დღე: ივნისი 26, 2025

უკრაინული მედია სოციოლოგიური კვლევითი ცენტრის, „სოცისის“ მიერ ჩატარებული გამოკითხვის თანახმად, საპრეზიდენტო არჩევნები უახლოეს მომავალში რომ გაიმართოს, უკრაინელები პირველ ტურში ხმას, ძირითადად, მოქმედ პრეზიდენტს, ვოლოდიმირ ზელენსკის და დიდ ბრიტანეთში უკრაინის ელჩს, ვალერი ზალუჟნის მისცემენ. აღნიშნული ორი კანდიდატის მიერ კენჭისყრის შემთხვევაში გამოკითხულთა 21.8 პროცენტი ზელენსკის მისცემდა ხმას, ხოლო 19.6 პროცენტი – ზალუჟნის. უკრაინული მედიის თანახმად, რესპონდენტთა დიდმა რაოდენობამ (24.7 პროცენტი) ვერ შეძლო არჩევანის გაკეთება. შეთავაზებულ კანდიდატთა სიაში ასევე შედიოდნენ ყოფილი პრეზიდენტი პეტრო პოროშენკო, მთავარი სადაზვერვო სამმართველოს უფროსი კირილ ბუდანოვი, კიევის მერი ვიტალი კლიჩკო და სხვები.

საგარეო საქმეთა მინისტრმა, სერგეი ლავროვმა განაცხადა, რომ ნატო-ს თავდაცვის ხარჯების ზრდა რუსეთის უსაფრთხოებაზე მნიშვნელოვან გავლენას არ მოახდენს. ლავროვის თქმით, ევროპის მთავრობების გეგმები თავდაცვის ხარჯების გაზრდის შესახებ საფრთხეს უქმნის ადგილობრივ გადასახადის გადამხდელებს, რომელთა ფულიც ბოლო წლებში უკვე გამოიყენებოდა რუსეთთან უაზრო დაპირისპირების დასაფინანსებლად უკრაინაში. „ჩვენ ვიცით, რა მიზნებს ვისწრაფვით, არ ვმალავთ მათ, ღიად ვაცხადებთ, ისინი აბსოლუტურად ლეგალურია გაერო-ს წესდებისა და საერთაშორისო სამართლის პრინციპების ნებისმიერი ინტერპრეტაციის თვალსაზრისით. ვიცით, რა საშუალებებით უზრუნველვყოფთ ყოველთვის ამ მიზნების მიღწევას“, – აღნიშნა სერგეი ლავროვმა. 25 ივნისს ნატოს სამიტის შედეგად წევრმა ქვეყნებმა ვალდებულება აიღეს, რომ 2035 წლისთვის ყოველწლიურად თავდაცვაზე…

აშშ-ის პრეზიდენტმა, დონალდ ტრამპმა განაცხადა, რომ არცერთმა „რესპუბლიკელმა“ მხარი არ უნდა დაუჭიროს „ამერიკის ხმის“ გადარჩენას. „რატომ უნდა სურდეს „რესპუბლიკელს“, რომ „დემოკრატების“ რუპორმა „ამერიკის ხმამ“ გააგრძელოს მუშაობა? ეს სრული, მემარცხენე კატასტროფაა. არცერთმა „რესპუბლიკელმა“ მის გადარჩენას ხმა არ უნდა მისცეს. მოკალით ის!“, – აღნიშნა დონალდ ტრამპმა.

,,ბრძოლა მოგებულია!“,- ასე აფასებს უნგრეთის პრემიერ-მინისტრი ვიქტორ ორბანი ჰააგაში გამართულ ნატოს სამიტს. „სამიტზე საუბარი იყო ჩვენი ალიანსის გაძლიერებასა და არა უკრაინაში ილუზიების დევნაზე. აშკარად წინ გადადგმული ნაბიჯი სტაბილურობისა და უსაფრთხოებისკენ!“, – წერს ორბანი სოციალურ ქსელში.

