გალაკტიონ ტაბიძის სახელობის თბილისის №51 საჯარო სკოლა სასწავლო დაწესებულებიდან მატერიალურ-ტექნიკური უზრუნველყოფის კოორდინატორის, მანანა ღვინჯილიას გათავისუფლების შესახებ განცხადებას ავრცელებს. სკოლის ადმინისტრაციის ცნობით, ზოგიერთი პოლიტიკური პარტიის მიერ გავრცელებული ინფორმაცია, რომ მანანა ღვინჯილია სკოლიდან პოლიტიკური ნიშნით არის გათავისუფლებული, სიმართლეს არ შეესაბამება და სკოლის დისკრედიტაციას ემსახურება.
„მანანა ღვინჯილია სკოლაში განსაზღვრული იყო დასუფთავება-ჰიგიენაზე პასუხისმგებელ პირად და მატერიალურ-ტექნიკური უზრუნველყოფის კოორდინატორად. მისი გათავისუფლება მოხდა არა პოლიტიკური ნიშნით, არამედ არაერთი დისციპლინური გადაცდომის გამო. არსებული ფოტო და ვიდეომასალებით დგინდება მისი გულგრილი და ზერელე დამოკიდებულება დაკისრებული მოვალეობისადმი. აქვე გაცნობებთ, რომ გათავისუფლებამდე მას მიეცა შენიშვნა და შემდეგ უკვე – საყვედური. მიუხედავად ყოველივე ზემოაღნიშნულისა, მან ჯეროვნად არ შეასრულა დაკისრებული მოვალეობა, რის გამოც 2024 წლის 18 ივლისს მასთან შეწყდა შრომითი ურთიერთობა. ჩვენთვის კატეგორიულად მიუღებელია ნებისმიერი ტიპის პოლიტიკური სპეკულაცია სკოლის მიმართ და მოვუწოდებთ ზოგიერთ პოლიტიკურ პარტიას, თავი შეიკავონ მსგავსი ტიპის განცხადებებისგან და ცილისწამებისაგან!“ – ნათქვამია განცხადებაში.
რაც შეეხება, მანანა ღვინჯილიას, ის თბილისის 51-ე სკოლიდან განთავისუფლებას ,,რუსული კანონის“ საწინააღმდეგო აქციებში მონაწილეობას უკავშირებს.
