რიკოთის მაგისტრალური გზის მშენებლობის პროექტის ფარგლებში, შორაპანი-არგვეთას მონაკვეთზე ზესტაფონის შემოვლითი ცხრაკილომეტრიანი მაგისტრალური გზა ავტოტრანსპორტისთვის დღეიდან გაიხსნა. გზა მოიცავს 4 გვირაბს და 11 ხიდს.
,,დღეს აღმოსავლეთი და დასავლეთი კიდევ უფრო დაუახლოვდა ერთმანეთს, 89 ხიდი 97-დან უკვე აშენებულია, 50 გვირაბი უკვე გაჭრილია 51-დან, დღეს 9-კილომეტრიანი, ოთხზოლიანი ზესტაფონის შემოვლითი მაგისტრალური გზა მზად არის გასახსნელად, გზა რომელიც მიდის საფრანგეთის ქალაქ ბრესტში, გზა რომლითაც საქართველო შევა ევროპაში”, – თქვა ინფრასტრუქტურის მინისტრმა, ირაკლი ქარსელაძემ.
უწყების ცნობით, თბილისიდან-ბათუმამდე მგზავრობა 3 საათსა და 30 წუთში იქნება შესაძლებელი და შემოვლითი გზის გავლას მხოლოდ 6 წუთი დასჭირდება.
პროექტი 2024 წლის ბოლოს დასრულდება. დღევანდელი მდგომარეობით, აღმოსავლეთ-დასავლეთის მაგისტრალური გზის 276 კმ ანუ 64% ავტოტრანსპორტისთვის უკვე გახსნილია. სამშენებლო სამუშაოები გრძელდება მაგისტრალის 66,1 კმ-ზე.
