უნგრეთის პრემიერ-მინისტრმა, ვიქტორ ორბანმა ევროპარლამენტის გაუქმება მოითხოვა. ორბანის თქმით, კორუფციულმა სკანდალმა აჩვენა, რომ პარლამენტის დამცავმა მექანიზმებმა პრაქტიკულად არ იმუშავა.
„თუ ჩვენ გვსურს, აღვადგინოთ საზოგადოებაში ნდობა, მაშინ დროა, გავაუქმოთ ევროპარლამენტი“, – განაცხადა ორბანმა.
სანაცვლოდ უნგრეთის პრემიერ-მინისტრი ახალი ევროპარლამენტის შექმნის იდეით გამოვიდა, რომელშიც ორბანის თქმით, ეროვნული დელეგატები იქნებიან წარმოდგენილები.
„ეს იძლევა უკეთესი ზედამხედველობის, ანგარიშვალდებულებისა და სანდოობის გარანტიას. დაუბრუნეთ კონტროლი ევროკავშირის წევრ სახელმწიფოებს“, – განაცხადა ორბანმა.
შეგახსენებთ, რომ ევროპარლამენტში კორუფციული სკანდალი მას შემდეგ აგორდა, რაც ევროპარლამენტის ერთ-ერთი ვიცე პრეზიდენტი და კიდევ სამი პირი ქრთამის სანაცვლოდ კატარის ინტერესების გატარებაში დაადანაშაულეს. აღნიშნულ საქმეზე გამოძიება გრძელდება.
