ისრაელის პრემიერ-მინისტრი ბენიამინ ნეთანიაჰუ ლიბანელ მშვიდობიან მოსახლეობას ევაკუაციისკენ მოუწოდებს. ქვეყნის პრემიერი ლიბანელ ხალხს მოუწოდებს, სერიოზულად მოეკიდონ ისრაელის გაფრთხილებას და აცხადებს, რომ ბრძოლების დასრულების შემდეგ, ისინი შეძლებენ სახლში დაბრუნებას.
„ისრაელის ომი თქვენს წინააღმდეგ არ არის. ეს ომი „ჰეზბოლას“ წინააღმდეგაა. დიდი ხნის განმავლობაში „ჰეზბოლა“ თქვენ ცოცხალ ფარად გიყენებდათ. ჩვენი ხალხის დასაცავად „ჰეზბოლას“ დარტყმებისგან ჩვენ უნდა გავანადგუროთ მათი იარაღი. დილიდან ისრაელის თავდაცვის ძალებმა გაგაფრთხილათ, რომ დაგეტოვებინათ საფრთხის ზონა. მოგიწოდებთ, სერიოზულად მოეკიდეთ ამ გაფრთხილებას. ნუ მისცემთ „ჰეზბოლას“ საშუალებას, საფრთხეში ჩააგდოს თქვენი და თქვენი საყვარელი ადამიანების სიცოცხლე. ნუ მისცემთ „ჰეზბოლას“ საშუალებას, საფრთხეში ჩააგდოს ლიბანი. გთხოვთ, ახლავე დატოვეთ საფრთხის ზონა. როგორც კი ჩვენი ოპერაცია დასრულდება, თქვენ უსაფრთხოდ შეძლებთ სახლებში დაბრუნებას“-აცხადებს ნეთანიაჰუ ვიდეომიმართვაში.
