დღე: სექტემბერი 22, 2024

გაერო-ს გენერალური მდივანის ანტონიო გუტერეშის განცხადებით, შეშფოთებულია იმის გამო, რომ ლიბანში ვითარება შეიძლება გადაიზარდოს სამხედრო კონფლიქტში, რომელიც მასშტაბით ისრაელსა და „ჰამასს“ შორის მიმდინარე ომის მსგავსი იქნება. „ფაქტი, რომ ეს მოვლენები მოხდა, ნიშნავს, რომ არსებობს გაცილებით ძლიერი ესკალაციის პოტენციალი. და სწორედ ეს მაშფოთებს – შესაძლებლობა, რომ ლიბანი გადაიქცეს კიდევ ერთ ღაზად, რაც, ჩემი აზრით, დამანგრეველი ტრაგედია იქნება მსოფლიოსთვის“, – განაცხადა ანტონიო გუტერეშმა. გუტერეშმა ასევე გამოხატა პესიმიზმი ღაზაში ცეცხლის შეწყვეტის შესახებ მიმდინარე მოლაპარაკებების მიმართ.

გერმანიის საგარეო საქმეთა მინისტრმა ანნალენა ბერბოკმა პირობა დადო, რომ მთავრობა გააგრძელებს უკრაინის სამხედრო დახმარებას რუსეთის წინააღმდეგ ომში. ამის შესახებ გერმანიის საგარეო საქმეთა სამინისტროს ხელმძღვანელმა და “მწვანეთა პარტიის” ერთ-ერთმა ლიდერმა მისი პარტიის წინასაარჩევნო ღონისძიებაზე ისაუბრა. “ჩვენ გავაგრძელებთ უკრაინის მხარდაჭერას იქამდე, სანამ ტერორისტული ომი გაგრძელდება. რადგან წინააღმდეგ შემთხვევაში ეს იქნება უკრაინის დასასრული” – აღნიშნა ბაერბოკმა.

ისრაელის თავდაცვის მინისტრის, იოავ გალანტის განცხადებით, ისრაელის დარტყმები ლიბანზე გაგრძელდება იქამდე, ვიდრე ქვეყნის ჩრდილოეთიდან ევაკუირებული ხალხის დაბრუნება უსაფრთხო არ იქნება. „ჰეზბოლამ“ დაიწყო ისრაელის თავდაცვის ძალების ზოგიერთი შესაძლებლობების შეგრძნება და ჩვენ ვხედავთ შედეგებს. ეს მოძრაობები გაგრძელდება მანამ, სანამ არ მივაღწევთ სიტუაციას, როდესაც უსაფრთხოდ დავაბრუნებთ ჩრდილოეთის მცხოვრებლებს საკუთარ სახლებში. ეს არის მიზანი, ეს არის მისია და ჩვენ ყველაფერს გავაკეთებთ, რომ შევასრულოთ ის“, – აღნიშნა გალანტმა.

ისრაელის პრემიერ-მინისტრის, ბენიამინ ნეთანიაჰუს განცხადებით, „ჰეზბოლა“ ისრაელისგან შეტყობინებას მიიღებს. „ბოლო რამდენიმე დღის განმავლობაში ჩვენ „ჰეზბოლას“ ისეთი დარტყმები მივაყენეთ, რასაც ვერ წარმოიდგენდა“ – აღნიშნა ნეთანიაჰუმ. როგორც ქვეყნის პრემიერი აცხადებს, ისრაელს მტკიცედ აქვს გადაწყვეტილი, ჩრდილოეთ ნაწილის დევნილი მოსახლეობა უსაფრთხოდ დააბრუნოს საკუთარ სახლებში. „თუ „ჰეზბოლას“ ჯერ არ გაუგია შეტყობინება, გპირდებით, ის გაიგებს შეტყობინებას. მოწოდებული ვართ, რომ ჩვენი [ჩრდილოელი დევნილი] მაცხოვრებლები უსაფრთხოდ დავაბრუნოთ საკუთარ სახლებში. ვერცერთი ქვეყანა ვერ მოითმენს სარაკეტო ცეცხლს მისი მოსახლეობის წინააღმდეგ, სარაკეტო ცეცხლს მისი ქალაქების წინააღმდეგ. ამას ვერც ისრაელის სახელმწიფო მოითმენს“- აღნიშნა მან.