ღაზის სექტორში ცეცხლის შეწყვეტის მისაღწევად და მძევლების გასათავისუფლებლად მედიატორები ძალისხმევას აძლიერებენ, თუმცა ისრაელთან მოლაპარაკებები ჩიხშია. ამის შესახებ „ჰამასში“ აცხადებენ. ამავე დროს, ღაზის სექტორის ჯანდაცვის უწყებაში აცხადებენ, რომ გასული დღის განმავლობაში ისრაელის იერიშის შედეგად 45 პალესტინელი დაიღუპა. ისრაელის შეიარაღებულ ძალებში კი აცხადებენ, რომ „ჰამასის“ მიერ მოწყობილ აფეთქებას შვიდი სამხედრო ემსხვერპლა. აშშ-ს პრეზიდენტმა დონალდ ტრამპმა ნატო-ს სამიტის ფარგლებში მედიასთან საუბრისას განაცხადა, რომ ისრაელსა და ირანს შორის 12-დღიანი ომის დასრულების პარალელურად, გარკვეულ პროგრესს ღაზაშიც ელოდებიან. „ბიბისისთან“ საუბარში, „ჰამასის“ წარმომადგენელმა განაცხადა, რომ „ცეცხლის შეწყვეტის შეთანხმების მისაღწევად კონტაქტებში ინტენსიურად არიან ჩართული, თუმცა, ახალი წინადადებები ჯერჯერობით…

„ჩვენ მადლიერები ვართ პრეზიდენტ ტრამპის, მაგრამ პრეზიდენტი არ უნდა ჩაერიოს დამოუკიდებელ ქვეყანაში არსებულ სამართლებრივ პროცესში“, – ამის შესახებ ისრაელის ოპოზიციის ლიდერმა, იაირ ლაპიდიმ განაცხადა. შეგახსენებთ, აშშ-ის პრეზიდენტმა, დონალდ ტრამპმა ისრაელის პრემიერ-მინისტრის, ბენიამინ ნეთანიაჰუს საქმეზე მიმდინარე სასამართლო პროცესის შეწყვეტა მოითხოვა. ტრამპმა სოციალურ ქსელში დაწერა: „ნეთანიაჰუს სასამართლო პროცესი დაუყოვნებლივ უნდა გაუქმდეს ან შეწყალება მიეცეს. სწორედ აშშ-მა გადაარჩინა ისრაელი და ახლა გადაარჩენს ბიბი ნეთანიაჰუს“.

ევროკავშირის თავდაცვის კომისარი აცხადებს, რომ ევროპა უნდა იყოს მზად, რუსეთის თავდასხმის შემთხვევაში დრონების არმია შექმნას. ანდრიუს კუბილიუსის თქმით, თავის დასაცავად ევროპელებს მილიონობით დრონი დასჭირდებათ და ამისთვის მზადება ახლავე უნდა დაიწყონ. „რუსეთს შეიძლება დაახლოებით ხუთი მილიონი დრონი ჰქონდეს, ამიტომ გამარჯვებისთვის ჩვენ გვჭირდება ამაზე მეტი შესაძლებლობები“, – განუცხადა მან Sky News-ს.

,,კიევისთვის იარაღის მიწოდებით სამხედრო მოქმედებების გახანგრძლივება რეგიონში სიტუაციის დესტაბილიზაციის რისკს ზრდის, მათ შორის ევროპაში”, – ამის შესახებ რუსეთის თავდაცვის მინისტრმა, ანდრეი ბელოუსოვმა განაცხადა. „დამარცხების გარდაუვალობის გაცნობიერებით, კიევის რეჟიმი ტერორისტულ აქტებზე დებს ფსონს. ევროპელი სპონსორების მხარდაჭერით ის რუსეთის ტერიტორიაზე სამოქალაქო ინფრასტრუქტურას აფეთქებს და მშვიდობიან მოსახლეობას კლავს. უკრაინის იარაღითა და დაქირავებული მებრძოლებით მომარაგების ხარჯზე სამხედრო მოქმედებების გახანგრძლივების მცდელობები დესტაბილიზაციის საფრთხეს ზრდის, მათ შორის თავად ევროპაში. ამავდროულად, რუსეთმა არაერთხელ განაცხადა, რომ მზადაა კონფლიქტის მოგვარებისთვის“, – განაცხადა ანდრეი ბელოუსოვმა.

