დღე: ოქტომბერი 14, 2024

დონალდ ტრამპის მკვლელობის მესამე მცდელობა. ამ ვერსიას განიხილავს მსოფლიო მედია, მას შემდეგ რაც კალიფორნიაში რესპუბლიკელების პრეზიდენტობის კანდიდატის წინასაარჩევნო შეხვედრაზე 49 წლის მამაკაცი ყალბი მოსაწვევით მივდა. ლას ვეგასელ ვემ მილერს, ავტომობილში გადატენილი სანადირო იარაღი, პისტოლეტი, საბრძოლო მასალა და გაყალბებული დოკუმენტები- პასპორტები და მართვის მოწმობები ჰქონდა. ეპიზოდს, რომელსაც ახლა ამერიკის შეერთებული შტატების სახელმწიფო უსაფრთხოების სამსახური და რივერსაიდის შერიფის ოფისი სწავლობს, რესპუბლიკელების საპრეზიდენტო კანდიდატზე სავარაუდო მკვლელობის მესამე მცდელობაა. ტრამპზე თავდასხმის კიდევ ერთი წარუმატებელი შემთხვევა 15 სექტემბერს ფლორიდაში მაშინ მოხდა, როდესაც პრეზიდენტობის კანდიდატი გოლფკლუბში თამაშობდა, სამართალდამცავებმა მიმდებარე ტერიტორიაზე კალაშნიკოვით შეიარაღებული მამაკაცი დააკავეს.

მოლდოვის დესტაბილიზაციის მიზნით ჩადენილ ქმედებებთან დაკავშირებით ევროკავშირმა მოლდოვის ავტონომიური რეგიონის, გაგაუზიის ლიდერს სანქციები დაუწესა. ამის შესახებ ინფორმაციას ევროკავშირის საბჭოს პრესსამსახური ავრცელებს. პრესსამსახურის ცნობით, გაგაუზიის ლიდერი, ევგენია გუცული „რეგიონში სეპარატიზმის ხელშეწყობაზეა პასუხისმგებელი, ცდილობს დაამხოს კონსტიტუციური წესრიგი და მოლდოვის სუვერენიტეტსა და დამოუკიდებლობას საფრთხეს უქმნის“. ევროკავშირმა სანქციები რუსეთში რეგისტრირებულ არასამთავრობო ასოციაცია „ევრაზიას“ და მის დამფუძნებელ, ნელი პარუტენკოსაც დაუწესა, „რომლის მიზანიც საზღვარგარეთ რუსეთის ინტერესების გავრცელებაა, მათ შორის მოლდოვაში“. სანქციები მათი აქტივების გაყინვას, ევროკავშირში შესვლის აკრძალვასა და მათთვის სხვა სახის ეკონომიკური რესურსების გადაცემის აკრძალვას ითვალისწინებს.

“თუ ვლადიმერ პუტინი „დიდი ოცეულის“ სამიტს დაესწრება, იმედი მაქვს, რომ ბრაზილია მას დააკავებს “- ამის შესახებ უკრაინის გენერალურმა პროკურორმა, ანდრეი კოსტინმა განაცხადა. „იმ ინფორმაციიდან გამომდინარე, რომ პუტინი შესაძლოა ბრაზილიაში, „დიდი ოცეულის“ სამიტს დაესწროს, მსურს გავიმეორო, რომ ბრაზილიის ხელისუფლების, როგორც რომის სტატუტის მხარის ვალდებულებაა, იგი დააკავოს, თუ ჩასვლას გაბედავს“ – განაცხადა ანდრეი კოსტინმა. უკრაინის გენერალურმა პროკურორმა აღნიშნა, რომ ვლადიმერ პუტინისთვის პასუხისმგებლობის დაკისრებისას საერთაშორისო საზოგადოება ერთიანი უნდა იყოს.  

