დღე: მაისი 26, 2025

საქართველოს მეხუთე პრეზიდენტმა, საქართველოს დამოუკიდებლობის დღე ქართულ პოლიციას და ჯარს მიულოცა. სალომე ზურაბიშვილმა აღნიშნა, რომ ისურვებდა ისეთ ქვეყანაში ცხოვრებას, სადაც ქართული პოლიცია თავის მოვალეობას შეასრულებს მოქალაქეების დასაცავად. „არ შეიძლება არ მივმართო და არ მივულოცო დღევანდელი დღე ქართულ ჯარს. მე დარწმუნებული ვარ, დღევანდელ დღეს მას სტკივა დღევანდელი საქართველოს ბედი, სტკივა სახელმწიფოებრიობის გაქრობა. ყველაფერი ის, რისთვისაც არის მომზადებული, რისთვისაც იბრძოდა და ხვალაც იბრძოლებს, დღეს არის ჩაშლილი და დაშლილი. ამიტომ სტკივა ჩვენს ქართულ ჯარს და მინდა მათ მივულოცო დღევანდელი დღე და ვუთხრა, რომ ისინი ჩვენთან ერთად არიან დღეს, ჩვენს გულში არიან, ჩვენს სულში არიან…

საქართველოს მეხუთე პრეზიდენტმა, სალომე ზურაბიშვილმა რუსთაველის გამზირზე სიტყვით გამოსვლისას ქვეყანაში მიმდინარე მოვლენებსა და სამომავლო გეგმებზე ისაუბრა. ზურაბიშვილის განცხადებით, უნდა ჩატარდეს ჯერ საპარლამენტო და მერე ადგილობრივი არჩევნები. „ქართულმა ოცნებამ“ შემოაგდო ადგილობრივი არჩევნების თემა, როგორც ადრე -პარლამენტში „შევლენო“, არც არავინ შესულა და არც არავინ აპირებს ადგილობრივ არჩევნებზე წასვლას, თუ ეს იქნება „ქართული ოცნების“ წესებით და „ქართული ოცნების“ და მანიპულაციის ქვეშ. სამაგიეროდ, ალბათ ყველა აპირებს, რომ არჩევნებში მიიღოს მონაწილეობა, ეს არჩევნები უნდა იყოს ჯერ საპარლამენტო და მერე ადგილობრივი ან ბოლო ბოლო, ერთობლივად საპარლამენტო და ადგილობრივი, ამისთვის აუცილებელია და ამაზე ნუ დაიწყებთ ეჭვებს და ჭორაობას, აუცილებელია…

ევროპარლამენტარი, რასა იუკნევიჩიენე აცხადებს, რომ საქართველოში ახალი, თავისუფალი და სამართლიანი არჩევნებია კრიზისიდან გამოსავალი. ევროპარლამნტარი რუსთაველის გამზირზე საპროტესტო აქციასაც შეუერთდა და მოქალაქეებს სიტყვითაც მიმართა. „ახალი, თავისუფალი და სამართლიანი არჩევნებია კრიზისიდან გამოსავალი. ამას ხალხი ამბობს და არა ევროკავშირი, ან რომელიმე ქვეყანა. ამას ხალხი ითხოვს. არჩევნები გაყალბდა, მოქალაქეებმა არ იცოდნენ, რომ “ქართული ოცნება” არჩევნების შემდეგ გააუქმებდა, ან გადაავადებდა ევროინტეგრაციის პროცესს. ეს იყო კრიმინალური მანიპულაცია და საჭიროა ახალი არჩევნები. პარტნიორები აკრიტიკებენ “ქართულ ოცნებას”, რადგან რეალობა ასეთია – მოქალაქეები 100 დღეზე მეტია პროტესტს გამოხატავენ და ნებისმიერი დემოკრატი პოლიტიკოსი ამას შესაბამისად შეაფასებს, გადაწყვეტილებას მიიღებს და შესაბამის…

საქართველოს მეხუთე პრეზიდენტმა, სალომე ზურაბიშვილმა რუსთაველის გამზირზე სიტყვით გამოსვლისას “ნეტგაზეთის” რედაქტორის მზია ამაღლობლის შესახებაც ისაუბრა. “გამარჯვებულია ერთი ქალი, რომელიც ყველას უძლებს და მას ჰქვია მზია და ის არის ჩვენი სახე და ჩვენი ღირსება. გამარჯვებულია იმიტომ, რომ არცერთმა პატიმარმა თავის ღირსებაზე უარი არ თქვა, იმიტომ, რომ არცერთმა მშობელმა თავის შვილის ღირსებაზე უარი არ თქვა და ყველანი ერთად დგანან დღეს, როგორც ჩვენი ღირსების სიმბოლოები”- აღნიშნა ზურაბიშვილმა. ზურაბიშვილის ამ განცხადებას აქციის მონაწილეების მხრიდან ოვაციები მოჰყვა. “მადლობა”- სკანდირებდნენ შეკრებილები. “მადლობა პროტესტს!” – თქვა საუბრის  სალომე ზურაბიშვილმა.

