”ქართული ოცნების” თავმჯდომარე, ირაკლი კობახიძე პრესკონფერენციაზე ყოფილი პრეზიდენტის მიხეილ სააკაშვილის მდგომარეობასაც შეეხო. მისი თქმით, გუშინდელ სასამართლო პროცესზე, სადაც სააკაშვილი დისტანციურად ჩაერთო, კუჭის ოპერაციის რეკლამა იხილა.
„თქვენ გახსოვთ, სააკაშვილთან დაკავშირებით 600 დღე ხომ დაგვტანჯეს, ჩვენ კი მიჩვეული ვართ, მაგრამ საზოგადოება დატანჯეს 600 დღე სააკაშვილის თემის გარშემო. 600 დღე სააკაშვილი ვითომ კვდებოდა და საბოლოო ჯამში, სტრასბურგის სასამართლომ მიიღო გადაწყვეტილება და გადაწყვიტა სააკაშვილმაც, რომ აღარ უნდა კვდებოდეს ყოველდღე. ამაში გვაცხოვრეს 600 დღე ევროპარლამენტარებმა, ევროპარლამენტის რეზოლუცია იყო ამაში ჩართული. გუშინ მე რაც ვნახე, ეს არის რეზექციის რეკლამა, კუჭის ოპერაციის, მეორე – ამდენი ხნის განმავლობაში ვამბობთ, რომ საკუთარი ოჯახის წევრებს მასთან შეგნებულად შეაქვთ დაბალი კალორაჟის საკვები. ეს ნორმალურია? ეს ხომ არაჯანსაღი მოვლენაა. ეს ხომ ფაქტებია, გაზომილია კალორაჟი. შეგიძლია, ზუსტად იგივე მოცულობის საკვები შეიტანო მაღალი კალორაჟით“, – განაცხადა ირაკლი კობახიძემ.
