დღე: აპრილი 21, 2025

აშშ-ის პრეზიდენტმა, დონალდ ტრამპმა თეთრ სახლში ჟურნალისტებს განუცხადა, რომ მიმდინარე კვირაში რუსეთსა და უკრაინას შორის შეთანხმების მიღწევის ძალიან კარგი შანსი არსებობს. პოტენციური სამშვიდობო შეთანხმების დეტალების შესახებ დასმულ შეკითხვაზე აშშ-ის პრეზიდენტმა, დონალდ ტრამპმა უპასუხა, რომ „დეტალებს სრულად უახლოესი სამი დღის განმავლობაში გამოაცხადებს“. „მაგრამ უკრაინასთან და რუსეთთან ძალიან კარგი შეხვედრები გვქონდა“, – განაცხადა დონალდ ტრამპმა.

აშშ-ის პრეზიდენტმა, დონალდ ტრამპმა თეთრ სახლში სააღდგომო კვერცხების გაგორების ტრადიციულ ღონისძიებაზე სიტყვით გამოსვლისას განაცხადა, რომ რომის პაპის პატივისცემის ნიშნად ქვეყანაში დროშებს ნახევრად დაუშვებენ. „ახლახან რომის პაპ ფრანცისკეს პატივისცემის ნიშნად ჩვენს ქვეყანაში დროშების ნახევრად დაშვების შესახებ აღმასრულებელ ბრძანებას ხელი მოვაწერე. ის კარგი ადამიანი იყო. ბევრს მუშაობდა. მას მსოფლიო უყვარდა და ამის გაკეთება დიდი პატივია“ – განაცხადა დონალდ ტრამპმა. მანამდე დონალდ ტრამპი რომის პაპის გარდაცვალებას სოციალურ ქსელში გამოეხმაურა. „მშვიდად განისვენე, პაპო ფრანცისკე! ღმერთმა დალოცოს იგი და ყველა, ვინც მას უყვარდა!“ – დაწერა დონალდ ტრამპმა Truth Social-ზე.  

რუსეთის პრეზიდენტმა, ვლადიმერ პუტინმა განაცხადა, რომ ცეცხლის შეწყვეტის საკითხს ყოველთვის პოზიტიურად უდგება. „სააღდგომო ზავის ინიციატივით ამიტომაც გამოვედით. საუბარია აღდგომის წმინდა დღეებზე, ეს ყველა ქრისტიანისთვის დღესასწაულია. ჩვენ ყოველთვის ამის შესახებ ვსაუბრობდით, რომ ნებისმიერი სამშვიდობო ინიციატივის საკითხს პოზიტიურად ვუდგებით. ვიმედოვნებთ, რომ კიევის რეჟიმის წარმომადგენლებიც ასე მოიქცევიან. ახლა ვხედავთ, რომ კიევი ცეცხლის შეწყვეტის შესახებ ინიციატივის მითვისებას ცდილობს და ჩარჩოს გაფართოებაზე საუბრობს, როგორც დროის, ისე სამიზნე ობიექტების თვალსაზრისით“-  განაცხადა ვლადიმერ პუტინმა. ვლადიმერ პუტინი 13 აპრილს რუსული ძალების მიერ უკრაინის ქალაქ სუმზე განხორციელებულ სარაკეტო იერიშსაც გამოეხმაურა, რომლის შედეგადაც სუმში 35 ადამიანი დაიღუპა და 117 დაშავდა.

სომხეთი აზერბაიჯანს სასაზღვრო ზონაში ცეცხლის გახსნაში ადანაშაულებს. სომხური მედიის ცნობით, გასულ ღამეს 00:30-დან 01:19 საათამდე სიუნიქის რაიონის სოფელ ხნაწახში განუწყვეტელი სროლის ხმა ისმოდა. სომხური მედიის თანახმად, ბოლო პერიოდში აზერბაიჯანის შეიარაღებული ძალები პერიოდულად უხსნიდნენ ცეცხლს სიუნიქის რაიონის სოფლებს. აზერბაიჯანულ მხარეს აღნიშნულთან დაკავშირებით განცხადება არ გაუვრცელებია.

