დღე: აპრილი 29, 2025

ევროკომისიის პრეზიდენტი ურსულა ფონ დერ ლაიენი აცხადებს, რომ აშშ-ის ადმინისტრაციის „არაპროგნოზირებადი სატარიფო პოლიტიკის“ შედეგად მთელი მსოფლიო დაზარალდება. „მილიონობით მოქალაქეს მოუწევს, გაუმკლავდეს უფრო მაღალ ფასებს პროდუქტებზე, გაძვირდება მედიკამენტები, ტრანსპორტი უფრო მეტი ეღირება, ინფლაცია გაიზრდება“- განაცხადა ევროკომისიის პრეზიდენტმა. გარდა ამისა, ურსულა ფონ დერ ლაიენმა აღნიშნა: „ჩვენ არ ვიპყრობთ ჩვენს მეზობლებს და არ ვსჯით მათ“, თუმცა ევროკომისიის პრეზიდენტს არ დაუკონკრეტებია, ვის გულისხმობდა.

აშშ-ის პრეზიდენტის სპეციალური წარმომადგენელი, კიტ კელოგი აცხადებს, რომ ვლადიმერ პუტინის შეთავაზებული „სამდღიანი ზავი“ აბსურდია და დონალდ ტრამპს სურს ცეცხლის მუდმივი, ყოვლისმომცველი შეწყვეტა. როგორც მან აღნიშნა, ტრამპმა პრეზიდენტობის პირველი 100 დღის განმავლობაში უკრაინასთან დაკავშირებით იმაზე მეტს მიაღწია, ვიდრე წინა ადმინისტრაციამ 1 200 დღის განმავლობაში. კიტ კელოგმა განაცხადა, რომ გასულ კვირაში, ლონდონში უკრაინელებთან ძალიან გულწრფელი და ღია საუბარი შედგა, რა დროსაც ამერიკულმა მხარემ 22 პუნქტისგან შემდგარი კონკრეტული ნაბიჯების წინადადება წარადგინა. „სამდღიანი ზავი აბსურდია. ის, რაც პრეზიდენტს სურს, არის ცეცხლის მუდმივი, ყოვლისმომცველი შეწყვეტა – ზღვაზე, ხმელეთზე, ცაში და ინფრასტრუქტურაზე, სულ მცირე, 30 დღით…

აშშ-ის პრეზიდენტმა, დონალდ ტრამპმა The Atlantic-თან ინტერვიუში ისაუბრა იმის შესახებ, თუ როგორ განსხვავდებოდა მისი ორი საპრეზიდენტო ვადა. „პირველი საპრეზიდენტო ვადის დროს ორი რამ მქონდა გასაკეთებელი, ქვეყნის მართვა და გადარჩენა. ირგვლივ ყველა ეს თაღლითი მყავდა. მეორე საპრეზიდენტო ვადის დროს კი ქვეყანასაც ვმართავ და მსოფლიოსაც“, – აღნიშნა აშშ-ის პრეზიდენტმა. მან კომენტარი გააკეთა მესამე ვადით კენჭისყრის შესაძლებლობაზეც და აღნიშნა: „ეს არ არის ის, რისკენაც მივისწრაფვი. ვფიქრობ, ეს ძალიან რთული საქმე იქნება“.

,,უკრაინას მისთვის წამგებიან სამშვიდობო გეგმაზე დათანხმება მოუწევს”, – სტატიას ამ შინაარსით Politico ავრცელებს. ,,ვაშინგტონის მიერ კიევისთვის შეთავაზებული გეგმა უკრაინას დაანაწევრებს, ქვეყანა ვერ მიიღებს უსაფრთხოების მყარ გარანტიებს და რუსეთს ხელახალი თავდასხმის შესაძლებლობას მისცემს”, – წერს გამოცემა. Politico ამერიკის სამშვიდობო ინიციატივებს უკრაინისთვის საშინელი შედეგების მომტანს უწოდებს. მედიის ცნობით, ასეთი შეთანხმება ვოლოდიმირ ზელენსკის პრეზიდენტობის დასასრულსა და ქვეყნის პოლიტიკურ ქაოსში მოქცევას ნიშნავს.

ბრაზილიაში „ბრიქსის“ ქვეყნების გაფართოებული სამიტი უკრაინაში მშვიდობის დამყარების მოწოდებით გაიხსნა. მინისტრები რიოში შეიკრიბნენ. მათ შორისაა რუსეთის მთავარი დიპლომატი სერგეი ლავროვი. სამიტში მონაწილეობენ ჩინეთის, ინდოეთის, სამხრეთ აფრიკის, ეგვიპტის, საუდის არაბეთისა და არაბთა გაერთიანებული საამიროების საგარეო საქმეთა მინისტრები. უკრაინაში ომით გამოწვეული კრიზისის გარდა, მსჯელობის მთავარი საკითხია შეერთებული შტატების სატარიფო პოლიტიკა. მათ შორის, ჩინეთისთვის დაკისრებული 145 %-იანი ტარიფები. ,,ბრიქსი” (BRICS) ბრაზილიის, რუსეთის, ინდოეთის, ჩინეთისა და სამხრეთ აფრიკის ქვეყნების გაერთიანებაა, რომელიც 2006 წელს, პეტერბურგის ეკონომიკურ სამიტზე ჩამოყალიბდა.