უკრაინის შეიარაღებული ძალების მთავარსარდალი ალექსანდრ სირსკი აცხადებს, რომ მიმდინარე კვირიდან სუმის ოლქის სასაზღვრო რაიონებში რუსეთის ძალების შეტევა შეჩერებულია და საბრძოლო შეტაკებების ხაზი სტაბილიზებულია. მისი თქმით, გარკვეულ მონაკვეთებზე უკრაინული დანაყოფები აქტიურად ამოქმედებენ თავდაცვის ტაქტიკას და ათავისუფლებენ უკრაინის მიწას სუმის სასაზღვრო რაიონში. როგორც მთავარსარდალმა განმარტა, კურსკის ოლქში უკრაინის შეტევითმა მოქმედებებმა აიძულა მოწინააღმდეგე, ძალების ნაწილი თავისი ტერიტორიის დასაცავად გაეგზავნა, რამაც მნიშვნელოვნად შეამცირა სუმის მიმართულებით შეტევის შესაძლებლობები. „მაის-ივნისის შედეგების საფუძველზე, შეგვიძლია ვთქვათ, რომ რუსეთის ფედერაციის ტერიტორიიდან მტრის მიერ „ზაფხულის შეტევის“ მცდელობების ტალღა წელს ჩაცხრება, ისევე როგორც გასულ წელს ხარკოვის ოლქში მტრის მიერ შეტევითი მოქმედებების…

აშშ-ის პრეზიდენტმა, დონალდ ტრამპმა განაცხადა, რომ CNN-მა ჟურნალისტი ნატაშა ბერტრანი, ვინც მოამზადა მასალა, სადაც ამერიკულ დაზვერვაზე დაყრდნობით ნათქვამია, რომ აშშ-ის საჰაერო დარტყმების შედეგად ირანის ბირთვული პროგრამის ძირითადი კომპონენტები არ განადგურებულა „ძაღლივით უნდა გააგდოს“. „მას არ უნდა მიეცეს უფლება, მუშაობდეს „ფეიკ ნიუს“ CNN-ზე. სწორედ მისნაირი ხალხი ანადგურებს ოდესღაც დიდებული ტელეარხის რეპუტაციას. მისი მიკერძოება აშკარად ნეგატიური იყო, გარდა ამისა, მას არ აქვს ის, რაც საჭიროა კამერის წინ მუშაობისთვის, ახლოსაც კი არ არის. გააგდეთ ნატაშა!“, – აღნიშნა მან.

ყირგიზეთის პარლამენტმა კანონპროექტი დაამტკიცა, რომელიც მედია საშუალებებზე სახელმწიფო კონტროლს ამკაცრებს. ოთხშაბათს საღამოს დამტკიცებული კანონმდებლობის თანახმად, ყველა საინფორმაციო ვებგვერდი უნდა დარეგისტრირდეს სახელმწიფოს მიერ უფლებამოსილ ორგანოში, ხოლო მთავრობას ექნება უფლებამოსილება, გასცეს და გააუქმოს ლიცენზიები, როგორც ამას თავად ჩათვლის საჭიროდ. იურისტები და მედიის მარეგულირებელი ორგანოები აცხადებენ, რომ ახალი კანონი დიდი ალბათობით დამოუკიდებელი და კრიტიკული საშუალებების ჩასახშობად იქნება გამოყენებული. როგორც Reuters წერს, ყირგიზეთი, ოდესღაც ცენტრალურ აზიაში პრესის თავისუფლების შედარებით თავშესაფრად ითვლებოდა. ბოლო წლებში დაპატიმრებების, სამართლებრივი ზეწოლისა და კრიტიკული მედიასაშუალებების დახურვის ფონზე ქვეყანაში მედიის დამოუკიდებლობის მკვეთრი კლება შეინიშნება.

თურქეთის პრეზიდენტი რეჯეფ თაიფ ერდოღანი აცხადებს, რომ აშშ-ის პრეზიდენტი დონალდ ტრამპი მზადაა, თურქეთში ჩავიდეს უკრაინის საკითხზე მოლაპარაკებების გასამართად, თუ პუტინი ასევე ჩავა თურქეთში. „ტრამპმა მითხრა, თუ რუსეთის პრეზიდენტი სტამბოლში ან ანკარაში ჩავა საკითხის გადაწყვეტისთვის, მაშინ მეც ჩამოვალო. ჩვენ გვექნება საჭირო კონტაქტები და, ღმერთის ნებით, განვახორციელებთ ამ შეხვედრას“, – განახადა ერდოღანმა ნატო-ს სამიტიდან დაბრუნების შემდეგ გააკეთა. ცნობისთვის, მანამდე რუსეთმა და უკრაინამ სტამბოლში მოლაპარაკებების ორი რაუნდი გამართეს.

