დღე: აპრილი 26, 2025

საფრანგეთის პრეზიდენტი, ემანუელ მაკრონი რომში უკრაინელ კოლეგა, ვოლოდიმირ ზელენსკისთან გამართული შეხვედრის შემდეგ აცხადებს, რომ ახლა პუტინზეა დამოკიდებული დაამტკიცოს, რომ მას ნამდვილად სურს მშვიდობა. “ძალიან პოზიტიური საუბარი მქონდა დღეს პრეზიდენტ ვოლოდიმირ ზელენსკისთან რომში. უკრაინაში ომის დასრულება. ეს არის მიზანი, რომელიც საერთო გვაქვს პრეზიდენტ ტრამპთან. უკრაინა მზად არის უპირობო ცეცხლის შეწყვეტისთვის. პრეზიდენტმა ეს გამიმეორა დღეს. მას სურს ამერიკელებთან და ევროპელებთან ერთად მუშაობა მისი იმპლემენტაციისთვის. ახლა პუტინზეა დამოკიდებული დაამტკიცოს, რომ მას ნამდვილად სურს მშვიდობა. გავაგრძელებთ ჩვენს ძალისხმევებს გასულ მარტს პარიზში მსურველთა კოალიციის ფარგლებში, რათა მივაღწიოთ ამ ცეცხლის შეწყვეტასაც და სრულ და მყარ მშვიდობას…

აშშ-ის პრეზიდენტი, დონალდ ტრამპი New York Times-ს აკრიტიკებს სტატიის გამო, სადაც აღნიშნულია, რომ უკრაინამ უნდა დაიბრუნოს ტერიტორიები, მათ შორის, ყირიმი. “რატომ არ ამბობს ეს არასერიოზული რეპორტიორი, რომ სწორედ ობამამ გახადა შესაძლებელი რუსეთისთვის ყირიმის უკრაინისგან მოპარვა ერთი გასროლის გარეშეც კი? გაუკრიტიკებია ოდესმე ბეიკერს ობამას მიერ ყირიმის გაცემა? არა, ერთხელაც არა, მხოლოდ ტრამპი, მე ამ სულელურ ომთან არაფერი მქონია საერთო, გარდა იმ შემთხვევისა, როდესაც უკრაინას ჯაველინები გადავეცი, ობამამ კი – თეთრეული”- წერს ტრამპი. აშშ-ის პრეზიდენტი ამბობს, რომ ცდილობს ობამასა და ბაიდენის მიერ დატოვებული არეულობა გამოასწოროს. „უბრალოდ ვცდილობ, ობამასა და ბაიდენის მიერ დატოვებული არეულობა…

უკრაინის პრეზიდენტი, ვოლოდიმირ ზელენსკი ვატიკანში საფრანგეთის პრეზიდენტს, ემანუელ მაკრონს და გაერთიანებული სამეფოს პრემიერ-მინისტრს, კირ სტარმერს შეხვდა. ინფორმაციას უკრაინის საგარეო საქმეთა მინისტრი, ანდრეი სიბიგა ავრცელებს. „ვოლოდიმირ ზელენსკი და ემანუელ მაკრონი პირისპირ საუბრობენ სამშვიდობო ძალისხმევის შესახებ“ – წერს სიბიგა. ზელენსკი აშშ-ის პრეზიდენტს, დონალდ ტრამპსაც შეხვდა. „პრეზიდენტი ზელენსკი აგრძელებს აქტიურ მუშაობას მოკავშირეებთან და ვატიკანში პირისპირ შეხვდა პრემიერ-მინისტრ კირ სტარმერს“, – წერს სიბიგა.

უკრაინის გენშტაბი უარყოფს, რუსეთის ხელისუფლების განცხადებას კურსკის ოლქზე კონტროლის სრულად აღდგენის შესახებ. უკრაინის შეიარაღებულ ძალებში ამბობენ, რომ კურსკის ოლქის გარკვეულ რაიონებში უკრაინის თავდაცვითი ოპერაცია გრძელდება. „უკრაინის თავდაცვის ძალების თავდაცვითი ოპერაცია კურსკის ოლქის გარკვეულ რაიონებში გრძელდება. ოპერატიული ვითარება რთულია, მაგრამ ჩვენი ქვედანაყოფები გარკვეულ პოზიციები ინარჩუნებენ და დაკისრებულ ამოცანებს ასრულებენ. ამასთან ერთად, მოწინააღმდეგეზე ეფექტიან დარტყმებს ახორციელებენ ყველა სახის იარაღიდან, მათ შორის იყენებენ აქტიური თავდაცვის ტაქტიკას“ – ნათქვამია უკრაინის გენშტაბის განცხადებაში. „კურსკის ოლქი სრულად განთავისუფლებულია უკრაინის შეიარაღებული ძალებისგან“- პუტინი

