დღე: ივნისი 24, 2025

აშშ-ის პრეზიდენტმა, დონალდ ტრამპმა განაცხადა, რომ ისრაელსაც და ირანსაც თანაბრად სურდათ ომის შეჩერება. მისი თქმით, მისთვის პატივი იყო ომის შეჩერება. „ჩემთვის დიდი პატივი იყო ყველა ბირთვული ობიექტისა და შესაძლებლობის განადგურება და შემდეგ კი ომის შეჩერება“, – წერს ტრამპი.

ქართველი ოპოზიციონერი დეპუტატების დაკავებას, ევროკომისარი გაფართოების საკითხებში, მარტა კოსი ეხმაურება. ის მოუწოდებს საქართველოს ხელისუფლებას გაათავისუფლოს “უსამართლოდ დაკავებულები”. “ოპოზიციური ხმების დაპატიმრება თავდასხმაა საქართველოს დემოკრატიულ საფუძვლებზე, რომელიც დღითი დღე იშლება. გვერდში ვუდგავარ მათ, ვინც თავისუფალი და პლურალისტური ქართული საზოგადოებისთვის იბრძვის და საქართველოს ხელისუფლებას მოვუწოდებ, გაათავისუფლოს ყველა ჟურნალისტი, აქტივისტი და ისინი, ვინც უსამართლოდ არიან დაკავებული” – წერს კოსი.

ირანსა და ისრაელს შორის ცეცხლის შეწყვეტის შეთანხმება უნდა შენარჩუნდეს. ამის შესახებ დიდი ბრიტანეთის პრემიერ-მინისტრმა, კირ სტარმერმა განაცახდა. „ირანს არასდროს უნდა მიეცეს ბირთვული იარაღის შექმნის უფლება და ახლა ისინი უნდა დაუბრუნდნენ მოლაპარაკებების მაგიდას, იმუშაონ მდგრადი შეთანხმების მისაღწევად. ეს არის გზავნილი, რომელსაც დღეს ლიდერებთან განვიხილავ“ – წერს სტარმერი სოციალურ ქსელში.

რუსეთის მიერ უკრაინის ქალაქ დნეპროპეტროვსკის დაბომბვის შედეგად დაღუპულთა რიცხვი 16-მდე გაიზარდა. დაშავებულია 170-ზე მეტი ადამიანი. ვარაუდობენ, რომ დაღუპულთა რიცხვი კიდევ გაიზრდება. 25 ივნისი დნეპროპეტროვსკში გლოვის დღედ გამოცხადდა. დაბომბვის შედეგად, დაზიანებულია 19 სკოლა, ათი საბავშვო ბაღი, საერთო საცხოვრებელი, გიმნაზია, ადმინისტრაციული შენობა, ქალაქის რვა საავადმყოფო და პოლიკლინიკა.

ირანის ეროვნული უშიშროების უზენაესმა საბჭომ ისრაელთან ზავის მიღწევის შესახებ განცხადება გაავრცელა, სადაც აღნიშნულია, რომ ირანმა ომში გამარჯვება მოიპოვა. „ერის ღრმა გააზრებისა და სათანადო ქცევის, მებრძოლების სიბრძნისა და ბრძოლის და აგრეთვე ბრძენი ხელმძღვანელობისთვის ღვთიურ ჯილდოდ იქცა გამარჯვება, რომელმაც მტერი აიძულა ენანა, ეღიარებინა მარცხი და ცალმხრივად შეეწყვიტა აგრესია“, – ნათქვამია ირანის ეროვნული უშიშროების უზენაესი საბჭოს განცხადებაში. ამასთან ერთად, როგორც ირანის უშიშროების საბჭოს მიერ გავრცელებულ განცხადებაშია აღნიშნული, ქვეყნის შეიარაღებული ძალები „მტრის არცერთ სიტყვას არ ენდობა“ და რჩება მზადყოფნის რეჟიმში, რათა აგრესიის შემთხვევაში საპასუხო ზომები გაატაროს. ცნობისთვის გვიან ღამით აშშ-ის პრეზიდენტმა, დონალდ ტრამპმა განაცხადა,…

„ჩვენ გვინდა, ვუმასპინძლოთ ნატო-ს სამიტს თურქეთში 2026 წელს. ჩვენ გავმართავთ სამიტის ფარგლებში ორმხრივ შეხვედრებს ჩვენს მოკავშირეებთან, ლიდერებთან მოკავშირე ქვეყნებიდან“, – ამის შესახებ თურქეთის პრეზიდენტმა რეჯეფ თაიფ ერდოღანმა ჰააგაში ნატოს სამიტზე გამგზავრებამდე მედიასთან ისაუბრა. ამასთან, ერდოღანმა ნატოს ფარგლებში თავდაცვის საშუალებების ვაჭრობაზე არსებული შეზღუდვების გაუქმება მოითხოვა. „არ მიგვაჩნია სწორად მოკავშირეებს შორის თავდაცვის პროდუქტებით ვაჭრობაზე შეზღუდვების დაწესება. ეს დაბრკოლებები და შეზღუდვები უნდა გაუქმდეს, რაც შეიძლება მალე, ყოველგვარი „მაგრამ-ის“ და „თუ-ს“ გარეშე“, – განაცხადა ერდოღანმა.

