დღე: ივნისი 4, 2025

უკრაინის პრეზიდენტმა, ვოლოდიმირ ზელენსკიმ ოპერაცია „ობობის ქსელის“ წარმატებით ჩატარებისთვის უკრაინის უსაფრთხოების სამსახურის ოფიცრები დააჯილდოვა. როგორც ზელენსკიმ X-ზე დაწერა, „ობობის ქსელმა“ დაამტკიცა, რომ რუსეთი „რეალურ დანაკარგებს“ განიცდის. „უკრაინას ომი არასდროს სურდა, მაგრამ მას სრული უფლება აქვს, საკუთარი თავი, თავისი დამოუკიდებლობა და თავისი ხალხი დაიცვას. ჩვენც ზუსტად ამას ვაკეთებთ, ჩვენთვის ხელმისაწვდომი ყველა საშუალებით… ჩვენი თავდაცვის უფლების ბრწყინვალედ გამოყენებისთვის უკრაინის უსაფრთხოების სამსახურის განსაკუთრებით მადლიერი ვარ. ყველაზე მნიშვნელოვანი, რაც ოპერაცია „ობობის ქსელმა“ დაამტკიცა, არის ის, რომ ახლა აგრესორი რეალურ დანაკარგებს განიცდის. ეს სამართლიანობის აღდგენასა და ნამდვილი მშვიდობისკენ ზეწოლას წარმოადგენს“, – წერს ზელენსკი.

რუსეთის საგარეო საქმეთა სამინისტროს პრესსპიკერის, მარია ზახაროვას განცხადებით, ირანის ბირთვულ ობიექტებზე დარტყმის შემთხვევაში არა მხოლოდ მისი მოსაზღვრე ქვეყნები, არამედ მთელი მსოფლიო დაზარალდება. ზახაროვას თქმით, ბირთვულ ობიექტებზე შესაძლო დარტყმების შესახებ განცხადებებს „მოსკოვი უპასუხისმგებლობად მიიჩნევს“. „ყველასთვის აშკარა უნდა იყოს, რომ ირანის ბირთვული პროგრამის ირგვლივ არსებული პრობლემის მოგვარების გზა სწორედ დიპლომატიურ გზაზე გადის. ჩვენ გარკვეული იმედები გვაქვს ვაშინგტონსა და თეირანს შორის შუამავლობით მიმდინარე დიალოგთან დაკავშირებით“, – აცხადებს ზახაროვა.

უკრაინის პრეზიდენტი ვოლოდიმირ ზელენსკი აცხადებს, რომ კიევი მოსკოვს ლიდერების დონეზე შეხვედრამდე ცეცხლის შეწყვეტას სთავაზობს. ზელენსკი გამოთქვამს იმედს, რომ აღნიშნულ ინიციატივას პარტნიორების მხარდაჭერა ექნება. „უკრაინა რუსეთს ცეცხლის შეწყვეტას სთავაზობს ორი ლიდერის შეხვედრამდე. პრეზიდენტი ერდოღანი დარწმუნებული ვარ, მხარს დაუჭერს, რადგან ჩვენი საუბრის დროს მან თქვა, რომ მას სურს ოთხი ადამიანის შეხვედრის ორგანიზება: პრეზიდენტი ერდოღანი, პრეზიდენტი ტრამპი, მე და პუტინი. ჩვენ ნებისმიერ დღეს მზად ვართ ასეთი შეხვედრისთვის. მნიშვნელოვანია, რომ ლიდერების დონეზე შეხვედრა ურთიერთგაგებისა და დეესკალაციის სურვილის ფონზე წარიმართოს, წინააღმდეგ შემთხვევაში, მოსკოვმა შეიძლება, ცალმხრივად შეაჩეროს ცეცხლის შეწყვეტა“, – აცხადებს ზელენსკი.  