პრეზიდენტ, ვლადიმერ პუტინის განცხადებით, რუსეთის არმიამ „მტერი სრულად გაანადგურა კურსკის სასაზღვრო რეგიონში“.  პუტინის თქმით, უკრაინის ჯარებმა კურსკის ოლქში „უზარმაზარი დანაკარგები განიცადეს“. გერასიმოვის ინფორმაციით, კურსკის ოლქის გათავისუფლებისას „მაღალი პროფესიონალიზმი“ გამოავლინეს ჩრდილოეთ კორეის სამხედროებმა. ცნობისთვის, რუსეთის პრეზიდენტმა 12 მარტს განაცხადა, რომ კურსკის ოლქი სრულად უნდა გათავისუფლდეს. უკრაინულმა მხარემ ჯერჯერობით არ დაადასტურა რუსეთში გაკეთებული განცხადებები.

უკრაინის პრეზიდენტი, ვოლოდიმირ ზელენსკი აცხადებს, რომ დონალდ ტრამპთან კარგი შეხვედრა ჰქონდა. „ჩვენი ხალხის სიცოცხლის დაცვა. სრული და უპირობო ცეცხლის შეწყვეტა. საიმედო და ხანგრძლივი მშვიდობა, რომელიც თავიდან აგვაცილებს კიდევ ერთი ომის დაწყებას. ძალიან სიმბოლური შეხვედრა, რომელსაც აქვს პოტენციალი, ისტორიული გახდეს, თუ ერთობლივ შედეგებს მივაღწევთ. გმადლობთ, პრეზიდენტო დონალდ ტრამპ“ – წერს ზელენსკი. აშშ-ისა და უკრაინის პრეზიდენტების შეხვედრა დღეს ვატიკანში გაიმართა, სადაც ისინი პაპ ფრანცისკეს დაკრძალვაზე დასასწრებად ჩავიდნენ.

აშშ-ის პრეზიდენტ დონალდ ტრამპს უკრაინის პრეზიდენტ ვოლოდიმირ ზელენსკისთან ვატიკანში, პაპ ფრანცისკეს დაკრძალვამდე ძალიან პროდუქტიული საუბარი ჰქონდა. ინფორმაციას თეთრი სახლის კომუნიკაციების დირექტორი სტივენ ჩუნგი ავრცელებს. „პრეზიდენტი ტრამპი და პრეზიდენტი ზელენსკი დღეს პირადად შეხვდნენ ერთმანეთს და ძალიან პროდუქტიული დისკუსია გამართეს. შეხვედრის შესახებ დამატებითი დეტალები მოგვიანებით გახდება ცნობილი“- აღნიშნა სტივენ ჩუნგმა. ორივე ლიდერი იტალიის დედაქალაქში რომის პაპ ფრანცისკეს დაკრძალვაზე დასასწრებად ჩავიდა.

ინდოეთისა და პაკისტანის სამხედროები მეორე დღეა, ერთმანეთს ცეცხლს უხსნიან.  სროლის ხმა სადავო ჯამუ-კაშმირის სასაზღვრო ხაზის სიახლოვეს ისმის. ინდოეთის არმიაში განაცხადეს, რომ მათ ცეცხლით უპასუხეს პაკისტანის საგუშაგოებიდან ღამით გახსნილ ცეცხლს. პაკისტანში ამ განცხადებაზე კომენტარი არ გაუკეთებიათ. დაღუპულებისა და დაშავებულების შესახებ ინფორმაცია არ ვრცელდება. ინდოეთსა და პაკისტანს შორის ურთიერთოებები უკიდურესად დაიძაბა კაშმირის ინდოეთის მიერ კონტროლირებად ნაწილში მომხდარი თავდასხმის გამო. ინდოეთმა ტურისტებზე თავდასხმას, რომელსაც 26 ადამიანის სიცოცხლე ემსხვერპლა, ტერაქტი უწოდა.