,,კრემლმა ვაშინგტონისგან სხვადასხვა დონეზე მოისმინა აშშ-სგან განცხადებები, რომ უკრაინის ნატო-ში გაწევრიანება შეუძლებელია”, – ამის შესახებ რუსეთის პრეზიდენტის პრესსპიკერმა, დიმიტრი პესკოვმა განაცხადა. ,,ეს ჩვენს პოზიციას ემთხვევა“, – განუცხადა პესკოვმა ჟურნალისტებს. ,,NATO-ში უკრაინის წევრობა არ განიხილება” – კიტ კელოგი

ევროკომისიის პრეზიდენტი, ურსულა ფონ დერ ლაიენი პაპ ფრანცისკეს გარდაცვალებას X-ზე ეხმაურება. ,,დღეს მსოფლიო გლოვობს პაპ ფრანცისკეს გარდაცვალებას. მან თავისი თავმდაბლობითა და უმანკო სიყვარულით მილიონობით ადამიანი შთააგონა, მათ შორის კათოლიკური ეკლესიის მიღმაც კი. ჩემი ფიქრები ყველასთანაა, ვინც ამ დიდ დანაკარგს განიცდის”, – წერს ლაიენი. რომის პაპი ფრანცისკე 88 წლის ასაკში, ავადმყოფობის შემდეგ, 21 აპრილს გარდაიცვალა. ვატიკანის ცნობით, პაპის გარდაცვალების შესახებ კარდინალმა კევინ ფარელმა განაცხადა. რომის პაპი ფრანცისკე 88 წლის ასაკში გარდაიცვალა

აზერბაიჯანის პრეზიდენტი, ილჰამ ალიევი 22-24 აპრილს ჩინეთში სახელმწიფო ვიზიტით ჩავა. „პრეზიდენტ სი ძინპინის მიწვევით, აზერბაიჯანის პრეზიდენტი, ილჰამ ალიევი ჩინეთში 22-24 აპრილს სახელმწიფო ვიზიტს განახორციელებს“, – აღნიშნულია ჩინეთის საგარეო უწყების მიერ გავრცელებულ ინფორმაციაში. ამ დროისთვის, ვიზიტის დეტალები უცნობია. უცნობია ისიც, თუ რა ტიპის შეხვედრებს გამართავს ალიევი ჩინეთში.

რუსეთის პრეზიდენტმა, ვლადიმერ პუტინმა ირანთან ყოვლისმომცველი პარტნიორობის შეთანხმების რატიფიცირების შესახებ კანონს ხელი მოაწერა. ,,მხარეები ისწრაფვიან ურთიერთობების გაღრმავებისა და გაფართოებისკენ ორმხრივი ინტერესის ყველა სფეროში, გააძლიერონ თანამშრომლობა უსაფრთხოებისა და თავდაცვის სფეროში, მჭიდროდ კოორდინაცია გაუწიონ საქმიანობას რეგიონულ და გლობალურ დონეზე, რაც შეესაბამება გრძელვადიან, ყოვლისმომცველ და სტრატეგიულ პარტნიორობას”, – აღნიშნულია ინფორმაციაში. რუსული მედიის ცნობით, შეთანხმებას ხელი 2025 წლის 17 იანვარს, ირანის პრეზიდენტის, მასუდ პეზეშკიანის მოსკოვში ვიზიტის დროს მოეწერა.

„ეს იგივეა, რომ საუზმესა და სადილს შორის შიმშილობა გამოაცხადო და შემდეგ ფარულად ტკბილეულის ჭამა განაგრძო“, – ჩეხეთის საგარეო საქმეთა მინისტრი, იან ლიპავსკი უკრაინაში ცეცხლის შეწყვეტის შესახებ რუსეთის განცხადებას შიმშილობის გამოცხადების შემდეგ ტკბილეულის ჭამას ადარებს. მისი თქმით, გამოცხადებული ზავის პერიოდში რუსეთი სროლას და თავდასხმებს აგრძელებდა. „ამიტომ, ახლა ერთადერთი შანსია, რომ უკრაინამ წარმატებით დაიცვას თავი, რათა რუსეთმა სამხედრო საშუალებებით ვერ მიაღწიოს თავის მიზნებს“, – აღნიშნა ლიპავსკიმ.