თეირანის მიერ რუსეთისთვის რაკეტებისა და უპილოტო საფრენი აპარატების მიწოდებასთან დაკავშირებით ევროკავშირის საბჭომ ირანის შვიდი მოქალაქისა  და შვიდი ორგანიზაციის მიმართ სანქციები დააწესა. ამის შესახებ ევროკავშირის საბჭოს  დადგენილებაშია ნათქვამი. როგორც დადგენილებაშია აღნიშნული, ევროკავშირის ე.წ. შავ სიაში მოხვდნენ, ისინი ვინც  პასუხისმგებელნი არიან რუსეთისთვის ტექნოლოგიების გადაცემაზე. ასევე ის ადამიანები, რომლებიც შეიარაღებას აწვდიდნენ იმ ჯგუფებსა და ორგანიზაციებს, რომლებიც ახლო აღმოსავლეთსა და წითელი ზღვის რეგიონში მშვიდობასა და უსაფრთხოებას უთხრიან ძირს. სიაში შედის ირანის თავდაცვის მინისტრის მოადგილე და სამი ირანული ავიაკომპანია. სანქციები დაუწესდა ასევე ორ კომპანიას, რომლებიც რაკეტების გაშვებისთვის საჭირო საწვავს აწარმოებენ.

გერმანიის ფედერალური სადაზვერვო სამსახურის ხელმძღვანელი ბრუნო კალი მიიჩნევს, რომ რუსეთს ნატო-ს ტერიტორიაზე თავდასხმა მომდევნო ექვსი წლის განმავლობაში შეეძლება. როგორც ბრუნო კალი გერმანულ მედიასთან საუბარში აცხადებს, ის რუსეთის მხრიდან მომდინარე პირდაპირ სამხედრო საფრთხეს ხედავს. „ამ ათწლეულის ბოლომდე რუსეთის ჯარებს ნატო-ზე თავდასხმის უნარი ექნებათ. კრემლი გერმანიის ფედერაციულ რესპუბლიკას მტრად განიხილავს. ჩვენ პირდაპირ კონფლიქტში ვართ რუსეთთან“- განაცხადა კალმა ბუნდესტაგის საპარლამენტო კონტროლის კომიტეტის მოსმენაზე.  

“შიდა მტერი უფრო სახიფათოა, ვიდრე ჩინეთი და რუსეთი”- ამის შესახებ აშშ-ის პრეზიდენტობის კანდიდატმა, დონალდ ტრამპმა განაცხადა. ტრამპმა ამერიკელებს, რომლებიც მას ეწინააღმდეგებიან, „რადიკალი მემარცხენე გიჟები“ და „შიდა მტრები“ უწოდა. „ყოველთვის ვამბობ, რომ ჩვენ ორი მტერი გვყავს. ჩვენ გვყავს გარე მტერი და შემდეგ გვყავს მტერი შიგნიდან. ჩემი აზრით, შიდა მტერი უფრო საშიშია, ვიდრე ჩინეთი, რუსეთი და ყველა ეს ქვეყანა. ყველაზე ძნელი საქმეა ამ გიჟებთან გამკლავება, როგორიცაა ადამ შიფი“, – განაცხადა დონალდ ტრამპმა.

პოლიციის მიერ იდენტიფიცირებული მამაკაცი, რომელიც კალიფორნიის შტატის ქალაქ კოაჩელაში, დონალდ ტრამპის მხარდამჭერებთან შეხვედრაზე დააკავეს, 49 წლის ვემ მილერია. მედიის ცნობით, ის კალიფორნიაში, ლას ვეგასში ცხოვრობს. მილერი ადგილობრივი დროით 17:00 საათზე დააკავეს, ხოლო შემდეგ, როგორც „ბიბისი“ წერს, 5000-დოლარიანი გირაოს სანაცვლოდ გაათავისუფლეს. „ინციდენტს გავლენა არ ჰქონია ყოფილი პრეზიდენტის, დონალდ ტრამპისა და ღონისძიების დამსწრეთა უსაფრთხოებაზე“, – აღნიშნულია პოლიციის განცხადებაში. რივერსაიდის ოლქის შერიფის ოფისის თქმით, ინციდენტის შესახებ მოგვიანებით პრესკონფერენციას გამართავენ. შეიარაღებული მამაკაცი კალიფორნიის შტატის ქალაქ კოაჩელაში, აშშ-ის პრეზიდენტობის კანდიდატის, დონალდ ტრამპის მხარდამჭერებთან შეხვედრაზე, ტერიტორიის შესასვლელთან დააკავეს. როგორც მედია პოლიციაზე დაყრდნობით იტყობინება, მამაკაცს იარაღი და…

