დღე: მაისი 11, 2025

აშშ-ის სახაზინო დეპარტამენტის ხელმძღვანელი აცხადებს, რომ ჩინეთთან სავაჭრო მოლაპარაკებებში მნიშვნელოვან პროგრესს მიაღწიეს. „მოხარული ვარ, გაცნობოთ, რომ ჩვენ მნიშვნელოვან პროგრესს მივაღწიეთ შეერთებულ შტატებსა და ჩინეთს შორის ძალიან მნიშვნელოვან სავაჭრო მოლაპარაკებებში. პირველ რიგში, მინდა, მადლობა გადავუხადო ჩვენს შვეიცარიელ მასპინძლებს, შვეიცარიის მთავრობას, რომლებიც ძალიან კეთილგანწყობილი იყვნენ. ვფიქრობ, რომ ამან დიდწილად განაპირობა ის პროდუქტიულობა, რომელიც ვნახეთ. მაგრამ შემიძლია გითხრათ, რომ მოლაპარაკებები ნაყოფიერი იყო“, – აღნიშნა სკოტ ბესენტმა.

პოლონეთის პრემიერ-მინისტრი დონალდ ტუსკი აცხადებს, რომ რუსეთისგან ყველა ელოდება თანხმობას საბრძოლო მოქმედებების 30-დღიან შეწყვეტაზე. ამ განცხადებით, ტუსკი ეხმაურება რუსეთის პრეზიდენტ ვლადიმერ პუტინის შეთავაზებას უკრაინასთან პირდაპირი მოლაპარაკებების განახლების შესახებ. „ჩვენი მოწოდების პასუხად რუსებმა შემოგვთავაზეს 15 მაისიდან სამშვიდობო მოლაპარაკებების დაწყება. თუმცა, მსოფლიო ელოდება ერთმნიშვნელოვან გადაწყვეტილებას დაუყოვნებლივი და უპირობო ცეცხლის შეწყვეტის შესახებ. უკრაინა ამისთვის მზადაა. მსხვერპლი აღარ უნდა იყოს“- წერს ის.    

აშშ-ის სახელმწიფო მდივანი მარკო რუბიო თურქეთში გაემგაზავრარუბიო ანტალიაში 14-16 მაისს, ნატოს საგარეო საქმეთა მინისტრების არაფორმალურ შეხვედრას დაესწრება, რათა განიხილოს ალიანსის უსაფრთხოების პრიორიტეტები, მათ შორის მოკავშირეთა თავდაცვითი ინვესტიციების გაზრდა და რუსეთ-უკრაინის ომის დასრულების საკითხი. ინფორმაციას აშშ-ს სახელმწიფო დეპარტამენტი ავრცელებს. მანამდე სახელმწიფო მდივანი მარკო რუბიო 11-14 მაისს პრეზიდენტ დონალდ ტრამპთან ერთად საუდის არაბეთსა და კატარში ჩავა.  

უკრაინის პრეზიდენტის ადმინისტრაციის ხელმძღვანელი, ანდრეი ერმაკი, მოლაპარაკებების შესახებ, ვლადიმერ პუტინის წინადადებას ეხმაურება. “ჯერ 30-დღიანი ცეცხლის შეწყვეტა, შემდეგ ყველაფერი დანარჩენი. რუსეთმა არ უნდა შენიღბოს ომის გაგრძელების სურვილი ვერბალური კონსტრუქციებით. ცეცხლის შეწყვეტა ომის დასრულებისკენ გადადგმული პირველი ნაბიჯია და დაადასტურებს რუსეთის მზადყოფნას, შეწყვიტოს მკვლელობები”- წერს ერმაკი.

დონალდ ტრამპის სპეციალურმა წარმომადგენელმა უკრაინის საკითხებში, კიტ კელოგმა განაცხადა, რომ პირველ რიგში, უნდა შედგეს უპირობო 30-დღიანი ცეცხლის შეწყვეტის შეთანხმება, რის შემდეგაც შესაძლებელი იქნება სამშვიდობო მოლაპარაკებების დაწყება. კელოგმა კომენტარი გააკეთა ახალი ზელანდიის პრემიერ-მინისტრის, კრისტოფერ ლაკსონის მიერ სოციალურ ქსელში გამოქვეყნებულ “პოსტზე”, სადაც ნათქვამია, რომ უკრაინაში ხანგრძლივი მშვიდობა 30-დღიანი ცეცხლის შეწყვეტით უნდა დაიწყოს. „ამას ახალი ზელანდიის პრემიერ-მინისტრიც კი ხვდება. როგორც პრეზიდენტმა ტრამპმა არაერთხელ განაცხადა, შეწყვიტეთ მკვლელობები! პირველ რიგში, უპირობო 30-დღიანი ცეცხლის შეწყვეტა და მის განმავლობაში, ყოვლისმომცველ სამშვიდობო მოლაპარაკებებზე გადასვლა. არა პირიქით“ – დაწერა კელოგმა სოციალურ ქსელში.

