უკრაინის შეიარაღებული ძალების მთავარსარდალი ალექსანდრ სირსკი აცხადებს, რომ უკრაინას აქვს ყირიმის დაბრუნების გეგმა და ეს რეალისტურია.
„ეს რეალისტურია. რა თქმა უნდა, ეს არის სამხედრო საიდუმლო. ჩვენ გავაკეთებთ ყველაფერს, რაც შეგვიძლია, რომ მივაღწიოთ 1991 წლის მდგომარეობით საერთაშორისოდ აღიარებულ საზღვრებს. ჩვენ უნდა გავიმარჯვოთ, რათა გავათავისუფლოთ ოკუპირებულ ტერიტორიებზე მყოფი ჩვენი მოქალაქეები, რომლებიც იტანჯებიან“, – განაცხადა უკრაინელმა გენერალმა.
სირსკის განცხადებით, მობილიზაციის გარეშე უკრაინა ვერ შეძლებს ახალი რეზერვებისა და ბრიგადების შექმნას, რომლებიც უკრაინას სჭირდება იმ ფონზე, როდესაც რუსეთი ზრდის თავის სახმელეთო ჯარებს.
„ჩვენთვის ძალიან მნიშვნელოვანია, რომ უკრაინის ყველა მოქალაქემ შეასრულოს თავისი კონსტიტუციური ვალდებულება“,- განაცხადა გენერალმა და მოუწოდა საზღვარგარეთ მცხოვრებ უკრაინელებს იგივე გააკეთონ.
„ვიმედოვნებ, რომ გამარჯვების შემდეგ ისინი შეძლებენ, მოუყვნენ შვილიშვილებს, სად იყვნენ. სად იყავით თქვენ, როდესაც უკრაინის ყველა მოქალაქე ომობდა ასეთ გაცხარებულ ბრძოლებში? ეს არის კითხვა“, – აღნიშნა, უკრაინის შეიარაღებული ძალების მთავარსარდალმა.
