუთში იერიში გუშინ  განახორციელა. ისრაელის თავდაცვის ძალების ინფორმაციით, მათი სამიზნე იყო ფუად შუქრი, რომელიც გოლანის მაღლობზე განხორციელებულ თავდასხმას ხელმძღვანელობდა.

უკრაინელი სამხედრო ტყვე ოლექსანდრ იშჩენკო, რომელიც „აზოვის“ პოლკში მსახურობდა, დონის როსტოვის საგამოძიებო იზოლატორში გარდაიცვალა. „მედიაზონა“ იტყობინება, რომ ამის შესახებ 31 ივლისს გამოაცხადეს სამხრეთის საოლქო სამხედრო სასამართლოს სხდომაზე, რომელზეც 24 „აზოველის“ საქმე განიხილებოდა. 55 წლის იშჩენკო ორი მუხლით არის ბრალდებული – ტერორისტულ ორგანიზაციაში მონაწილეობისთვის და ხელისუფლების ძალის გამოყენებით ხელში ჩაგდების მცდელობისთვის. 2022 წლის თებერვალში ის ნებაყოფლობით შევიდა „აზოვის“ ტერიტორიულ დაცვაში და სამხედრო მძღოლად მსახურობდა. იმავე წლის გაზაფხულზე ის მარიუპოლში ტყვედ ჩაუვარდა რუსეთის სამხედროებს, შემდეგ კი კიდევ 23 უკრაინელთან ერთად იყო სისხლის სამართლის საქმის ფიგურანტი.    

უკრაინამ „ეფ-16“-ის ტიპის ავიაგამანადგურებლების პირველი ნაწილი მიიღო. ინფორმაციას „ბლუმბერგი“ ავრცელებს. მედიასაშუალება აღნიშნავს, რომ დასავლელი მოკავშირეები უკრაინას პირველი „ეფ-16“-ების ივლისის ბოლომდე მიწოდებას დაჰპირდნენ. როგორც გამოცემისთვის გახდა ცნობილი, მიწოდებული თვითმფრინავების რაოდენობა მცირეა. ამასთან, ჯერ დაუზუსტებელია, შეძლებენ თუ არა უკრაინელი მფრინავები, რომლებიც „ეფ-16“-ებისთვის მოამზადეს, აღნიშნული ავიაგამანადგურებლების სწრაფადვე გამოყენებას თუ ამას დამატებითი დრო დასჭირდება.

მოლდოვის პარლამენტში სამართალდამცველებმა ჩხრეკა ჩაატარეს. ადგილობრივი მედიის ცნობით, ოპერაცია შესაძლოა, რუსეთის სასარგებლოდ ჯაშუშობისა და სახელმწიფო ღალატის საქმეს უკავშირდებოდეს. გამოცემა NewsMaker-ის ინფორმაციით, ჩხრეკა პარლამენტის იურიდიული დეპარტამენტის ხელმძღვანელის, იოან კრიანგეს კაბინეტში ჩატარდა. წინა საღამოს ის 72 საათით დააკავეს. გავრცელებული ცნობებით, კრიანგე ხვდებოდა კიშინეუში რუსეთის საელჩოს თანამშრომელს და ფულადი ანაზღაურების სანცვლოდ მას ინფორმაციას აწვდიდა. მანამდე, ასევე დააკავეს სასაზღვრო პოლიციის თანამშრომელი, რომელიც ასევე ხვდებოდა რუსეთის საელჩოს იმავე თანამშრომელს და მას ინფორმაციას აწვდიდა.  

ამერიკის შეერთებული შტატები საქართველოს ხელისუფლებას 95 მილიონზე მეტი დოლარის დახმარებას უჩერებს. ამის შესახებ აშშ-ის სახელმწიფო მდივნის, ენტონი ბლინკენის განცხადებაშია საუბარი, რომელსაც ჟურნალისტი ალექს რაუფოღლუ X-ზე ავრცელებს.

