დღეს, პარლამენტი პლენარულ სხდომაზე განიხილავს გამჭვირვალობის შესახებ კანონზე პრეზიდენტის ვეტოს. “ქართული ოცნება” აპირებს, რომ ვეტო დაძლიოს. სხდომა 12:00 საათზე დაიწყება, პარალელურად საკანონმდებლო ორგანოსთან კანონის მოწინააღმდეგეები 11:00 საათიდან შეიკრიბებიან. კიდევ ერთი აქცია პარლამენტის წინ დაგეგმილია 17:00 საათზეც.
საკანონმდებლო ორგანოში უკვე მობილიზებულები არიან შინაგან საქმეთა სამინისტროს ავტობუსები. შიდა ეზოში და პარლამენტის შენობაშც იმყოფებიან ნიღბიანი სამართალდამცავები და სპეცრაზმელები.
პოლიცია მობილიზებულია ჩიტაძის ქუჩაზეც, პარლამენტის გვერდითა შესასვლელთან, საიდანაც დეპუტატები ეზოში შედიან.
