დღე: მაისი 22, 2025

„სომხეთი ჩვენი მოკავშირეა, ჩვენი მეგობარი“, – ამის შესახებ რუსეთის საგარეო საქმეთა მინისტრმა, სერგეი ლავროვმა განაცხადა. ჟურნალისტის კითხვას, მოექცევა თუ არა რუსეთი სომხეთს ისე, როგორც უკრაინას მოექცა, ლავროვმა სომხეთის საგარეო საქმეთა მინისტრთან ერთად, ერევანში გამართულ პრესკონფერენციაზე ასე უპასუხა: „ვერ ვხედავ სომხეთის უკრაინიზაციის საჭიროებას. სომხეთი არ კრძალავს რუსულ ენას და რუსულ კულტურას, არ უზღუდავენ საშუალებას რუსებსა და მათ, ვისაც რუსულად საუბარი სურთ“.

ამერიკის შეერთებულ შტატებში, სან-დიეგოში, ბიზნეს-თვითმფრინავი ჩამოვარდა, რის შედეგადაც საცხოვრებელ სახლებს ცეცხლი გაუჩნდა. ამის შესახებ ინფორმაციას CNN ავრცელებს. CNN-ის ცნობით, შემთხვევის შედეგად 15 სახლი დაიწვა, რამდენიმე კვარტლიდან კი, პოლიციამ მოსახლეობის ევაკუაცია განახორციელა. ავიაკატასტროფა ადგილობრივი დროით 03:45 საათზე, მონტგომერის აეროპორტის მახლობლად მოხდა. ამ დროისთვის, დაშავებულთა შესახებ ინფორმაცია არ ვრცელდება. როგორც მედია წერს, ამ ტიპის კერძო თვითმფრინავი საქმიანი მოგზაურობისთვის გამოიყენება და მას 6-დან 8-მდე ადამიანის გადაყვანა შეუძლია.

თურქეთის პრეზიდენტი რეჯეფ თაიფ ერდოღანი აცხადებს, რომ პრეზიდენტის პოსტზე კენჭისყრას აღარ აპირებს. როგორც ერდოღანი აღნიშნავს, თურქეთს ახალი კონსტიტუცია სჭირდება. „არ მაქვს განზრახვა, ხელახლა დავიკავო პრეზიდენტის პოსტი, ან კენჭი ვიყარო კანდიდატურაზე. ჩვენი ერთადერთი მიზანი ქვეყნის რეპუტაციის გაუმჯობესებაა. თურქეთი იცვლება. მსოფლიო იცვლება. ჩვენ ვცხოვრობთ ახალ ეპოქაში. როგორ ფიქრობთ, შეგვიძლია რამე მნიშვნელოვანს მივაღწიოთ ასეთ სწრაფად ცვალებად სამყაროში იმ კონსტიტუციით, რომელიც შეიქმნა გადატრიალების დროს ძველ თურქეთში და დღემდე ინარჩუნებს „პუტჩისტურ“ მენტალიტეტს? ჩვენ გვჭირდება კონსტიტუცია, რომელსაც წარადგენენ მოქალაქეები და არა გადატრიალების დამგეგმავები“, – აცხადებს ერდოღანი.

უკრაინის პრეზიდენტი ვოლოდიმირ ზელენსკი აცხადებს, რომ რუსეთთან ტყვეების გაცვლის მოსამზადებლად, შეხვედრა გამართა. როგორც პრეზიდენტი სოციალურ ქსელში წერს, ოფიციალური კიევი შეისწავლის ადამიანთა სიას, რომელიც რუსული მხარისგან მიიღეს. „ჩავატარე შეხვედრა ტყვეების გაცვლის მოსამზადებლად. შეთანხმება, რუსული ტყვეობიდან ჩვენი 1 000 ადამიანის გათავისუფლებაზე, თურქეთში გამართული შეხვედრების, ფაქტობრივად, ერთადერთი რეალური შედეგია. ვმუშაობთ ამ შედეგის მისაღწევად. ვაზუსტებთ დეტალებს ყოველ ადამიანზე, რომელიც სიაში რუსეთის მხარის მიერაა წარმოდგენილი“, – წერს ვოლოდიმირ ზელენსკი.

რუსეთის პრეზიდენტის პრესმდივანი დიმიტრი პესკოვი აცხადებს, რომ რუსული და უკრაინული მხარეები დაინტერესებული არიან, ტყვეთა გაცვლა სწრაფად განხორციელდეს. პესკოვის თქმით, „პროცესი რთულია, რადგან საჭიროა კონკრეტული ადამიანების სახელებზე შეთანხმება“. „ეს საკმაოდ შრომატევადი საკითხია. ბუნებრივია, მუშაობა მიმდინარეობს კონკრეტული სახელების გაცვლაზე, რადგან საუბარია ათასი ტყვის ათასზე გაცვლაზე, რასაც გარკვეული დრო სჭირდება. ეს მუშაობა გრძელდება, მაგრამ კიდევ ერთხელ ვიმეორებ, საკმაოდ ოპერატიულად“, – აცხადებს პესკოვი.