„ნატოს მოკავშირეები გააძლიერებენ თავიანთ შეკავებისა და თავდაცვის შესაძლებლობებს ახალი, ამბიციური მიზნების დასახვით“, – ამის შესახებ ჩრდილოატლანტიკური ალიანსის ხელმძღვანელმა, მარკ რუტემ განაცხადა. რუტეს თქმით, ამერიკის შეერთებული შტატები ერთგულია ნატოსა და მისი მე-5 მუხლის მიმართ. „საჰაერო და სარაკეტო თავდაცვა, შორი მანძილის შეიარაღება, ლოჯისტიკა და დიდი სახმელეთო მანევრების ფორმირებები ჩვენს მთავარ პრიორიტეტებს შორისაა. ჩვენ გვჭირდება მეტი რესურსი, ძალები და შესაძლებლობები, რათა მზად ვიყოთ ნებისმიერი საფრთხის წინაშე დგომისთვის და სრულად განვახორციელოთ ჩვენი კოლექტიური თავდაცვის გეგმები. შეერთებული შტატები სრულად ერთგულია ნატოს მიმართ, სრულად ერთგულია მე-5 მუხლის მიმართ“, – აცხადებს რუტე.

გაერთიანებული სამეფოს მთავრობა აპირებს, 2026 წლის აპრილამდე უკრაინას 100 000 დრონი გადასცეს. ამის შესახებ ინფორმაციას სააგენტო Reuters-ი ავრცელებს. როგორც სააგენტო წერს, $473 მილიონის ღირებულების დრონების პაკეტი გაერთიანებული სამეფოს მთავრობის მიერ უკრაინის სამხედრო დახმარებისთვის გამოყოფილ $6 მილიარდში შედის. ამასთან, უკრაინელი ჯარისკაცების წვრთნისთვის $333 მილიონის გამოყოფაც იგეგმება.

მექსიკის ჩრდილოეთით მდებარე ნუევო-ლეონის შტატში ავტოსაგზაო შემთხვევას 11 ადამიანის სიცოცხლე ემსხვერპლა. ამის შესახებ ინფორმაციას უცხოური მედია ადგილობრივ ოფიციალურ პირებზე დაყრდნობით ავრცელებს. მედიის ცნობით, ავარიის შედეგად 17 ადამიანი დაშავდა. მათივე ინფორმაცით, ავტობუსი მონტერეიდან მეზობელი შტატის მიმართულებით მიემგზავრებოდა, რა დროსაც მოცურდა, გადატრიალდა და გზიდან გადავარდა.

„ამერიკის შეერთებული შტატების პირველი სიტყვა არის ის, რომ ირანს არ უნდა ჰქონდეს ბირთვული ინდუსტრია“, – ამის შესახებ ირანის სულიერმა ლიდერმა, აიათოლა ალი ხამენეიმ ყოფილი სულიერი ლიდერის, იმამ ხომეინის გარდაცვალების 36-წლისთავისადმი მიძღვნილ ცერემონიაზე განაცხადა. როგორც ხამენეიმ სიტყვით გამოსვლისას აღნიშნა, „აბსურდულ ბრალდებებზე ირანის პასუხი ნათელია – აშშ-ს ამ საკითხში არაფრის გაკეთება არ შეუძლია“. „ბირთვული ინდუსტრია გავლენას ახდენს მრავალ სამეცნიერო სფეროზე. ურანის გამდიდრება ბირთვული პრობლემის გასაღებია და მტრები გამდიდრებაზე არიან ორიენტირებულნი. დღეს ისლამურ მთავრობებს პალესტინის საკითხთან დაკავშირებით ბევრი ვალდებულება აქვთ. დღეს არ არის თავაზიანობის, გათვალისწინების ან ნეიტრალიტეტის დრო. დღეს არ არის დუმილის დრო.…

გერმანიის ერთ-ერთ უდიდეს ქალაქ კიოლნში, დოიცის რაიონში, მეორე მსოფლიო ომის დროინდელი 3 ბომბი აღმოაჩინეს. ამის შესახებ ინფორმაციას „დოიჩე ველე“ ავრცელებს. გამოცემის ცნობით, ქალაქიდან 20 000 ადამიანის ევაკუაცია განხორციელდა. ბომბებიდან ორი 90, ხოლო ერთი 45 კგ-ს იწონის. როგორც „დოიჩე ველე“ წერს, ქალაქის მთავარი ღირსშესანიშნაობა, კიოლნის საკათედრო ტაძარი, სახიფათო ზონის გარეთ მდებარეობს.