ისრაელის პრეზიდენტი ისააკ ჰერცოგი აცხადებს, რომ ისრაელს არ სურს ომი ლიბანთან. ამის შესახებ განცხადება ჰერცოგმა „სქაი ნიუსთან“ ინტერვიუში გააკეთა. ჰერცოგი აცხადებს, რომ ისრაელს არ სურს ომი ლიბანთან და ამბობს, რომ კონფლიქტი პროვოცირებულია ირანის მოკავშირეების მიერ რეგიონში, მათ შორის „ჰეზბოლას“ და იემენელი ჰუსიტების, ასევე ღაზაში მოქმედი „ჰამასის“ მიერ. „ისრაელი იბრძვის საკუთარი კეთილდღეობისთვის, არსებობისთვის, თავისი მოქალაქეებისთვის. ეს არის ის, რასაც ჩვენ ვაკეთებთ. და ჩვენ ვაკეთებთ ყველაფერს, რაც სწორია“ – განაცხადა ისრაელის პრეზიდენტმა

უკრაინაში, ქალაქ ხარკოვში მრავალსართულიან საცხოვრებელ კორპუსზე რუსეთის თავდასხმის შედეგად 21 ადამიანი დაშავდა, მათ შორის არასრულწლოვნებიც.  ინფორმაციას ოლქის გუბერნატორი ოლეგ სინეგუბოვი ავრცელებს. შენობიდან 60-ზე მეტი ადამიანის ევაკუაცია განხორციელდა. დაჭრილები საავადმყოფოში გადაიყვანეს. ქალაქის მერის იგორ ტერეხოვის განცხადებით, ადგილზე, ამ დრომდე მიმდინარეობს სამაშველო სამუშაოები. ოლეგ სინეგუბოვის ინფორმაციით, რუსეთმა შენობას FAB-250 საჰაერო ბომბით 21 სექტემბერს შეუტია. მანვე დაადასტურა, რომ ქალაქში ორი ცალკეული დარტყმა მოხდა. შეტაკების შემდეგ სულ მცირე ოთხ მანქანას ცეცხლი გაუჩნდა და კიდევ 20 დაზიანდა.

უკრაინის საჰაერო თავდაცვის ძალებმა 22 სექტემბრის ღამეს 71 უპილოტო საფრენი აპარატი ჩამოაგდეს და კიდევ ექვსი დრონი რადიოელექტრონული ბრძოლით დაპირისპირების შედეგად ლოკაციურად დაიკარგა. ინფორმაციას უკრაინული მედია ქვეყნის შეიარაღებული ძალების საჰაერო ძალებზე დაყრდნობით ავრცელებს. საჰაერო ძალების ცნობით, რუსულმა ძალებმა ლუგანსკის ოლქის საჰაერო სივრციდან „ხ-59/69“ ტიპის ორი მართვადი რაკეტა გაუშვეს, Shahed-ის ტიპის 80 დრონით კი უკრაინის ტერიტორია რუსეთის ქალაქ იეისკიდან და კურსკის ოლქიდან შეუტიეს.      

კამალა ჰარისმა მიიღო CNN-ის მოწვევა, მონაწილეობა მიიღოს დონალდ ტრამპთან მორიგ დებატში, 23 ოქტომბერს. ამის შესახებ აშშ-ის „დემოკრატიული პარტიის“ საპრეზიდენტო კანდიდატის, კამალა ჰარისის საარჩევნო შტაბმა განაცხადა. „დონალდ ტრამპს პრობლემა არ უნდა ჰქონდეს დაეთანხმოს ამ დებატებს. ეს არის იგივე ფორმატი და წყობა, როგორც CNN-ის დებატები, რომელშიც ივნისში მონაწილეობა მიიღო და განაცხადა, რომ გაიმარჯვა და შეაქო CNN-ის მოდერატორები, წესები და რეიტინგები“,- განაცხადა ჰარისის საარჩევნო შტაბის ხელმძღვანელმა, ჯენ ო’მალი დილონმა. რაზეც, „რესპუბლიკელების“ საპრეზიდენტო კანდიდატმა, დონალდ ტრამპმა  განცხადა, რომ „უკვე გვიანაა“. „მან მონაწილეობა მიიღო ერთ დებატებში, მე – ორში. ძალიან გვიანია კიდევ ერთი, სიამოვნებით მივიღებდი მონაწილეობას,…