რუსთაველის გამზირზე საქართველოს მეხუთე პრეზიდენტი, სალომე ზურაბიშვილი აქციის მონაწილეებს სიტყვით მიმართავს. „გაუმარჯოს დამოუკიდებლობას, გაუმარჯოს საქართველოს“- ამ სიტყვებით დაიწყო მან თავისი მიმართვა საზოგადოებისადმი. “დღეს ბევრი შეიძლება კითხულობდეს, რა დროს ზეიმია, რატომ ვზეიმობთ 26 მაისს, რატომ ვზეიმობთ იმ დროს, როცა პატიმრები ციხეში არიან სრულიად უსამართლოდ და მათი მშობლები აქ დგანან. რატომ ვზეიმობთ, როცა ქვეყანაში სუფევს უსამართლობა, როცა დღითი დღე აქრობენ ჩვენს სახელმწიფოებრიობას, როცა უწყობენ ხელს და შემოჰყავთ საუკუნოვანი მტერი. რატომ ვზეიმობთ, ეს კითხვა ყველას გვაქვს ჩვენ იმიტომ ვზეიმობთ, რომ უკვე გამარჯვებულები ვართ. უკვე გამარჯვებული ვართ იმიტომ, რომ საუკუნეების მანძილზე საქართველოს ყველაფერს გაუძლო…

26 მაისთან დაკავშირებით, რუსთაველის გამზირზე მოქალაქეები იკრიბებიან. „26 მაისის ეროვნული კომიტეტის“, ოპოზიციისა და სამოქალაქო სექტორის ორგანიზებით, დასკვნითი ღონისძიება სახელწოდებით „საქართველო კვლავ დაგიცავ“ რუსთაველის გამზირზე 21:00 საათზე დაიწყება. საღამოს შეკრებილ მოქალაქეებს მეხუთე პრეზიდენტი, სალომე ზურაბიშვილი სიტყვით მიმართავს, ასევე შეკრებილებს შეუერთდებიან ევროპარლამენტარები, რომლებიც სპეციალურად საქართველოს დამოუკიდებლობის დღესთან დაკავშირებით თბილისში ჩამოვიდნენ. აქციის მონაწილეები მანამდე სხვადასხვა ლოკაციებზე მსვლელობას მართავდნენ.

ევროპარლამენტარი რასა იუკნევიჩიენე საქართველოს დამოუკიდებლობის დღეს ულოცავს. როგორც ევროპარლამენტარი X-ზე წერს, დგას მამაცი ქართველების გვერდით. „ვულოცავ დამოუკიდებლობის დღეს საქართველოს! დღეს თქვენ აგრძელებთ იმავე ბრძოლას, რომელიც საუკუნეზე მეტია გრძელდება. მე ვდგავარ იმ მამაცი ქართველების გვერდით, რომლებიც ითხოვენ იმას, რასაც იმსახურებენ – თავისუფლებას, დემოკრატიას და თავიანთი ქვეყნის პროევროპულ მომავალს“, – წერს იუკნევიჩიენე.

„ამ წუთში არ მაინტერესებს ე.წ. მმართველი გუნდი. მაინტერესებს ქართველი ხალხი“, – ამის შესახებ საქართველოს მეხუთე პრეზიდენტმა, სალომე ზურაბიშვილმა თბილისში, რუსთაველის გამზირზე განაცხადა. როგორც ზურაბიშვილმა მედიის წარმომადგენლებთან საუბრისას აღნიშნა, ქართველ ხალხს დამოუკიდებლობა აერთიანებს. „მაინტერესებს დღეს ჩვენი, ყველას ერთიანი განწყობა. ჩვენ აქ ვართ მოსული იმისთვის, რომ ყველას ვაჩვენოთ, რომ დამოუკიდებლობა აერთიანებს ქართველ ხალხს და დამოუკიდებლობას დაიცავს ქართველი ხალხი დღეს, ხვალ და მუდამ“, – განაცხადა ზურაბიშვილმა. ცნობისთვის, დღეს, 26 მაისს საქართველოს მეხუთე პრეზიდენტი სალომე ზურაბიშვილი დამოუკიდებლობის დღისადმი მიძღვნილ ღონისძიებაზე შეკრებილ მოქალაქეებს მიმართავს. მიმართვა 21:00 საათზეა დაგეგმილი.

მოლდოვის პრეზიდენტი მაია სანდუ ქართველ ხალხს დამოუკიდებლობის დღეს ულოცავს. როგორც სანდუ X-ზე წერს, მოლდოვა მხარს უჭერს ყველას, ვისაც სჯერა თავისუფლების, ღირსებისა და ევროპული მომავლის. „ვულოცავ მამაც ხალხს საქართველოს დამოუკიდებლობის დღეს. მოლდოვა მხარს უჭერს ყველას, ვისაც სჯერა თავისუფლების, ღირსებისა და ევროპული მომავლის. ჩვენი მოგზაურობები შეიძლება, ყოველთვის არ იყოს მარტივი, მაგრამ ღირს ერთად გამგზავრება. საქართველოს გაუმარჯოს!“ – წერს სანდუ.

