დანიის ელჩმა სავარაუდოდ ვერ შეძლო საკუთარი აზრის ისე წარმოსახვა, რომ მას სხვადასხვა კონტექსტი არ ჰქონოდა, – ამის შესახებ საქართველოს პარლამენტის თავმჯდომარე შალვა პაპუაშვილმა განაცხადა.
მისი თქმით, დასანანია, რომ დიპლომატების არაკომპეტენტურობა, საბოლოო ჯამში, ქართული საზოგადოების თვალში წარმოდგენილი ქვეყნის იმიჯის შელახვას იწვევს ხოლმე.
„ევროკავშირის ბოლო რეკომენდაციიდან გამომდინარე, დეზინფორმაციასთან ბრძოლა არის მნიშვნელოვანი საკითხი. ნებისმიერ დეზინფორმაციაზე მნიშვნელოვანია რეაგირება. გუშინ ვნახეთ დანიის საელჩოს განცხადება, რომელმაც, როგორც ჩანს, მთელი გარემოება ახსნა ელჩის არაკომპეტენტურობით, იმით, რომ ელჩმა ვერ მოახდინა საკუთარი აზრის ისე ფორმულირება, რომ სწორად გაგებულიყო. არაკომპეტენტურობა თუ არის, რომ ელჩი კონტექსტებში ვერ სვამს საკუთარ სტატიებს, ჩავთვალოთ, რომ ეს არის არაკომპეტენტურობა.
სამწუხარო და დასანანია, რომ დიპლომატების არაკომპეტენტურობა, საბოლოო ჯამში, ქართული საზოგადოების თვალში წარმოდგენილი ქვეყნის იმიჯის შელახვას იწვევს ხოლმე. რაც შეეხება ჩემს განცხადებას ელჩის არაკომპეტენტურობასთან დაკავშირებით, იმედი მაქვს, დანიის საელჩო ჩემს განცხადებასაც შესაბამისი კონტექსტით გაიგებს.
დანიის საელჩომ თქვა, რომ ელჩის ოპედი არ იქნა გაგებული სწორად, კონტექსტიდან ამოგლეჯილი იყო. ელჩმა სავარაუდოდ ვერ შეძლო საკუთარი აზრის ისე კომპეტენტურად წარმოსახვა, რომ სხვადასხვა კონტექსტი ან განმარტება არ ჰქონოდა. როდესაც განცხადება კეთდება, რომ კონტექსტის არასწორად გაგება მოხდა, ჩანს, რომ ელჩი საკმარისად კომპეტენტური არ იყო, საკუთარი აზრი ისე ჩამოეყალიბებინა, რომ სხვადასხვაგვარი ინტერპრეტაცია არ მომხდარიყო“, – განაცხადა შალვა პაპუაშვილმა.