აშშ-ის სახელმწიფო მდივანმა ენტონი ბლინკენმა განაცხადა, რომ ამერიკას „ჰამასის“ ლიდერის ისმაილ ჰანიეს მკვლელობასთან კავშირი არ აქვს. ბლინკენს ასევე ჰკითხეს, თუ რა გავლენა ექნება ჰანიეს მკვლელობას ისრაელსა და „ჰამასს“ შორის მიმდინარე ომზე. „მრავალი წლის გამოცდილებამ მასწავლა, რომ არასდროს არ ღირს ვარაუდების აგება იმის შესახებ, თუ რა გავლენას იქონიებს ერთი მოვლენა მეორეზე“, – უპასუხა მან. „ჰამასის“ ლიდერი თეირანში გვიან ღამით მოკლეს. ის ირანის დედაქალაქში ქვეყნის ახალი პრეზიდენტის მასუდ პეზეშკიანის ინაუგურაციაზე იყო ჩასული. წინასწარი ინფორმაციით, სახლს, სადაც ჰანიე იყო დაბინავებული, მართვადი რაკეტა მოხვდა.

უკრაინის პრეზიდენტმა ვოლოდიმირ ზელენსკიმ ხელი მოაწერა კანონს, რომელიც ქვეყნის მთავრობას უფლებას აძლევს 1 ოქტომბრამდე საგარეო ვალის გადახდა საჭიროების შემთხვევაში შეაჩეროს. ინფორმაცია უკრაინის უმაღლესი რადის ვებ-გვერდზეა გამოქვეყნებული. აღნიშნული კანონი უკრაინის პარლამენტმა 24 ივლისს მიიღო და პრეზიდენტს ხელმოსაწერად გადაუგზავნა. ზელენსკიმ მას ხელი დღეს მოაწერა და საკანონმდებლო ორგანოს უკან დაუბრუნა. აღსანიშნავია, რომ საერთაშორისო სარეიტინგო სააგენტო Fitch-მა 25 ივლისს უკრაინის რეიტინგი დეფოლტამდე, CC-დან C დონემდე დაწია. დღეის მდგომარეობით, უკრაინის საერთო საგარეო ვალი 151 მილიარდ დოლარს აღემატება.

გერმანიის საგარეო საქმეთა მინისტრი ანალენა ბერბოკი ევროკავშირს მოუწოდებს უსაფრთხოების გაძლიერებაში მეტი ინვესტიცია ჩადოს. მისი თქმით, თავდაცვისუნარიანობა თავად გერმანიამაც უნდა გააძლიეროს. ანალენა ბერბოკი ფიქრობს, რომ უკრაინისთვის სამხედრო დახმარების შეჩერების შემთხვევაში, ევროპის უსაფრთხოება რისკის ქვეშ აღმოჩნდება. გერმანიის საგარეო საქმეთა მინისტრის თქმით, ევროპამ არ უნდა დაუშვას, რომ რუსი სამხედროები გერმანიის ან პოლონეთის საზღვარს მიუახლოვდნენ.

,,სიონისტური ბარბაროსობა კვლავ ვერ მიაღწევს თავის მიზნებს”, – ამის შესახებ თურქეთის პრეზიდენტმა, რეჯეფ თაიფ ერდოღანმა, „ჰამასის“ ლიდერის, ისმაილ ჰანიეს მკვლელობასთან დაკავშირებით განაცხადა. მისი თქმით, ეს იყო პალესტინის საქმის, ღაზის წინააღმდეგობის და პალესტინელების კანონიერი ბრძოლის შელახვის საზიზღარი მცდელობა, რომლის მიზანია მათი დემორალიზება, დაშინება და ჩახშობა. ერდოღანმა ხაზგასმით აღნიშნა, რომ ეს მკვლელობა ეხმიანება წინა თავდასხმებს პალესტინელ ფიგურებზე, როგორიცაა შეიხ აჰმედ იასინი და აბდულ აზიზ ალ-რანტისი. თურქეთის პრეზიდენტმა ისლამურ სამყაროს ღაზას სექტორში ჩაგვრის შეწყვეტისთვის ერთიანი პოზიციისკენ მოუწოდა და კიდევ ერთხელ დაადასტურა თურქეთის ვალდებულება, მხარი დაუჭიროს სუვერენული პალესტინის სახელმწიფოს შექმნას აღმოსავლეთ იერუსალიმში დედაქალაქით.