უნგრეთის პარლამენტმა მხარი დაუჭირა ქვეყნის გასვლას სისხლის სამართლის საერთაშორისო სასამართლოდან. „უნგრეთის პარლამენტმა ხმა მისცა სისხლის სამართლის საერთაშორისო სასამართლოდან გასვლას. ამ გადაწყვეტილებით ჩვენ უარს ვამბობთ, ვიყოთ პოლიტიზებული ინსტიტუტის ნაწილი, რომელმაც დაკარგა მიუკერძოებლობა და სანდოობა“, – წერს საგარეო საქმეთა მინისტრი პიტერ სიიარტო X-ზე. ცნობისთვის, აპრილის დასაწყისში უნგრეთში ისრაელის ბენიამინ ნეთანიაჰუს ვიზიტის დროს პრემიერ-მინისტრმა, ვიქტორ ორბანმა განაცხადა, რომ ბუდაპეშტი ჰააგის საერთაშორისო სასამართლოს დატოვებს, რადგანაც ჰააგის სასამართლო აღარ არის მიუკერძოებელი და ის პოლიტიკურ სასამართლოდ გადაიქცა.

,,ჩვენ არ ვაპირებთ რუსეთთან ურთიერთობის გამწვავებას ან გაფუჭებას”, – ამის შესახებ სომხეთის პრემიერ-მინისტრმა, ნიკოლ ფაშინიანმა განაცხადა. ჟურნალისტის შეკითხვაზე, მზადაა თუ არა ერევანი რუსეთის გავლენის სფეროდან სრულად გასასვლელად, სომხეთის მთავრობის ხელმძღვანელმა აღნიშნა, რომ ერევანს სურს კარგი ურთიერთობა ჰქონდეს ყველა საერთაშორისო პარტნიორთან და ასევე სურს, რეგიონის ქვეყნებთან ურთიერთობების დარეგულირება. ჟურნალისტის შენიშვნის პასუხად, რომ სომხეთის მთავრობა ევროკავშირში გაწევრიანებას ითხოვს, მაგრამ ამავდროულად მოსკოვში გამართულ აღლუმებში მონაწილეობს, ფაშინიანმა აღნიშნა, რომ სომხეთი არ ისახავს მიზნად ურთიერთობების გაუარესებას რაიმე მიმართულებით.

ეროვნული უსაფრთხოების საკითხებში აშშ-ის პრეზიდენტის მრჩეველის, მაიკ უოლცის განცხადებით, უკრაინა იყო და არის მსოფლიოში ყველაზე კორუმპირებული ქვეყანა. „უკრაინა იყო და არის ყველაზე კორუმპირებული ქვეყანა მსოფლიოში. ჩვენ ყოველთვის ყურადღებით უნდა დავაკვირდეთ იმას, თუ როგორ იხარჯება ამერიკელი გადასახადების გადამხდელების ფული. ამ ქვეყანაში უკვე გაიგზავნა მილიარდები. როცა წინა ადმინისტრაციის დროს კონგრესში ვიყავი, მახსოვს, რომ კონტროლის ყველა საჭირო მექანიზმი არსებობდა. ახლაც ამას ყურადღებით უნდა დავაკვირდეთ“, – თქვა უოლცმა.

,,არ არსებობს არცერთი სახელმწიფო, რომლის უსაფრთხოებაც გაძლიერდება ნატო-ში გაწევრიანების შედეგად, ამის მაგალითია პოლონეთი, ბალტიის ქვეყნები, ფინეთი და შვედეთი”, – ამის შესახებ რუსეთის უსაფრთხოების საბჭოს თავმჯდომარის მოადგილემ, დიმიტრი მედვედევმა განაცხადა. მისი თქმით, ახლა ეს ქვეყნები იმყოფებიან ჰიპოთეზური საპასუხო დარტყმის საფრთხის ქვეშ, მათ შორის ბირთვული იარაღის დარტყმის. როგორც მან აღნიშნა, რუსეთსა და შეერთებულ შტატებს შორის დიალოგი ყველა ქვეყნისთვის სასარგებლოდ მიმდინარეობს.

,,პუტინმა უნდა გაიგოს, რომ ჩვენ უკრაინის გვერდით ვართ”, – ამის შესახებ გერმანიის საგარეო საქმეთა მინისტრობის კანდიდატმა, იოჰან ვადეპულმა განაცხადა. „დოიჩე ველესთან“ ინტერვიუში ვადეპულმა უკრაინას შემდგომი მხარდაჭერა დაუდასტურა და დაჰპირდა, რომ ბერლინი შეეცდება, ეს პოზიცია მიაწოდოს როგორც რუსეთის პრეზიდენტ ვლადიმერ პუტინს, ასევე აშშ-ის პრეზიდენტს, დონალდ ტრამპს. მისი თქმით, თანამდებობის დაკავების შემდეგ, გააგრძელებს პოლიტიკას, რომელიც მიმართულია უკრაინის მხარდაჭერაზე და მსოფლიოში გერმანიის პოზიციების გაძლიერებაზე. როგორც მან აღნიშნა, გერმანიის მთავრობა აპირებს დიალოგის დამყარებას აშშ-ის პრეზიდენტის, დონალდ ტრამპის ადმინისტრაციასთან, რათა მიაწოდოს თავისი პოზიცია კიევის მხარდაჭერის შესახებ.