შს-სამინისტრო, წუხელ, ლეონიძის ქუჩაზე მომხდარ დაკავების ფაქტს ეხმაურება. სამინისტროში განმარტავენ, რომ ნასვამ მდგომარეობაში მყოფმა ახალგაზრდა მამაკაცმა არ გაითვალისწინა არაერთი თხოვნა გაეტარებინა მანქანა, რასაც მოჰყვა მასა და სამართალდამცავებს შორის დაპირისპირება.
„გვსურს, გამოვეხმაუროთ თბილისში, ლეონიძის ქუჩაზე მომხდარ ინციდენტს, განვმარტავთ, რომ სამსახურებრივი მოვალეობის შესრულების მიზნით, შინაგან საქმეთა სამინისტროს განსაკუთრებულ დავალებათა დეპარტამენტის ავტობუსი ოპერატიული დავალების მიზნით, სპეციალური შუქურის გამოყენებით გადაადგილდებოდა გზის სავალ ნაწილზე. საავტომობილო გზაზე მოძრავმა ერთ-ერთი ავტომობილის ნასვამ მდგომარეობაში მყოფმა მძღოლმა, 1991 წელს დაბადებულმა ი.წ.-მ არ გაითვალისწინა სამართალდამცველების არაერთი თხოვნა გაეტარებინა მანქანა და ხელი შეუშალაგადაადგილებაში. მიუხედავად იმის რომ ავტობუსი შეეცადა გადაადგილების მიზნით გვერდი აევლო აღნიშნული სატრანსპორტო საშუალებისთვის, მძღოლმა და მისმა თანმხლებმა პირებმა არ მისცეს ავტობუსს აღნიშნულის საშუალება, რასაც მოჰყვა მათსა და სამართალდამცველებს შორის დაპირისპირება. საქმე შემდგომი მოკვლევის მიზნით გადაგზავნილია სპეციალურ საგამოძიებო სამსახურში“- ნათქვამია განცხადებაში.
პოლიციელებსა და მოქალაქის დაპირისპირების ამსახველი ვიდეო სოციალურ ქსელში გავრცელდა, რასაც საზოგადოების არაერთგვაროვანი აზრი მოჰყვა.
