დღე: აპრილი 23, 2025

„სტრატეგია აღმაშენებლის“ ლიდერს, გიორგი ვაშაძეს საგამოძიებო კომისიაზე გამოუცხადებლობის საქმეზე აღკვეთის ღონისძიების სახით 50 000-ლარიანი გირაო შეუფარდეს. ამ გადაწყვეტილებით სასამართლომ პროკურატურის შუამდგომლობა დააკმაყოფილა. დაცვის მხარე გიორგი ვაშაძის აღკვეთის ღონისძიების გარეშე დატოვებას ითხოვდა. გიორგი ვაშაძეს გირაოს გადახდის ვადად 30 დღე განესაზღვრა. ვაშაძემ ჟურნალისტებს განუცხადა, რომ  თანაგუნდელებთან კონსულტაციის შედეგად გადაწყვეტს, გადაიხდის თუ არა დაკისრებულ გირაოს.

საკანონმდებლო ორგანოსთან შეკრებილმა მოქალაქეებმა საავტომობილო გზა გადაკეტეს. უწყვეტი პროტესტის 147-ე დღესაც დემონსტრანტების მოთხოვნები უცვლელია, დაინიშნოს ახალი არჩევნები და გათავისუფლდნენ აქციების პერიოდში დაკავებული მოქალქეები. აქციის მონაწილეებს ადგილზე სხვადასხვა შინაარსის ბანერები და საქართველოსა და ევროკავშირის დროშები აქვთ მიტანილი. პარალელურად აქცია მიმდინარეობს „საზოგადოებრივ მაუწყებელთანაც“, საიდანაც მოგვიანებით აქციის მონაწილეები მსვლელობით რუსთაველის გამზირზე გადმოინაცვლებენ და პარლამენტთან მიმდინარე პროტესტს შეუერთდებიან.

გიორგი ბაჩიაშვილის ადვოკატი აცხადებს, რომ მის კლიენტს მოკვლით ემუქრებიან. რიჩარდ ამსტერდამის ინფორმაციით,  ორი უცხოური სადაზვერვო სამსახურისგან მიღებულ ინფორმაციაზე დაყრდნობით, მის კლიენტს, გიორგი ბაჩიაშვილს, მოკვლით ემუქრებოდნენ. “ჩვენ გვჯერა, რომ საქართველოს ხელისუფლება რეალურად ძალადობის ნებისმიერ დონეზე წავა, რომელიც საჭირო იქნება რეჟიმის ყველა რეალური პოლიტიკური ოპონენტისა და კრიტიკოსის მოსასპობად” -განაცხადა ბაჩიაშვილის ადვოკატმა.  

პოლონეთის საგარეო საქმეთა მინისტრმა, რადოსლავ სიკორსკიმ განაცხადა, რომ საქართველო ევროპულ გზას შორდება. “უკრაინის წინააღმდეგ რუსეთის ომის შედეგი მომავალი წლებისთვის განსაზღვრავს ჩვენი რეგიონის უსაფრთხოებას. ის განსაზღვრავს, მაგალითად, საბოლოოდ ჩაეფლობა თუ არა ბელარუსი “რუსკი მირში”, თუ მოახერხებს თავისი ავტონომიის ბოლო ნაკუწების შენარჩუნებას. ის ასევე ამოსავალი წერტილი იქნება მოლდოვის, საქართველოსა და სომხეთის ევროპული მისწრაფებებისთვის… ვწუხვართ, რომ საქართველო ევროპულ გზას შორდება. ქართველ ხალხს მათი მთავრობის გადაწყვეტილებებში არ ვადანაშაულებთ. რეპრესიებისთვის პასუხისმგებელ პირებს სანქციები დავუწესეთ. თუმცა, [ევროპული] საზოგადოების წევრობა პრივილეგიაა, არა ვალდებულება. ეს გააზრებული გადაწყვეტილებაა, რომელსაც ქვეყანა და მისი თავისუფალი მოქალაქეები იღებენ” – განაცხადა სიკორსკიმ.

თბილისის საქალაქო სასამართლოს მოსამართლე მზია გარშაულაშვილმა, პარტია ,,სტრატეგია აღმაშენებლის” ლიდერს, გიორგი ვაშაძეს, პარლამენტის დროებით საგამოძიებო კომისიაზე გამოუცხადებლობის გამო, 50 000-ლარიანი გირაო შეუფარდა. გადაიხდის თუ არა გირაოს ვაშაძე, ჯერჯერობით, უცნობია. მისი თქმით, გადაწყვეტილებას თანაგუნდელებთან მსჯელობის შემდეგ მიიღებს. ცნობისთვის, კომისიაზე არგამოცხადების გამო აღკვეთის ღონისძიებად გირაო შეფარდებული აქვს ნიკა გვარამიას, ზურაბ ჯაფარიძეს, ირაკლი ოქრუაშვილს, მამუკა ხაზარაძესა და ბადრი ჯაფარიძეს.

