დღე: აგვისტო 9, 2024

უკრაინის შეიარაღებული ძალების გენშტაბში დაადასტურეს, რომ ლიპეცკის სამხედრო აეროდრომზე დარტყმა მიიტანეს. მათივე ინფორმაციით, განადგურებულია სამხედრო საწყობები, სადაც რუსეთი საავიაციო ბომბებს ინახავდა. აღნიშნულ აეროდრომზე რუსეთს დისლოცირებული ჰყავს თვითმფრინავები სუ-34, სუ-35 და მიგ-31. დაზიანდა თუ არა ეს ტექნიკა უკრაინელთა შეტევის შედეგად, ჯერ უცნობია. უკრაინელების დარტყმის შემდეგ ძლიერი აფეთქება მოხდა, რომელიც ჯაჭვურმა დეტონაციამ გამოიწვია, რასაც მოჰყვა მასშტაბური ხანძარი. ადგილობრივმა ხელისუფლებამ დეტონაციის ფაქტი დაადასტურა და ახლომდებარე დასახლებული პუნქტებიდან მოქალაქეთა ევაკუაცია დაიწყო.    

იტალიის პრემიერ-მინისტრმა, ჯორჯია მელონიმ ახლო აღმოსავლეთში მიმდინარე მოვლენებთან დაკავშირებით ირანის პრეზიდენტთან, მასუდ ფეზეშქიანთან სატელეფონო საუბარი გამართა და რეგიონში ესკალაციის თავიდან აცილებისკენ მოუწოდა. საუბრისას იტალიის პრემიერ-მინისტრმა „ხაზი გაუსვა ღაზაში მიმდინარე კონფლიქტის გავრცელების თავიდან აცილების აუცილებლობას, მათ შორის, ლიბანთან დაკავშირებით, მოუწოდა თავის კოლეგას, თავიდან აიცილოს შემდგომი ესკალაცია და გახსნას გზა დიალოგისკენ“. ამის შესახებ განცხადებას იტალიის პრემიერ-მინისტრის ოფისი ავრცელებს.

რუსეთის კურსკის ოლქში მიმდინარე ბრძოლებს უკრაინის ერთ-ერთი ყველაზე კარგად აღჭურვილი და ყველაზე სწრაფი სამხედრო ნაწილი შეუერთდა. ამის შესახებ ინფორმაციას Forbes-ი ავრცელებს. „ვიდეოზე, რომელიც სოციალურ მედიაში გავრცელდა, ასახულია T-64BV ან T-80BV ტანკი, UR-77 გამნაღმველი მანქანა, IMR-2 საინჟინრო მანქანა, BTR-80 და ამერიკული წარმოების Stryker-ის ჯავშანტრანსპორტიორები. კონტექსტიდან ირკვევა, რომ ვიდეო ასახავს რუსეთის პოზიციებზე უკრაინის სერიოზული შეტევის პირველ მომენტებს“ – წერს Forbes-ი. Forbes-ი ხაზს უსვამს, უკრაინის ამჟამინდელი ოპერაცია სამხრეთ რუსეთში მანამდე განხორციელებული რეიდებისგან განსხვავდება. ”ყოველ საათში უფრო ცხადი ხდება, რომ ის, რაც კურსკში ხდება, არ არის რეიდი: ეს ნამდვილად შეჭრაა” – ნათქვამია სტატიაში.  

ამერიკის შეერთებული შტატების საპრეზიდენტო კანდიდატების, კამალა ჰარისისა და დონალდ ტრამპის დებატები 10 სექტემბერს, ABC-ის ეთერში გაიმართება. აღნიშნულ შეთანხმებამდე, ტრამპმა ჰარისთან დებატების სამჯერ გამართვის მზადყოფნა გამოთქვა. პრეზიდენტობის კანდიდატების შეთანხმების შემთხვევაში, დებატები აშშ-ის მთავარი ტელევიზიების ეთერში უნდა გამართულიყო: 4 სექტემბერს – Fox News-ზე, 10 სექტემბერს NBC-ზე, 24 სექტემბერს კი ABC-ზე.