ევროკავშირმა და აზერბაიჯანმა მიაღწიეს შეთანხმებას, განაახლონ მოლაპარაკებები პარტნიორობისა და თანამშრომლობის შესახებ ახალი შეთანხმების საკითხზე.  ამის შესახებ ევროკავშირის უმაღლესმა წარმომადგენელმა საგარეო საქმეთა და უსაფრთხოების პოლიტიკის საკითხებში, ევროკომისიის ვიცე-პრეზიდენტმა, კაია კალასმა ბაქოში ვიზიტისას გამართულ პრესკონფერენციაზე განაცხადა. „ეს პარტნიორობა უნდა დაეფუძნოს ურთიერთპატივისცემას, მათ შორის, ევროკავშირის წევრი ქვეყნების პატივისცემას, ასევე ისეთ ძირითად პრინციპებს, როგორებიცაა კანონის უზენაესობა და ადამიანის უფლებები“, – განაცხადა კალასმა. კალასმა აღნიშნა, რომ ევროკავშირსა და აზერბაიჯანს აკავშირებთ ხანგრძლივი პარტნიორობა. კერძოდ, ევროკავშირი აზერბაიჯანის უმსხვილესი სავაჭრო პარტნიორია, ასევე მისი უმსხვილესი ინვესტორი.

რუსეთის საჰაერო თავდაცვის სისტემებმა ქვეყნის ოთხ რეგიონში უკრაინის შეიარაღებული ძალების 45 დრონი გაანადგურეს.  ინფორმაციას რუსული მედია აქვეყნებს. მათივე ინფორმაციით, ყველაზე მეტი – 27 დრონი – კურსკის ოლქში ჩამოაგდეს, 16 – ბელგოროდის ოლქში, თითო-თითო კი – ლიპეცკისა და როსტოვის ოლქებში.  

ირანისა და აშშ-ის მომლაპარაკებლები თეირანის ბირთვული პროგრამის შემზღუდავი ახალი შეთანხმების შესამუშავებლად დღეს მორიგ შეხვედრას გამართავენ. Reuters-ის ცნობით, ირანის საგარეო საქმეთა მინისტრი, აბას არაღჩი რომში გამართული მოლაპარაკებების მეორე რაუნდიდან ერთი კვირის შემდეგ, რომელიც ორივე მხარემ კონსტრუქციულად შეაფასა, ახლო აღმოსავლეთის საკითხებში დონალდ ტრამპის წარმომადგენელთან, სტივ უიტკოფთან მასკატში ომანელი შუამავლების მეშვეობით ირიბ მოლაპარაკებას გამართავს. აშშ-ის პრეზიდენტმა დონალდ ტრამპმა იმედი გამოთქვა, რომ მოხდება ახალი შეთანხმების მიღწევა, რომელიც ირანის ბირთვული ბომბის შექმნის გზას დაბლოკავს. „ვფიქრობ, ირანთან შეთანხმებას მივაღწევთ“, – განაცხადა ტრამპმა.

მსოფლიო სასურსათო პროგრამა აცხადებს, რომ ისრაელის მიერ თითქმის 8-კვირიანი ბლოკადის გამო ღაზის სექტორში ორგანიზაციას საკვების მარაგი ამოეწურა. მსოფლიო სასურსათო პროგრამის განცხადებაში ნათქვამია, რომ მან თავისი მარაგების ბოლო ნაწილი ღაზის სექტორში მოქმედ ჰუმანიტარულ სასადილოებს გადასცა და რომ ამ სასადილოებს საკვები უახლოეს დღეებში დაუმთავრდებათ. ღაზას სექტორის მცხოვრები 2 მილიონზე მეტი ადამიანის დაახლოებით 80% საკვებს ძირითადად ჰუმანიტარული სასადილოებისგან იღებს, რადგან ისრაელის ბლოკადის გამო სხვა წყაროები გადაიკეტა.

უკრაინის პრეზიდენტი, ვოლოდიმირ ზელენსკი, რომის პაპ ფრანცისკეს დაკრძალვის ცერემონიაზე დასასწრებად რომში ჩავიდა. პრეზიდენტის პრესსპიკერის განცხადებით, ის ცერემონიას მეუღლესთან, ოლენა ზელენსკასთან და უკრაინულ დელეგაციასთან ერთად დაესწრება. ცნობისთვის, პაპ ფრანცისკეს წმინდა პეტრეს ბაზილიკიდან გამოასვენებენ და წმინდა პეტრეს მოედანზე დაასვენებენ. დაკრძალვის წირვა ადგილობრივი დროით 10:00 საათზე (თბილისის დროით 12:00 საათზე) ღია ცის ქვეშ დაიწყება და, სავარაუდოდ, დაახლოებით საათ-ნახევრის განმავლობაში გაგრძელდება.