კომპანია “ზეგ” ბაჩალიაშვილის საქმეზე განცხადებას ავრცელებს

  •  

კომპანია “ზეგ”, სადაც 2020 წლის ზაფხულში გაურკვეველ ვითარებაში გაუჩინარებული 23 წლის პროგრამისტი, თამარ ბაჩალიაშვილი სიცოცხლის ბოლო წლებში მუშაობდა, განცხადებას ავრცელებს “მთავარის” ეთერში კვირას, 13 ივნისს გასულ მასალასთან დაკავშირებით, სადაც საუბარია კომპანიის სავარაუდოდ საეჭვო დანაშაულებრივ საქმიანობაზე, მომხმარებელთა პირადი მონაცემების მოპარვასა და სპეცსამსახურებთან თანამშრომლობაზე. თამარ ბაჩალიაშილმა გამოძიების ვერსიით თავი მოიკლა, ოჯახს და მის უფლებადამცველებს ამ ვერსიის არ ჯერათ და დახურული გამოძიების განახლებას ითხოვენ.

კომპანია “ზეგ” “მთავარის” ეთერში გასულ ინფორმაციას სრულად უარყოფს და ამბობს, რომ ტელევიზიის ამ თემაზე სხვადასხვა დროს მომზადებული მასალები წინააღმდეგობრივია ერთმანეთთან, ის პლატფორმა კი, რომელზეც გარდაცვლილი პროგრამისტი კომპანია “ზეგ”-ის ხელმძღვანელის კოორდინაციით მუშაობდა, ღია პლატფორმაა და არანაირ საიდუმლოს არ წარმოადგენს მასზე განთავსებული პროგრამული კოდები.

„შპს “ზეგ” ეხმაურება 13 ივნისს ტელეკომპანია “მთავარის” გადაცემებში: “პოსტ ფაქტუმსა” და “მთავარ აქცენტებში” გაჟღერებულ მორიგ ცილისწამებას, ამჯერად კომპანიის სუს-თან თანამშრომლობისა და ამავე თანამშრომლობის ფარგლებში, კომპანიის ტექნიკური მენეჯერის, ნიკოლოზ გეჯაძის დანაშაულებრივი საქმიანობის, ამჯერად ფიშინგის შესახებ, რასაც გადაცემების წამყვანები და მოწვეული სტუმრები აჟღერებდნენ, ხოლო მტკიცებულებად მოჰყავდათ ნიკოლოზ გეჯაძის საჯარო სოციალური ქსელი “GitHub”-ით სარგებლობა. ამასთან დაკავშირებით გვსურს ვაღიაროთ, რომ ნიკოლოზ გეჯაძე, ისევე როგორც კომპანიის 50-ვე თანამშრომელი, “GitHub”-ის გარდა, სარგებლობს “Facebook”-ით, “Twitter”-ით, “LinkedIn”-ით და სხვა სოციალური პლატფორმებით, აქედან გამომდინარე, ველით “ჟურნალისტური” გამოძიებების შემდგომ სერიებს ამ მიმართულებებითაც.

“GitHub”-ი წარმოადგენს ღია, საჯარო პლატფორმას, რომლითაც მსოფლიოს მასშტაბით 65 მილიონზე მეტი დეველოპერი სარგებლობს. პლატფორმაზე პროგრამისტები საკუთარ ნამუშევარს, პროგრამებს (კოდებს/სკრიპტებს) განათავსებენ, რომლებიც ატვირთვის შემდგომ ყველასათვის ხელმისაწვდომი ხდება უფასოდ. გამომწერებს (followers) შეუძლიათ ისარგებლონ ატვირთული პროგრამებით, გახდნენ კონტრიბუტორები (შეცვალონ/დააშენონ/მიამატონ პროგრამები) საკუთარი საჭიროების მიხედვით და გაუზიარონ აღნიშნული პროგრამები თავიანთ გამომწერებს.

“11-კაციანი გუნდი”, რაზეც გადაცემებში აპელირებდნენ, წარმოადგენს 11 უცხო ადამიანს, რომლებმაც ნიკოლოზ გეჯაძის მიერ დაწერილი კოდით ისარგებლეს და/ან მოდიფიკაცია გაუკეთეს საკუთარი საჭიროების მიხედვით. ნახსენები პროგრამა წარმოადგენს ერთგვარ შაბლონს (framework), რომელიც სხვა დეველოპერებს უმარტივებს სამუშაოს, რადგან სტანდარტიზაციას უკეთებს პროგრამის წერის მეთოდებს. აღნიშნული პლატფორმის სპეციფიკიდან გამომდინარე, და მაგალითად “Facebook”-სგან განსხვავებით, სადაც მეგობრებს და ნაცნობ ადამიანებს ვიმატებთ, “GitHub”-ზე გამომწერები (followers) შეიძლება იყვნენ სრულიად უცნობი ადამიანები, მსოფლიოს ნებისმიერი ქვეყნიდან.