თურქეთის პრეზიდენტ რეჯეფ თაიფ ერდოღანსა და რუსეთის პრეზიდენტ ვლადიმერ პუტინს შორის სატელეფონო საუბარი შედგა. ინფორმაციას ერდოღანის ადმინისტრაცია ავრცელებს. მხარეებმა განიხილეს ორ ქვეყანას შორის ურთიერთობები და მიმდინარე საერთაშორისო საკითხები. საუბრისას ერდოღანმა დაადასტურა, რომ მისი ქვეყანა მზადაა, უმასპინძლოს მოლაპარაკებებს, რომლებიც მუდმივ გადაწყვეტამდე მიიყვანს მხარეებს. „გაიხსნა შესაძლებლობათა ფანჯარა მშვიდობის მისაღწევად, და ყოვლისმომცველი ცეცხლის შეწყვეტა შექმნის აუცილებელ გარემოს სამშვიდობო მოლაპარაკებებისთვის“ – განაცხადა ერდოღანმა პუტინთან საუბრისას.

საფრანგეთის პრეზიდენტმა, ემანუელ მაკრონმა მოუწოდა რუსეთს, „ისეთივე მკაფიო პასუხი“ გასცეს ცეცხლის შეწყვეტის ინიციატივას, როგორც ეს უკრაინამ გააკეთა. „კიევში პრეზიდენტ ტრამპთან ერთად ჩვენ წარვადგინეთ მკაფიო წინადადება: უპირობო 30-დღიანი ცეცხლის შეწყვეტა 12 მაისიდან. პრეზიდენტი ზელენსკი ამას დათანხმდა ყოველგვარი პირობის წამოყენების გარეშე. ახლა ველოდებით ასევე მკაფიო პასუხს რუსეთისგან. ვერ იქნება მოლაპარაკებები, როდესაც იარაღი საუბრობს. ვერ იქნება დიალოგი, თუ პარალელურად მშვიდობიანი მოქალაქეები იბომბებიან. ცეცხლის შეწყვეტა საჭიროა ახლავე, რათა მოლაპარაკებები დაიწყოს“- განაცხადა მაკრონმა. 10 მაისს ემანუელ მაკრონი იმყოფებოდა „მსურველთა კოალიციის“ სამიტზე უკრაინის დედაქალაქში, სადაც ევროპელმა ლიდერებმა, უკრაინის პრეზიდენტთან ერთად, მოსკოვისგან 12 მაისიდან 30 დღით ცეცხლის…

ბოლო 24 საათის განმავლობაში ანკლავში ისრაელის სამხედრო ოპერაციების შედეგად 23 პალესტინელი დაიღუპა. დაშავებულია 124 მოქალაქე. საერთო ჯამში, ისრაელის სამხედრო თავდასხმების შედეგად, ღაზის სექტორში პალესტინელთა მსხვერპლის რაოდენობამ 52 000-ს მიაღწია.

რუსეთის საგარეო საქმეთა სამინისტროს პრესსპიკერის, მარია ზახაროვას განცხადებით, უკრაინის ხელისუფლებაში სწორად არ წაიკითხეს რუსეთის პრეზიდენტის, ვლადიმერ პუტინის წინადადება პირდაპირი მოლაპარაკებების შესახებ. ზახაროვას განმარტებით, პუტინის შეთავაზება ითვალისწინებს პირველ რიგში მოლაპარაკებებს კონფლიქტის ძირეულ მიზეზებზე, შემდეგ კი ცეცხლის შეწყვეტის შესახებ საუბარს. „ბანკოვას [ქუჩა კიევში, სადაც ვოლოდიმირ ზელენსკის ოფისი მდებარეობს] რეაქციით თუ ვიმსჯელებთ, მათ კარგად არ წაიკითხეს რუსეთის პრეზიდენტის განცხადების ჩანაწერი. პუტინმა ნათლად თქვა: პირველ რიგში, საუბარი ძირეულ მიზეზებზე, შემდეგ კი შესაძლებელია საუბარი ზავზეც“ – აღნიშნა ზახაროვამ.

ინდოეთი და პაკისტანი ერთმანეთს შეთანხმების დარღვევაში ადანაშაულებენ. ინდოეთის საგარეო საქმეთა მინისტრმა ვიკრამ მისრიმ განაცხადა, რომ მიღწეული შეთანხმება არაერთხელ დაირღვა. ცოტა ხნის შემდეგ, პაკისტანის საგარეო საქმეთა სამინისტრომ განაცხადა, რომ ცეცხლის შეწყვეტის შეთანხმების მიმართ კვლავ ერთგულები რჩებიან, მიუხედავად იმისა, რომ ინდოეთმა ზოგიერთ რაიონში შეთანხმება დაარღვია. გუშინ ცნობილი გახდა, რომ ინდოეთი და პაკისტანი ცეცხლის შეწყვეტის შესახებ შეთანხმდნენ.