,,ირანი თავის მოვალეობად მიიჩნევს შური იძიოს ,,ჰამასის” პოლიტიკური ლიდერის ისმაილ ჰანიეს მკვლელობის გამო, რადგან ის ირანის მიწაზე მოკლეს”, – განაცხადა ირანის სულიერმა ლიდერმა, აიათოლა ალი ხამენეიმ. ,,თქვენ მოკალით ჩვენი ძვირფასი სტუმარი ჩვენს სახლში და ახლა გზა გაუხსენით მკაცრ სასჯელს”, – თქვა მან და მხედველობაში ჰქონდა ისრაელი. ირანის ახალმა პრეზიდენტმა პატივი მიაგო ისმაილ ჰანიეს ხსოვნას და მას ,,პალესტინის წინააღმდეგობის მამაცი ლიდერი” უწოდა. ,,ირანისა და პალესტინის ორ ამაყ ერს შორის კავშირი უფრო ძლიერი იქნება, ვიდრე ადრე და წინააღმდეგობისა და ჩაგრულთა დაცვის გზას გაუყვება უფრო მტკიცედ, ვიდრე ოდესმე”, – თქვა მასუდ ფეზეშქიანმა.  

„ალ მაიადინი“-ის ინფორმაციით, რაკეტა, რომლითაც თეირანში ის რეზიდენცია დაიბომბა, რომელშიც „ჰამასის“ ლიდერი ისმაილ ჰანიე იმყოფებოდა, სხვა სახელმწიფოდან იყო გაშვებული. ირანული წყაროს თქმით, რაკეტა „არა თვით ირანის ტერიტორიიდან“, არამედ „სხვა სახელმწიფოდან“ იყო გასროლილი. პარალელურად, ირანული მედია წერს, რომ ისმაილ ჰანიეზე თავდასხმა საჰაერო მართვადი ჭურვის გამოყენებით მოხდა. ისმაილ ჰანიეს საცხოვრებელი რეზიდენცია ირანის დროით, შუაღამის 02:00 საათზე დაიბომბა. ირანის პრეზიდენტის ინაუგურაციის შემდეგ, ისმაილ ჰანიე ჩრდილოეთ თეირანში ვეტერანთა ერთ-ერთ რეზიდენციაში იმყოფებოდა.

Politico-ს ცნობით, ევროკავშირმა ვენესუელაში ჩატარებული საპრეზიდენტო არჩევნების შესახებ ერთობლივი განცხადების მიღება ვერ შეძლო, რადგან უნგრეთმა ის დაბლოკა. კერძოდ, ევროკავშირის წევრ ქვეყნებს სურდათ ისეთი განცხადების მიღება, რომელშიც ვენესუელაში ჩატარებულ არჩევნებს დაგმობდნენ, თუმცა ოფიციალური ბუდაპეშტის პოზიციამ ამაში მათ ხელი შეუშალა. ამის გამო ევროკომისარს საგარეო საკითხებში ჟოზეპ ბორელს განცხადების გავრცელება მხოლოდ საკუთარი სახელით მოუწია. ბორელის განცხადებაში წერია, რომ „ადგილობრივი და საერთაშორისო დამკვირვებლების სანდო ანგარიშები მიუთითებენ იმაზე, რომ არჩევნები მრავალი უზუსტობებითა და დარღვევებით ჩატარდა. ვენესუელაში საპრეზიდენტო არჩევნები 28 ივლისს ჩატარდა. მასში გამარჯვებულად მოქმედი პრეზიდენტი ნიკოლას მადურო გამოცხადდა. როგორც ვენესუელის ეროვნული ცენტრალური საარჩევნო კომისია იტყობინება,…