დღე: ივნისი 14, 2025

უკრაინამ აღადგინა კონტროლი სუმის ოლქის დასახლებულ პუნქტზე. ამის შესახებ უკრაინის პრეზიდენტმა, ვოლოდიმირ ზელენსკიმ განაცხადა. უკრაინის პრეზიდენტმა აღნიშნა, რომ სუმის მიმართულებაზე კონცენტრირებულია 53 000 ოკუპანტი. „ბრძოლები იქ მიმდინარეობს საზღვრის გასწვრივ. თქვენ უნდა გესმოდეთ, რომ იქ მტერი შეჩერებულია. ძირითადი ბრძოლები – ეს არის ანდრეევკა, კონდრატოვკა, ალექსეევკა, კონსტანტინოვკა. არ აურიოთ აღმოსავლეთის მიმართულების კონსტანტინოვკასთან, იუნაკოვკაც აქაა. დღეს ანდრეევკაში აღდგა კონტროლი. სხვა ამ მიმართულებებზე, რომლებიც ვთქვი, გრძელდება ბრძოლები“, – განაცხადა ზელენსკიმ.

აზერბაიჯანმა ირანთან სახმელეთო საზღვარი გახსნა, რათა უცხოელმა მოქალაქეებმა ქვეყნის დატოვება შეძლონ. ინფორმაციას „როიტერი“ ავრცელებს. მედიის ცნობის, ასტარას საკონტროლო-გამშვები პუნქტი პირველმა ჯგუფმა უკვე გადაკვეთა, მათი უმეტესობა რუსეთის მოქალაქეა. რუსეთის საგარეო საქმეთა სამინისტროს ცნობით, 86 ადამიანი, მათ შორის ორი მცირეწლოვანი ამჟამად აზერბაიჯანშია ევაკუირებული. ისინი ძირითადად, ჩაიკოვსკის სიმფონიური ორკესტრის წევრები არიან. ევაკუირებულთა შორისაა ყაზახეთის ექვსი მოქალაქე.

საგარეო საქმეთა და უსაფრთხოების პოლიტიკის საკითხებში ევროკავშირის წარმომადგენელი კაია კალასი ირანის საგარეო საქმეთა მინისტრს ტელეფონით ესაუბრა. ამის შესახებ მან სოციალურ ქსელში დაწერა. „ვესაუბრე ირანის საგარეო საქმეთა მინისტრს, აბას არაღჩის. რეგიონში შემდგომი ესკალაციის რისკი სახიფათოდ მაღალია. დიპლომატიამ უნდა გაიმარჯვოს. ევროკავშირი ყოველთვის მკაფიოდ აცხადებდა: ირანს არასდროს არ უნდა მიეცეს ბირთვული იარაღის მოპოვების უფლება. მხოლოდ დიპლომატიას შეუძლია, მიგვიყვანოს მდგრად გადაწყვეტამდე. ევროკავშირი მზადაა, მხარი დაუჭიროს“, – წერს კაია კალასი.

რომის პაპმა, ლეო XIV-მ ირანისა და ისრაელის ხელისუფლებას მოუწოდა, გონივრულად იმოქმედონ და განაგრძონ დიალოგი. „ირანსა და ისრაელში სიტუაცია სერიოზულად გაუარესდა და ასეთ დელიკატურ მომენტში ვალდებულად ვგრძნობ თავს, მტკიცედ განვაახლო მოწოდება პასუხისმგებლობისა და გონიერებისკენ. ბირთვული საფრთხისგან თავისუფალი, უფრო უსაფრთხო სამყაროს შექმნისადმი ერთგულება უნდა გაგრძელდეს პატივისცემით სავსე შეხვედრებისა და გულწრფელი დიალოგის გზით, რათა აშენდეს სამართლიანობაზე, ძმობასა და საერთო კეთილდღეობაზე დაფუძნებული მდგრადი მშვიდობა. არავინ არასდროს უნდა შეუქმნას საფრთხე სხვის არსებობას. ყველა ქვეყნის მოვალეობაა, მხარი დაუჭიროს მშვიდობის საქმეს, დაიწყოს შერიგების გზების ძიება და ხელი შეუწყოს გადაწყვეტილებებს, რომლებიც უზრუნველყოფს უსაფრთხოებას და ღირსებას ყველასთვის“, – განაცხადა…