,,ირანის რეჟიმის მიერ ცეცხლის შეწყვეტის შეთანხმების უხეში დარღვევის გათვალისწინებით, განვახორციელებთ დარტყმას ძალის გამოყენებით”, – ამის შესახებ ისრაელის თავდაცვის ძალების შტაბის უფროსმა, გენერალ-ლეიტენანტმა ეიალ ზამირმა განაცხადა. მანამდე, ისრაელის თავდაცვის მინისტრმა, ისრაელ კაცმა განაცხადა, რომ ისრაელის თავდაცვის ძალებს დაავალა, ძლიერად უპასუხონ ირანის მიერ ცეცხლის შეწყვეტის შეთანხმების დარღვევას თეირანის ცენტრში რეჟიმის სამიზნეებზე ინტენსიური დარტყმებით. ისრაელის თავდაცვის ძალების ინფორმაციით, ირანმა, ცეცხლის შეწყვეტის შესახებ შეთანხმების გამოცხადების შემდეგ, ისრაელის მიმართულებით ორი ბალისტიკური რაკეტა გაუშვა. ისრაელის საჰაერო თავდაცვამ ორივე რაკეტა მოიგერია.

რუსეთის უშიშროების საბჭოს თავმჯდომარის მოადგილემ, დიმიტრი მედვედევმა, ირანისთვის ბირთვული იარაღის გადაცემის საკითხზე, აშშ-ის პრეზიდენტის, დონალდ ტრამპის კრიტიკას უპასუხა. „პრეზიდენტ ტრამპის შეშფოთებასთან დაკავშირებით, მე ვგმობ აშშ-ის თავდასხმას ირანზე – მან ვერ მიაღწია თავის მიზნებს. თუმცა, რუსეთი არ აპირებს ირანისთვის ბირთვული იარაღის გადაცემას, რადგან ისრაელისგან განსხვავებით, ჩვენ ვართ ბირთვული იარაღის გაუვრცელებლობის ხელშეკრულების მონაწილეები“, – აღნიშნა რუსეთის ყოფილმა პრეზიდენტმა.

,,ისრაელო, არ ჩამოყაროთ ეს ბომბები. ამას თუ გააკეთებთ, იქნება სერიოზული დარღვევა. ახლავე დააბრუნეთ თქვენი პილოტები სახლში”, – წერს ამერიკის შეერთებული შტატების პრეზიდენტი დონალდ ტრამპი სოციალურ ქსელში. მანამდე დონალდ ტრამპმა დაწერა, რომ ისრაელსა და ირანს შორის ცეცხლის შეწყვეტის შესახებ შეთანხმება ძალაში შევიდა და მოუწოდა ირანსა და ისრაელს, არ დაარღვიონ შეთანხმება. თუმცა, ისრაელის თავდაცვის ძალებმა გაავრცელეს ინფორმაცია, რომ ირანმა ისრაელის მიმართულებით ბალისტიკური რაკეტები გაუშვა. ისრაელის თავდაცვის ძალებში აღნიშნეს, რომ ირანის მიერ ცეცხლის შეწყვეტის შეთანხმების დარღვევას ისრაელი ძალით უპასუხებს.

13 ივნისის შემდეგ ირანში ისრაელის თავდასხმის შედეგად სულ 606 ადამიანი დაიღუპა. როგორც ირანის ჯანდაცვის მინისტრი, მოჰამედ რეზა ზაფარღანი აღნიშნავს, დაშავებულია 5000-ზე მეტი ადამიანი. მისი თქმით, ირანში ბოლო 24 საათის განმავლობაში ყველაზე მძიმე თავდასხმები განხორციელდა, რის შედეგადაც 107 ადამიანი დაიღუპა.

საუდის არაბეთში საქართველოს საელჩოში აცხადებენ, რომ რეგიონში მიმდინარე მოვლენების გათვალისწინებით, საქართველოს საელჩოში ფუნქციონირებს ცხელი ხაზი, რომელზე დარეკვაც საჭიროების შემთხვევაში, საქართველოს მოქალაქეებს 24 საათის განმავლობაში შეუძლიათ. „რეგიონში მიმდინარე მოვლენებისა და უსაფრთხოების გარემოს გათვალისწინებით, საუდის არაბეთის სამეფოში საქართველოს საელჩოში ფუნქციონირებს ცხელი ხაზი – +966 55 713 6346 საელჩო მოუწოდებს საუდის არაბეთის სამეფოში და ბაჰრეინის სამეფოში მცხოვრებ საქართველოს მოქალაქეებს მაქსიმალური სიფრთხილისკენ. საჭიროების შემთხვევაში, საქართველოს მოქალაქეებს 24 საათის განმავლობაში შეუძლიათ, დაუკავშირდნენ საელჩოს ცხელ ხაზს“, – ნათქვამია საუდის არაბეთში საქართველოს საელჩოს განცხადებაში.

