„ჩვენ ქართველი ხალხი არ მიგვიტოვებია, პირიქით, მაგრამ მთავრობის პოლიტიკის კურსთან დაკავშირებით ჩვენ რეალური პრობლემა გვაქვს“ – ამის შესახებ ევროკომისიის გენერალურმა დირექტორმა სამეზობლოსა და გაფართოების შესახებ მოლაპარაკების საკითხებში, გერტ იან კოოპმანმა დღეს ევროპარლამენტში, საგარეო საქმეთა კომიტეტის შეხვედრაზე განაცხადა.
კოოპმანი ამბობს, რომ მთავრობის პოლიტიკა ევროკავშირის ღირებულებებს ეწინააღმდეგება.
„პირველ რიგში, ჩვენ ყველანი ვამაყობდით, რომ ქვეყანა გასულ წელს კანდიდატი გახდა და აშკარაა, რომ „უცხოური აგენტების შესახებ“ კანონითა და რიგი სხვა მოვლენებით, იგი ევროკავშირს დაშორდა. როდესაც ვამბობ, რომ ქვეყანა ევროკავშირს დაშორდა, უნდა დავაკონკრეტო, რომ ქართველი ხალხი ევროკავშირს არ ჩამოშორებულა. ევროკავშირისა და ევროპული ღირებულებების მხარდაჭერის მაჩვენებელი 80-დან 90%-მდე რჩება. ამიტომ, საკითხი, რომელსაც ჩვენ განვიხილავთ, არის მთავრობის პოლიტიკა, რომელიც ევროკავშირის ღირებულებებს ეწინააღმდეგება. ასევე, უნდა აღვნიშნო, რომ ძალიან მცირე პროგრესი იქნა მიღწეული ე.წ. ცხრა ნაბიჯის შესახებ, რომელიც უნდა შესრულებულიყო. შედეგად, ევროპულმა საბჭომ დაასკვნა, რომ საქართველოს ევროკავშირში გაწევრიანების პროცესი დე ფაქტო შეჩერებულია“ – განაცხადა ხერტ იან კოოპმანმა.
კოოპმანმა აღნიშნა, რომ სიტუაციის გამოსწორების მიზნით გადამწყვეტი ფაქტორი „უცხოური აგენტების შესახებ კანონის“ გაწვევა უნდა იყოს.
