რუსეთის ფინანსურმა ორგანიზაციამ ჭადრაკის დიდოსტატი და პუტინის ოპონენტი გარი კასპაროვი “ტერორისტებისა და ექსტრემისტების” სიაში შეიყვანა.
საბჭოთა წარმოშობის ჭადრაკის ყოფილი მსოფლიო ჩემპიონი რუსეთის პრეზიდენტის ვლადიმირ პუტინის დიდი ხნის მოწინააღმდეგეა, რის გამოც თითქმის ათი წელია აშშ-ში ცხოვრობს. მის მიმართ ტერორიზმის მუხლით სისხლის სამართლის საქმეა აღძრული.
გასული წლის დეკემბერში რუსეთის შინაგან საქმეთა სამინისტრომ ოპოზიციონერი გარი კასპაროვის და “თავისუფალი რუსეთის ფორუმის” თანადამფუძნებლის, ივან ტიუტრინის ქმედებებში “დანაშაულის ნიშნები” აღმოაჩინა. ეს მას შემდეგ მოხდა, რაც მათ რუსეთისა და ბელარუსის მოქალაქეების დასახმარებლად, რომლებიც უკრაინის მხარეს იბრძვიან აუქციონი გამართეს.