ღიმილისმომგვრელია ზემოაღნიშნულის გუნდურ საქმიანობად მოხსენიება, ხოლო ღია პლატფორმაზე, რომელზეც ნებისმიერ ადამიანს აქვს წვდომა, დანაშაულებრივი მიზნებისთვის საქმიანობაზე აპელირება უბრალოდ აბსურდია. იმავე წარმატებით შეგვიძლია ვამტკიცოთ, რომ მაგალითად “Facebook”-ზე ან “LinkedIn”-ზე დარეგისტრირებული მომხმარებლები წარმოადგენენ თავიანთი მეგობრებისა თუ გამომწერების მენეჯერებს და გუნდურად მისდევენ დანაშაულებრივ საქმიანობას” – ნათქვამია კომპანიის განცხადებაში. “ზეგ”-ში ეჭვს გამოთქვამენ “მთავარის” რესპონდენტის, ექსპერტ გიორგი ქართველიშვილის კვალიფიკაციის შესახებაც და ამბობენ, რომ მისი, ცოდნა პროგრამირების მიმართულებით შეზღუდულია და ეს მარტივად მკიცდება მისივე ვებ-საიტით, რომელიც ხარვეზებიანი ვორდპრესის მზა შაბლონზეა აწყობილი.

გიორგი ქართველიშვილი, რომელიც “მთავარს” პროგრამისტად ჰყავდა ჩაწერილი თამარ ბაჩალიაშვილისა და კომპანია “ზეგ”-ის შესახებ მომზადებულ მასალაში, თავისივე ვებ-საიტის მიხედვით არა პროგრამისტი, არამედ პროდუქტ დიზაინერია. 2014 წელს ის “სამოყვარულო ჟურნალისტიკასაც” ეწეოდა თავის მეგობრებთან ერთად და როგორც მაშინ ამბობდა, ამ საქმიანობის გამო ფიზიკურად გაუსწორდა იმ დროისთვის ხაშურის მაჟორიტარი დეპუტატი, ვალერი გელაშვილი.

“იმედს ვიტოვებთ, რომ მისი პროექტების ჩამონათვალში არსებული რუსული კომპანია “ბელროსსტროი” (БЕЛРОССТРОЙ) მის მიერ შეძენილი შაბლონის ნაწილია, რომელიც სხვისი პროექტების დაკოპირებისას შემთხვევით გადმოყვა. ნებისმიერ შემთხვევაში, მის მიერ ნიკოლოზ გეჯაძის “GitHub”-ზე რუსი თუ უკრაინელი გამომწერებით (followers) აპელირება მიზანმიმართული დეზინფორმაციაა.

ზემოაღნიშნული ბრალდება ფაქტობრივად წინა ბრალდებების გაგრძელებაა, რომელიც „ტროლებისა და ბოტების“ ქარხანას, რუსულ სპეც-სამსახურებთან თანამშრომლობას, ამერიკულ სპეც-სამსახურებთან თანამშრომლობას, ბავშვთა პორნოგრაფიას, თანამშრომელთა მიერ გარდაცვლილი თამარ ბაჩალიაშვილის ბულინგს შეეხებოდა. ეს უკანასკნელი ბრალდება, 13 ივნისის გადაცემაში სრულიად შეიცვალა და ამჯერად “ზეგ”-ის მენეჯმენტის მიერ თანამშრომელთა ზედმეტი განებივრებით, მათთვის საჩუქრების გადაცემით, უცხოეთში დასვენებით, სახლებისა და მანქანების ჩუქებით ჩანაცვლდა” – ვკითხულობთ კომპანია “ზეგ”-ის განცხადებაში, სადაც ასევე აღნიშნულია, რომ ისინი არ აპირებენ სატელევიზიო ეთერებში და “ფარსში” მონაწილეობას.

კომპანია “ზეგ”-ის საქმიანობის მიმართ ეჭვს გამოთქვამდა თამარ ბაჩალიაშვილის გაუჩინარების შემდეგ მალევე მისი ოჯახი, ასევე გარდაცვლილის კურსელი, რომელიც საზოგადოებას მის შეყვარებულად გაეცნო. კომპანია პარალიზებული იყო თვეების განმავლობაში იმის გამო, რომ გამოძიების ინტერესებისთვის პროკურატურამ მათგან ამოიღო ყველანაირი, მათ შორის თანამშრომლების პირადი ტექნიკა.

მსგავსი თემები