დონალდ ტრამპი პრეზიდენტად არჩევის შემთხვევაში, განიხილავს გეგმას შეაჩეროს აშშ-ის სამხედრო დახმარება უკრაინაში, თუ ის არ დაიწყებს სამშვიდობო მოლაპარაკებებს რუსეთთან. Reuters-ის ცნობით, ორმა მრჩეველმა ტრამპს უკრაინის ომის დასრულების გეგმა წარუდგინა, რომლითაც ტრამპმა აშშ-ის საპრეზიდენტო არჩევნებში გამარჯვების შემთხვევაში უნდა იმოქმედოს.
ამავე გეგმით, აშშ გააფრთხილებს მოსკოვს, რომ კიევთან მოლაპარაკებაზე ნებისმიერი უარი გამოიწვევს უკრაინისადმი ამერიკული სამხედრო მხარდაჭერის გაზრდას – განაცხადა ტრამპის ერთ-ერთმა მრჩეველმა ეროვნული უსაფრთხოების საკითხებში, გადამდგარმა გენერალ-ლეიტენანტმა კეიტ კელოგიმ სააგენტოსთან ინტერვიუში.
გეგმის ავტორები სწორედ კელოგი და ფრედ ფლეიტცი არიან, რომლებიც აშშ-ს ეროვნული უშიშროების საბჭოს შტაბს ხელმძღვანელობდნენ ტრამპის პრეზიდენტობის დროს 2017- 2021 წლებში.
ფლეიტცის თქმით, სტრატეგია ტრამპმა მოიწონა: ,,მე არ ვამბობ, რომ ის დაეთანხმა ყველა სიტყვას, მაგრამ ჩვენ მოხარული ვართ, რომ მივიღეთ ეს პასუხი”, – თქვა მან.
შეგახსენებთ, რესპუბლიკური პარტიის საპრეზიდენტო კანდიდატმა არაერთხელ განაცხადა, რომ ნოემბრის არჩევნებში გამარჯვების შემთხვევაში უკრაინის ომს ,,24 საათში დაასრულებს”, თუმცა როგორ, არ დაუკონკრეტებია.