რუსეთის საგარეო საქმეთა მინისტრის სერგეი ლავროვის განცხადებით, ევროკავშირის მიერ ოფიციალური პირებისთვის 9 მაისს მოსკოვში გამგზავრების აკრძალვა ნაციზმის განახლებაა. „არ არსებობს სიტყვა, რომელიც ამ მოვლენას დაახასიათებდა. ახლა ირონიულად არ ვსაუბრობ, გონებისთვის გაუგებარია, თუ როგორ ღიად სურს ევროკავშირს ნაციზმის ევროპული იდეოლოგიის განახლება. რუსეთი ამას არ შეეგუება და ყველა ღონეს ვიხმართ იმისათვის, რომ ნაციზმის ამ იდეოლოგიამ თავი არ წამოწიოს და განადგურდეს, ევროპა კი თავის ღირებულებებს დაუბრუნდეს“, – განაცხადა ლავროვმა.

რუსეთისა და უკრაინის საკითხებში აშშ-ის სპეციალური წარმომადგენელის, კიტ კელოგის განცხადებით, NATO-ში უკრაინის წევრობა არ განიხილება, მისი თქმით, პრეზიდენტმა ტრამპმა 90 დღის განმავლობაში იმაზე მეტი გააკეთა ომის დასასრულებლად, ვიდრე მანამდე, 900 დღის განმავლობაში გაკეთდა. „ვფიქრობ, ჩვენ კარგ გზაზე ვართ, რადგან დავიღალეთ იმით, რაც ხდება. ჩვენ გვაქვს ძალიან ბევრი სხვა საკითხი მსოფლიოში, რომელშიც შეერთებული შტატები უნდა იყოს ჩართული. ეს ომი ძალიან დიდხანს გრძელდება”, – განაცხადა კიტ კელოგმა.

უკრაინის საგარეო საქმეთა მინისტრის, ანდრეი სიბიგას განცხადებით, უკრაინა ჯერ კიდევ ელოდება რუსეთის პასუხს 30-დღიანი ცეცხლის შეწყვეტის წინადადებაზე. მისი თქმით, რუსები სააღდგომო ზავის დროსაც განაგრძობდნენ უკრაინის პოზიციებზე თავდასხმებს. „მზად ვართ ცეცხლის 30-დღიანი სრული შეწყვეტისთვის, თუ რუსეთიც იმავეს გააკეთებს. მოსკოვისგან ჯერ არანაირი პასუხი არ მოგვისმენია. შუაღამის შემდეგ, ხვალ და მთელი კვირის განმავლობაში რუსეთის ქმედებები გამოავლენს რუსეთის ნამდვილ დამოკიდებულებას აშშ-ის სამშვიდობო ძალისხმევისა და 30-დღიანი სრული ცეცხლის შეწყვეტის წინადადების მიმართ. ეს ქმედებები აჩვენებს, სერიოზულად უყურებს თუ არა რუსეთი მშვიდობას, თუ პუტინის განცხადებები უბრალოდ მანიპულაციები იყო“, – აცხადებს სიბიგა.

ლოს ანჯელესში დონალდ ტრამპის საწინააღმდეგო აქციები მიმდინარეობს. პროტესტის გამოსახატად , ასობით დემონსტრანტი გუშინ, ნიუ-იორკშიც შეიკრიბა. აქციის მონაწილეებმა ტრამპის აღმასრულებელი ბრძანება მანჰეტენის ქუჩებში გააპროტესტეს. დემონსტრაციები გაიმართა ჩიკაგოშიც. ,,იმედი მაქვს, რომ ხალხი არ დაკარგავს მოტივაციას, რადგან ახლა გაჩერების დრო არაა. თვეების განმავლობაში, ტრამპის პრეზიდენტობის გაგრძელებასთან ერთად, მინდა, რომ ხალხმა ეს მუხტი შეინარჩუნოს”, – აცხადებს აქციის ერთ-ერთი მონაწილე.