ჩრდილოეთ კორეის ახალმა 5 000-ტონიანმა სამხედრო ხომალდმა კატასტროფა განიცადა. ამის შესახებ ინფორმაციას Reuters-ი კორეის ცენტრალურ საინფორმაციო სააგენტოზე დაყრდნობით ავრცელებს. Reuters-ის ცნობით, შემთხვევას, რომელიც ჩონჯინის ჩრდილო-აღმოსავლეთ ნავსადგურში მოხდა, ჩრდილოეთ კორეის ლიდერი კიმ ჩენ ინი ესწრებოდა. როგორც მედია წერს, ხომალდს სპეციალური ცერემონიის ფარგლებში უნდა გაეცურა. ინციდენტი კი, გემის გაშვების დროს წონასწორობის დაკარგვამ გამოიწვია, რის შედეგადაც სამხედრო ხომალდის ძირის ნაწილები დაიმსხვრა. კიმ ჩენ ინმა მომხდარს „დანაშაულებრივი ქმედება“ უწოდა და განაცხადა, რომ პასუხისმგებელი ადამიანები დაისჯებიან.

22 მაისის ღამეს, რუსეთმა უკრაინაზე „ისკანდერის“ ტიპის ბალისტიკური რაკეტითა და 128 დრონით იერიში მიიტანა. ამის შესახებ ინფორმაციას უკრაინული მედია ქვეყნის საჰაერო ძალებზე დაყრდნობით ავრცელებს. საჰაერო ძალების ცნობით, დაბომბვის შედეგად 4 რეგიონი დაზიანდა. მათივე ინფორმაციით, თავდაცვის ძალებმა ქვეყნის აღმოსავლეთ, ჩრდილოეთ, სამხრეთსა და ცენტრალურ ნაწილებში 74 რუსული დრონი ჩამოაგდეს.

რუსეთმა ხერსონზე საარტილერიო იერიში მიიტანა, რასაც ერთი ადამიანის სიცოცხლე ემსხვერპლა. ამის შესახებ ინფორმაციას უკრაინული მედია ხერსონის ოლქის სამხედრო ადმინისტრაციის მეთაურზე, ალექსანდრ პროკუდინზე დაყრდნობით ავრცელებს. პროკუდინის თქმით, დაღუპულია 85 წლის ქალი. ადგილობრივმა სამართალდამცავებმა სამხედრო დანაშაულის ჩადენის მუხლით საქმე აღძრეს.

ისრაელის პრეზიდენტი ისააკ ჰერცოგი ამერიკის შეერთებულ შტატებში, ვაშინგტონის ცენტრში, ისრაელის საელჩოს 2 თანამშრომლის მკვლელობას ეხმაურება. ჰერცოგის შეფასებით, „ეს ანტისემიტიზმის საზიზღარი ქმედებაა“. „ეს არის სიძულვილის, ანტისემიტიზმის საზიზღარი ქმედება. ჩვენი გულები დაღუპულთა ახლობლებთან არის. აშშ და ისრაელი გაერთიანებული იდგებიან ჩვენი ხალხებისა და ჩვენი საერთო ღირებულებების დასაცავად. ტერორი და სიძულვილი ვერ გაგვტეხს“, – აცხადებს ისააკ ჰერცოგი. შეგახსენებთ, ამერიკის შეერთებულ შტატებში, ვაშინგტონის ცენტრში, ებრაულ მუზეუმთან, ისრაელის საელჩოს 2 თანამშრომელი მოკლეს. მომხდართან დაკავშირებით დაკავებულია ერთი ადამიანი.

ამერიკის შეერთებული შტატების პრეზიდენტი დონალდ ტრამპი ისრაელის საელჩოს თანამშრომლებზე თავდასხმას გამოეხმაურა. ტრამპმა მომხდარს „საზარელი მკვლელობა“ უწოდა და დაღუპულთა ოჯახის წევრებს თანაგრძნობა გამოუცხადა. „საზარელი მკვლელობა ვაშინგტონში, რომელიც აშკარად ანტისემიტიზმზეა დაფუძნებული, ახლავე უნდა დასრულდეს. სიძულვილისა და რადიკალიზმის ადგილი არ არის აშშ-ში. სამწუხაროა, რომ მსგავსი რაღაცები ხდება“, – დაწერა ტრამპმა სოციალურ ქსელში. შეგახსენებთ, ამერიკის შეერთებულ შტატებში, ვაშინგტონის ცენტრში, ებრაულ მუზეუმთან, ისრაელის საელჩოს 2 თანამშრომელი მოკლეს.

ავსტრალიის სამხრეთ-აღმოსავლეთ ნაწილში წყალდიდობას 2 ადამიანის სიცოცხლე ემსხვერპლა. ამის შესახებ ინფორმაციას სააგენტო Reuters-ი ავრცელებს. სააგენტოს ცნობით, 3 მოქალაქე დაკარგულად მიიჩნევა. ადგილობრივი ხელისუფლების განცხადებით, ამ დროისთვის სახიფათო ზონაში 50 000 ადამიანი იმყოფება. წყალდიდობის გამო, დახურულია სკოლები, ათასობით ადგილობრივს კი, ელექტროენერგია არ მიეწოდება.