გერმანიის კანცლერი, ფრიდრიხ მერცი ამერიკის შეერთებულ შტატებს მოსკოვზე ზეწოლის გაძლიერებისკენ მოუწოდებს. მან იმედი გამოთქვა, რომ ამერიკის სენატი საკითხს უახლოეს დღეებში განიხილავს და სანქციებს მხარს დაუჭერს. „ჩვენ უნდა გავაძლიეროთ რუსეთზე ეკონომიკური ზეწოლა. ევროკავშირი სწორედ ამით არის დაკავებული, მაგრამ ეს არ კმარა. ჩვენ გვჭირდება შეერთებული შტატებს უფრო მეტი აქტიურობა. მე შევხვდი პრეზიდენტ ტრამპს სამიტის ფარგლებში და პირადად ვთხოვე მას რუსეთისთვის ახალი სანქციების დაწესებას მხარი დაუჭიროს“, – თქვა მერცმა.

უკრაინის წინააღმდეგ ომში საბრძოლველად ჩრდილოეთ კორეამ, შესაძლოა, ივლისში ან აგვისტოში რუსეთში დამატებითი ჯარები გაგზავნოს. სამხრეთ კორეის ეროვნული დაზვერვის სამსახურის (NIS) თქმით, რუსეთი, შესაძლოა, ივლისში ან აგვისტოში უკრაინაზე ფართომასშტაბიანი თავდასხმისთვის ემზადებოდეს, რისთვისაც მას დამატებითი შენაერთები დასჭირდება. მათივე თქმით, ამის ვარაუდის საფუძველს ჩრდილოეთ კორეის მიერ ჯარების ახალი მობილიზაცია და რუსეთის პრეზიდენტის უსაფრთხოების მაღალი თანამდებობის პირების ფხენიანში ბოლოდროინდელი ვიზიტები აძლევთ.

ირანის სულიერი ლიდერი აიათოლა ალი ხამენეი ქვეყნის მოსახლეობას ისრაელზე გამარჯვებას ულოცავს. „გილოცავთ მცდარი სიონისტური რეჟიმის დამარცხებას. ამ არეულობისა და ყველა ამ განცხადების ფონზე, სიონისტური რეჟიმი პრაქტიკულად განადგურდა და დაემხო ისლამური რესპუბლიკის დარტყმებით“, – განაცხადა ირანის სულიერმა ლიდერმა.

,,რუსეთის ხელმძღვანელობაში არავინ არის ხელშეუხებელი. რუსეთის ომის ყოველი სანტიმეტრი დოკუმენტირებულია, ეჭვის ადგილი არ არსებობს და დაუსჯელობის ადგილი არ არის”, – ამის შესახებ ევროკავშირის უმაღლესმა წარმომადგენელმა კაია კალასმა განაცხადა. ,,პრეზიდენტ ზელენსკისა და ევროპის საბჭოს შორის სპეციალური ტრიბუნალის შექმნის შესახებ მიღწეული შეთანხმება მკაფიო გზავნილს აგზავნის: რუსეთის ხელმძღვანელობაში არავინ არის ხელშეუხებელი“, – წერს კალასი. ცნობისთვის, უკრაინამ და ევროპის საბჭომ უკრაინის წინააღმდეგ რუსეთის აგრესიასთან დაკავშირებით სპეციალური ტრიბუნალის შექმნის შესახებ შეთანხმება გააფორმეს.

,,თბილად მივესალმები უკრაინის პრეზიდენტ ვოლოდიმირ ზელენსკისა და ევროპის საბჭოს შორის ხელმოწერილ შეთანხმებას აგრესიის დანაშაულისთვის სპეციალური ტრიბუნალის შექმნის შესახებ”, – ამის შესახებ ევროკომისიის პრეზიდენტი, ურსულა ფონ დერ ლაიენი X-ზე წერს. „მოძალადეები მოსამართლეების წინაშე უნდა წარდგნენ და სამართალი გაიმარჯვებს“, – აცხადებს ევროკომისიის პრეზიდენტი. შეგახსენებთ, უკრაინამ და ევროპის საბჭომ რუსეთის აგრესიის დანაშაულის გამოძიებისთვის სპეციალური ტრიბუნალის შექმნის შესახებ შეთანხმებას მოაწერეს ხელი. შესაბამის შეთანხმებას სტრასბურგში ევროპის საბჭოს შენობაში მოეწერა ხელი უკრაინის პრეზიდენტის, ვოლოდიმირ ზელენსკის აღნიშნულ ორგანიზაციაში პირველი ვიზიტის დროს.