ლიეტუვის საპარლამენტო არჩევნების პირველ ტურში ოპოზიცია ლიდერობს. წინასწარი შედეგებით, სოციალ-დემოკრატებმა ამომრჩეველთა ხმების 19,4% პროცენტი მოიპოვეს. მეორე ადგილზეა მოქმედი პრემიერ-მინისტრის, იგრიდა შიმონიტეს კონსერვატიული „სამშობლოს კავშირი“ (18%), მესამე პოზიციას კი პოპულისტური პარტია „ნემუნო აუშრა“ (15%) იკავებს. საპარლამენტო არჩევნების პირველი ტური ლიეტუვაში გუშინ გაიმართა. ქვეყნის მოსახლეობამ, პროპორციული წარმომადგენლობის საფუძველზე, სეიმის 70 წევრი აირჩია. არჩევნების მეორე ტური 27 ოქტომბერს ჩატარდება.

აშშ-ის პრეზიდენტმა, ჯო ბაიდენმა განაცხადა, რომ შეერთებული შტატები მზად არის რუსეთთან, ჩინეთთან და ჩრდილოეთ კორეასთან მოლაპარაკებებისთვის ბირთვული საფრთხის შემცირების მიზნით. ამის შესახებ აღნიშნულია აშშ-ის პრეზიდენტის ნობელის მშვიდობის პრემიის გამარჯვებულისადმი გავრცელებულ განცხადებაში. 2024 წლის ნობელის მშვიდობის პრემია მიენიჭა იაპონურ ორგანიზაციას Nihon Hidankyo, რომელიც აერთიანებს ბირთვული დაბომბვის შედეგად გადარჩენილებს და რომლის ძალისხმევა მიმართულია ბირთვული იარაღისგან თავისუფალი სამყაროს შექმნისკენ. ბაიდენმა აღნიშნა, რომ აუცილებელია წინსვლის გაგრძელება რომ მსოფლიოს საბოლოოდ და სამუდამოდ გათავისუფლდეს ბირთვული იარაღისგან. ამიტომ, მისი თქმით, შეერთებული შტატები მზადაა რუსეთთან, ჩინეთთან და ჩრდილოეთ კორეასთან მოლაპარაკებებისთვის „წინაპირობების გარეშე“ ბირთვული საფრთხის შემცირების მიზნით. „არც ჩვენი…

ევროპისა და კლიმატის საკითხებში გერმანიის საგარეო საქმეთა მინისტრის მოადგილის, ანა ლიურმანის განაცხადებით, ლუქსემბურგში ევროკავშირის საგარეო საქმეთა მინისტერიალზე განხილული იქნება საქართველოში არსებული ვითარება. მისი თქმით, საქართველოს დღევანდელი მთავრობა დაბრკოლებებს ქმნის ევროკავშირის გზაზე. „სრულიად ნათელია, რომ ჩვენ მხარს ვუჭერთ საქართველოს ევროკავშირში გაწევრიანების გზაზე, თუმცა ეს არ ეხება საქართველოს ამჟამინდელ მთავრობას, რომელიც დაბრკოლებებს უქმნის ევროკავშირისკენ ამ გზას. მნიშვნელოვანია, რომ ქართველ ხალხს ჰქონდეს უფლება, თავისუფლად გადაწყვიტოს საკუთარი გზა. ამიტომ არჩევნების თავისუფლად და სამართლიანად ჩატარება მართლაც მნიშვნელოვანი საკითხია“, – განაცხადა ანა ლიურმანმა.