,,შეერთებული შტატების იერიშები, საერთაშორისო სამართლის დარღვევა არ იყო”, – განაცხადა ნატოს გენერალურმა მდივანმა, ჰააგაში ნატოს სამიტის წინ. „მოკავშირეები თანხმდებიან, რომ ირანმა არ უნდა შექმნას ბირთვული იარაღი. ჩვენ სისტემატურად მოვუწოდებდით ირანს, ბირთვული იარაღის გაუვრცელებლობის შეთანხმების მიხედვით აღებული ვალდებულების შესრულებისკენ. ნატო აცხადებს, რომ ირანს ბირთვული იარაღი არ უნდა ჰქონდეს, ამიტომაც არ ვეთანხმები მოსაზრებას, რომ შეერთებული შტატების დარტყმები, საერთაშორისო სამართალს ეწინააღმდეგებოდა“, – განაცხადა რუტემ.

ირანის სასულიერო საბჭო აიათოლა ალი ხამენეის მემკვიდრის შერჩევის პროცესს აჩქარებს. Reuters-ი ანონიმურ წყაროებზე დაყრდნობით აცხადებს, რომ განიხილება ორი კანდიდატი – ალი ხამენეის 56 წლის ვაჟი მოჯტაბა ხამენეი და ისლამური რევოლუციის ლიდერისა და ყოფილი აიათოლას, რუჰოლა ხომეინის შვილიშვილი, ჰასან ხომეინი. როგორც გამოცემა წერს, ის მჭიდროდ არის დაკავშირებული რეფორმატორთა ფრთასთან, რომელიც პოლიტიკური და სოციალური შეზღუდვების შემსუბუქების ინიციატივით გამოდის. ხამანეის ვაჟი – მოჯტაბა კი, მამის მსგავსად, ხისტი ხაზის მხარდამჭერია.

,,დონალდ ტრამპის სამშვიდობო ძალისხმევა წარმატებით დასრულდა, ირან-ისრაელის ომი შეჩერდა, შემდეგი უკრაინა უნდა იყოს”, – ამის შესახებ უნგრეთის საგარეო საქმეთა მინისტრი, პიტერ სიიარტო სოციალურ ქსელში წერს. „დონალდ ტრამპის უახლესი სამშვიდობო ძალისხმევა წარმატებით დასრულდა: ირან-ისრაელის ომი შეჩერდა, რამაც შეაჩერა შემდგომი სისხლისღვრა და ბირთვული ესკალაცია. ვიმედოვნებთ, ცეცხლის შეწყვეტა შენარჩუნებული იქნება. შემდეგი უკრაინა უნდა იყოს. ნატო-ს სამიტი შესაფერისი მომენტია ევროკავშირის ლიდერებისთვის, რათა მხარი დაუჭირონ ტრამპის მშვიდობისკენ სწრაფვას“, – წერს სიიარტო.

,,ევროპა მიესალმება პრეზიდენტ ტრამპის განცხადებას ისრაელსა და ირანს შორის ცეცხლის შეწყვეტის შესახებ. ეს მნიშვნელოვანი ნაბიჯია დაძაბულ რეგიონში სტაბილურობის აღდგენისკენ”, – ამის შესახებ ევროკომისიის პრეზიდენტი, ურსულა ფონ დერ ლაინი სოციალურ პლატფორმა X-ზე წერს. „ეს ჩვენი კოლექტიური პრიორიტეტი უნდა იყოს. მოვუწოდებთ ირანს, სერიოზულად ჩაერთოს სანდო დიპლომატიურ პროცესში, რადგან მოლაპარაკებების მაგიდა წინსვლის ერთადერთ რეალურ გზად რჩება“, – აცხადებს ევროკომისიის პრეზიდენტი. შეგახსენებთ, აშშ-ის პრეზიდენტმა, დონალდ ტრამპმა განაცხადა, რომ ისრაელმა და ირანმა ცეცხლის შეწყვეტის შესახებ შეთანხმებას მიაღწიეს.

,,ირანი ბირთვული ინდუსტრიის აღდგენას გეგმავს”, – ამის შესახებ ირანის ატომური ენერგიის ორგანიზაციის ხელმძღვანელმა, მოჰამედ ესლამიმ განაცხადა. მისი თქმით, ამჟამად ირანი აფასებს ზიანს, რომელიც მიაყენეს ბირთვულ ინდუსტრიას და ემზადებიან აღსადგენად. მანამდე, ირანში არაერთმა ოფიციალურმა პირმა განაცხადა, რომ ქვეყნის ბირთვული პროგრამა ეყრდნობა ბირთვულ ცოდნას, რომლის განადგურება შეუძლებელია.