ისრაელის თავდაცვის ძალებში აცხადებენ, რომ  ირანში ბირთვულ და სამხედრო ობიექტებზე დარტყმები გრძელდება. გენშტაბის უფროსმა, ეიალ ზამირმა განაცხადა, რომ „თეირანისკენ გზა გაკვალულია“. ამასთან, ისრაელის თავდაცვის ძალებში განაცხადეს, რომ შემდეგ ნაბიჯს „თეირანის თავზე თავისუფლად მოქმედება“ წარმოადგენს. ისრაელის თავდაცვის ძალების ცნობით, ირანში ოპერაციის დაწყების დღიდან 150 სამიზნე ობიექტს დაარტყეს.

თეირანში, ერთ-ერთ მაღალსართულიან საცხოვრებელ შენობაზე ისრაელის მიერ განხორციელებული დარტყმის შედეგად 60 ადამიანი დაიღუპა, მათ შორის 20 ბავშვია. ინფორმაციას „სიენენი“ ირანის სახელმწიფო მედიაზე დაყრდნობით ავრცელებს. როგორც მედია წერს, ისრაელმა იერიში 14-სართულიან საცხოვრებელ შენობაზე მიიტანა. ვარაუდობენ, რომ ნანგრევების ქვეშ შესაძლოა, ათამდე ადამიანი რჩებოდეს.

ირანის საგარეო საქმეთა სამინისტროს პრესსპიკერმა განაცხადა, რომ ისრაელის იერიშების შემდეგ აშშ-თან ბირთვულ მოლაპარაკებებს აზრი არ აქვს. „მეორე მხარე (აშშ) ისე მოიქცა, რომ დიალოგს აზრი არ აქვს. არ შეიძლება იმის პრეტენზია გქონდეს, რომ მოლაპარაკებები გსურს და ამავდროულად, სიონისტურ რეჟიმს ირანის ტერიტორიის დაბომბვის უფლება მისცე“, – განაცხადა ისმაილ ბაღაიმ. მისი თქმით, ისრაელი იერიშებს ვაშინგტონის ნებართვის გარეშე ვერ განახორციელებდა. აშშ-სა და ირანს შორის ბირთვული მოლაპარაკებების მორიგი რაუნდის გამართვა კვირას, ომანის დედაქალაქ მასკატშია დაგეგმილი.

ისრაელის გამანადგურებელმა თვითმფრინავებმა თეირანში ირანის საჰაერო თავდაცვის ინფრასტრუქტურას დაარტყეს. ამის შესახებ განცხადებას ისრაელის თავდაცვის ძალები ავრცელებს. „ომის დაწყების შემდეგ პირველად, საჰაერო ძალების ათობით გამანადგურებელმა თეირანის ცაზე იფრინა, ისრაელიდან 1500 კილომეტრის დაშორებით და თეირანის ტერიტორიაზე თავდაცვის სისტემებს დაარტყა“ – განაცხადა ისრაელის საჰაერო ძალების ხელმძღვანელმა, ტომერ ბარიმ. მისი თქმით, ისრაელის გამანადგურებელმა თვითმფრინავებმა ირანის დედაქალაქში საჰაერო დარტყმების რამდენიმე ტალღა განახორციელეს.

სტავროპოლის მხარეში რუსეთის ერთ-ერთ უდიდეს ქიმიურ ქარხანაზე დრონებით თავდასხმა განხორციელდა. ინფორმაციას უკრაინული მედია ავრცელებს. სტავროპოლის მხარის გუბერნატორის განცხადებით, დრონის ნამსხვრევები ქალაქ ნევინომიისკში მდებარე ქიმიური ქარხნის „ნევინომიისკის აზოტის“ ტერიტორიაზე ჩამოვარდა. „ნევინომიისკი აზოტი“ რუსეთში აზოტოვანი სასუქების ერთ-ერთი უდიდესი მწარმოებელია.