საქართველოს დამოუკიდებლობის დღესთან დაკავშირებით, სპორტული საზოგადოება „შევარდენის“ მარში გააცოცხლეს, რომელიც თბილისში, 1919 წლის 26 მაისს მოეწყო. მსვლელობაში, სახელწოდებით „პირველი რესპუბლიკის აღლუმი“, მონაწილეობენ ქალები 1918 წელს შექმნილი საზოგადოება – „შევარდენის“ ქალი გიმნაზისტების ფორმებით. მარში თბილისში, პირველი რესპუბლიკის მოედნიდან დაიწყო და მოსწავლე ახალგაზრდობის სასახლესთან დასრულდება.

საქართველოში დანიის ელჩი ანე ტოფტ სორენსენი ქართველ ხალხს დამოუკიდებლობის დღეს ულოცავს. როგორც ელჩი X-ზე წერს, დანია საქართველოს სუვერენიტეტისა და ტერიტორიული მთლიანობის მიმართ ურყევ მხარდაჭერას აგრძელებს. „ყველა ქართველს ვულოცავ დამოუკიდებლობის დღეს! დანია აგრძელებს საქართველოს სუვერენიტეტისა და ტერიტორიული მთლიანობის მიმართ ურყევ მხარდაჭერას. თავისუფლება არ შეიძლება, ჩაითვალოს გარანტირებულად. გაუმარჯოს ერთიან და დამოუკიდებელ საქართველოს!“ – წერს დანიის ელჩი.

საქართველოში ნიდერლანდების ელჩი მელინე არაკელიანი ქართველ ხალხს დამოუკიდებლობის დღეს ულოცავს. ელჩი აღნიშნულთან დაკავშირებით ქართულ ენაზე ვიდეომიმართვას ავრცელებს და აცხადებს, რომ ნიდერლანდები საქართველოს სუვერენიტეტისა და ტერიტორიული მთლიანობის მხარდამჭერი რჩება. „ნიდერლანდების სამეფოს სახელით მსურს, ქართველ ხალხს გულითადად მივულოცო დამოუკიდებლობის დღე. დამოუკიდებლობის მოსაპოვებლად საქართველოს ბევრი ბრძოლა მოუწია და ბევრი მსხვერპლის გაღება მოუხდა. ქართველი ხალხი დღემდე აგრძელებს საკუთარი თავისუფლების დაცვას თავისთვის და მომავალი თაობებისთვის. ნიდერლანდები საქართველოს დამოუკიდებლობის მოპოვების დღიდან თქვენი სანდო პარტნიორი და მეგობარია. ჩვენ ვრჩებით საქართველოს სუვერენიტეტისა და ტერიტორიული მთლიანობის მხარდამჭერებად, მათ შორის ევროკავშირის სადამკვირვებლო მისიაში ჩვენი ურყევი მონაწილეობის მეშვეობით. ჩვენ თქვენს გვერდით…

ლიეტუვის საგარეო საქმეთა სამინისტრო ქართველ ხალხს დამოუკიდებლობის დღეს ულოცავს. უწყება მისალოც ტექსტს X-ზე ავრცელებს. „ვულოცავთ საქართველოს მოსახლეობას დამოუკიდებლობის დღეს! 180 დღის განმავლობაში თქვენ მტკიცედ დგახართ ევროპული, დემოკრატიული მომავლისთვის. თქვენი ხმა ისმის და ის შთააგონებს ყველას, ვისაც სწამს თავისუფლებისა და ერთიანობის ძალის. დღეგრძელი იყოს ევროპული საქართველო!“ – აღნიშნულია მილოცვაში.

საქართველოში უკრაინის საელჩო ქართველ ხალხს დამოუკიდებლობის დღეს ულოცავს. საელჩო მისალოც ტექსტს სოციალურ ქსელ „ფეისბუქზე“ აქვეყნებს. „უკრაინის საელჩო საქართველოში გულწრფელად ულოცავს საქართველოს და ქართველ ხალხს დამოუკიდებლობის დღეს! ვუსურვებთ მშვიდობასა და აყვავებას, ბედნიერებას, კეთილდღეობასა და ტერიტორიული მთლიანობის აღდგენას! გილოცავთ, საქართველო!“ – აღნიშნულია უკრაინის საელჩოს მისალოც ტექსტში.

ლატვიის პრეზიდენტი ედგარს რინკევიჩი ქართველ ხალხს დამოუკიდებლობის დღეს ულოცავს. როგორ რინკევიჩი X-ზე წერს, თავისუფლება, დემოკრატია ფასდაუდებელია და მათი დაცვა ყოველთვის აუცილებელია. „ვულოცავ ქართველ ხალხს დამოუკიდებლობის დღეს. თავისუფლება, დემოკრატია ფასდაუდებელია და მათი დაცვა ყოველთვის აუცილებელია. ამ მნიშვნელოვან დღეს, სრულ სოლიდარობას ვუცხადებ ყველა თავისუფლებისმოყვარე ქართველს“, – წერს რინკევიჩი.