ჯგუფ ,,ფარის” წევრს, დავით გუნაშვილს  7-დღიანი ადმინისტრაციული პატიმრობა მიუსაჯეს. ის რუსთაველის გამზირზე მიმდინარე აქციაზე 21 აპრილს დააკავეს. ამავე დღეს დააკავეს ლევან ზაზაძეც, რომელსაც მოსამართლემ რამდენიმე წუთის წინ 12-დღიანი ადმინისტრაციული პატიმრობა მიუსაჯა. ისინი აღდგომის საღამოს დაკავებული გიორგი ორთოიძისა და მიხეილ სამხარაძის მხარდამჭერ აქციაზე დააკავეს. ლევან ზაზაძეს 12-დღიანი პატიმრობა მიუსაჯეს

26 აპრილს, საქართველოს პრეზიდენტი მიხეილ ყაველაშვილი ვატიკანში, რომის პაპის, ფრანცისკეს დაკრძალვის ცერემონიას დაესწრება. ინფორმაციას პრეზიდენტის ადმინისტრაცია ავრცელებს. უწყების ცნობით, საქართველოს პრეზიდენტი ვატიკანში დელეგაციასთან ერთად გაემგზავრება, რომლის შემადგენლობაში იქნებიან საქართველოს საგარეო საქმეთა მინისტრი მაკა ბოჭორიშვილი, პრეზიდენტის ადმინისტრაციის უფროსი ქეთევან კვინიკაძე, ზუგდიდისა და ცაიშის ეპარქიის მმართველი, საქართველოს საპატრიარქოს საგარეო ურთიერთობების განყოფილების თავმჯდომარე, მიტროპოლიტი გერასიმე და თბილისის სასულიერო აკადემიისა და სემინარიის რექტორი, სიონის საკათედრო ტაძრის წინამძღვრის მოადგილე, პროტოპრესვიტერი გიორგი ზვიადაძე.

,,ჩემთვის პატივი იყო გაეროში მუდმივ წარმომადგენლებთან შეხვედრა და თანამშრომლობის გაფართოების შესახებ მათთან ნაყოფიერი საუბარი”, – ამის შესახებ საქართველოს პრემიერ-მინისტრი ირაკლი კობახიძე სოციალურ ქსელ “X”-ში წერს. მთავრობის მეთაური აღნიშნავს, რომ გლობალური პარტნიორობის განმტკიცება საქართველოსთვის კვლავ უმთავრესი პრიორიტეტია. „ჩვენ ვაფასებთ თანამშრომლობას და მადლიერები ვართ საქართველოს სუვერენიტეტის, ტერიტორიული მთლიანობისა და არაღიარების პოლიტიკისადმი მტკიცე მხარდაჭერისთვის. მოუთმენლად ველით მრავალმხრივ ფორმატებში თანამშრომლობის კიდევ უფრო გაღრმავებას ჩვენი ერების საკეთილდღეოდ”, – აღნიშნულია განცხადებაში.

თბილისის საქალაქო სასამართლომ საპროტესტო აქციაზე, რამდენიმე დღის წინ ადმინისტრაციული წესით დაკავებულ ლევან ზაზაძეს 12-დღიანი ადმინისტრაციული პატიმრობა შეუფარდა. გადაწყვეტილებას მისი ახლობლებისა და მეგობრების უკმაყოფილება მოჰყვა. ადგილზე შეკრებილმა მოქალაქეებმა სასამართლოს გადაწყვეტილება გააპროტესტეს. ცნობისთვის, ლევან ზაზაზე ერთ-ერთია, ვინც 21 აპრილს რუსთაველის გამზირზე მიმდინარე აქციის დროს დააკავეს. ზაზაძე აღდგომის საღამოს დაკავებული გიორგი ორთოიძეს და მიხეილ სამხარაძის მხარდასაჭერად იყო მისული.

„მინდა გითხრათ ჩემი აღშფოთება და ჩვენი, როგორც „წინააღმდეგობის პლატფორმის“ პოზიცია იმის გამო, რაც ხდება სააღდგომო პერიოდში. დიდი შვიდეულის დროს, როცა ყველა ქვეყანაში ამ დროს მიღებულია ლმობიერება მათ მიმართ, ვინც ციხეში ზის. ჩვენთან ეს არ ხდება”, – განაცხადა საქართველოს მეხუთე პრეზიდენტმა, სალომე ზურაბიშვილმა დღეს გამართულ ბრიფინგზე, სადაც ქვეყანაში მიმდინარე პოლიტიკურ მოვლენებს გამოეხმაურა. ,,ერთი მხრივ, ეს ძალიან გასაგებია იმიტომ, რომ ასე იქცევა რუსეთი და ვნახეთ დაბომბვები უკრაინის მისამართით – სწორედ იმ დღეებში, რომელიც არის საზეიმო და ქრისტიანული ქვეყნებისთვის ძალიან მნიშვნელოვანი დღესასწაულები, რუსეთი აძლიერებს თავის შეტევას და იერიშს. ჩვენი, აქაური რუსული რეჟიმიც ასევე…