დღე: მარტი 30, 2025

ირანი უარს არ ამბობს მოლაპარაკებებზე აშშ-სთან. ამის შესახებ ირანის პრეზიდენტიმა, მასუდ ფეზეშქიანმა განაცხადა. ფეზეშქიანმა აღნიშნა, რომ თუ აშშ ცდილობს მოლაპარაკებების აღდგენას, მან ჯერ უნდა აღადგინოს ნდობა წარსული დარღვევების გამოსწორებით. „სწორედ ამერიკელების მიდგომა განსაზღვრავს მოლაპარაკების გზის გაგრძელებას“- აღნიშნა ირანის პრეზიდენტმა. “ირანი თუ არ დადებს გარიგებას, იქნება დაბომბვა”- ტრამპი

ისრაელის პრემიერმინისტრი ბენიამინ ნეთანიაჰუ მომავალ კვირას უნგრეთში გამგზავრებას გეგმავს. ნეთანიაჰუ იქ იქნება ოთხშაბათიდან კვირამდე და შეხვდება, სხვათა შორის, პრემიერ-მინისტრ ვიქტორ ორბანსაც. შარშან ნოემბერში, ჰააგის სისხლის სამართლის საერთაშორისო სასამართლომ გასცა დაპატიმრების ორდერი ნეთანიაჰუს და თავდაცვის ყოფილი მინისტრის გალანტის წინააღმდეგ ღაზის ომში მათი ქმედებების გამო. მათ ბრალად ედებათ კაცობრიობის წინააღმდეგ დანაშაული და ომის დანაშაული.  

უკრაინაში რუსეთის ოკუპაციისგან ბუჩას გათავისუფლების სამი წლისთავს აღნიშნავენ. ბუჩაში სამხედრო სასაფლაოზე შეკრებილებმა რუსი სამხედროების მიერ მოკლულთა ხსოვნას პატივი მიაგეს. ასევე პარაკლისი აღავლინეს ადგილობრივი ეკლესიის ეზოში. რუსეთის ძალებმა ბუჩა 2022 წელს ფართომასშტაბური ომის დაწყებიდან მალევე დაიკავეს. კიევის ოლქის ეს ქალაქი და რაიონი რუსეთის ძალებს 33 დღის განმავლობაში ჰქონდათ ოკუპირებული. უკრაინის ხელისუფლების ცნობით, ამ პერიოდის განმავლობაში საოკუპაციო ძალებმა ბუჩაში 1 400-ზე მეტი ადამიანი მოკლეს, მათ შორის 37 ბავშვი. გათავისუფლების შემდეგ დასახლებაში მასობრივი სამარხი და წამების ოთახები აღმოაჩინეს. უკრაინულ მხარეს რუსი ჯარისკაცების მიერ ბუჩაში ჩადენილი 9 000-მდე სამხედრო დანაშაული აქვს აღრიცხული.

უკრაინის პრეზიდენტი, ვოლოდიმირ რუსული ძალების მიერ ხარკოვზე განხორციელებულ თავდასხმას ეხმაურება. თქმით, რუსეთი აჭიანურებს ომს. „რუსეთის გუშინდელმა დარტყმამ ხარკოვზე, სამწუხაროდ, ორი ადამიანის სიცოცხლე შეიწირა. ვუსამძიმრებ მათ ოჯახებს და ახლობლებს. დაშავდა 30-მდე ადამიანი – ყველამ მიიღო საჭირო სამედიცინო დახმარება. რუსეთი აჭიანურებს ომს და ჩვენ პარტნიორებს ვაწვდით სრულ ინფორმაციას რუსული არმიის მიერ განხორციელებული დარტყმებისა და იმ მოქმედებების შესახებ, რომლისთვისაც ემზადება. ველით შეერთებული შტატების, ევროპისა და ყველა ჩვენი მოკავშირის პასუხს ჩვენი ხალხის წინააღმდეგ ამ ტერორზე“- წერს ზელენსკი.

იემენელმა „ჰუსიტებმა“ ისრაელის მიმართულებით ბალისტიკური რაკეტა გაუშვეს. თავდასხმის სამიზნე ბენ გურონის აეროპორტი იყო და ოპერაციამ წარმატებით მიაღწია თავის მიზანს. იემენის შეიარაღებულმა ძალებმა დაადასტურეს ამერიკის აგრესიის წარუმატებლობა, ხელი შეუშალოს იემენს პალესტინის მხარდაჭერაში. როგორც „ჰუსიტები“ აცხადებენ, გააგრძელებენ ოპერაციებს ისრაელის წინააღმდეგ, ვიდრე ღაზის წინააღმდეგ აგრესია არ შეჩერდება. ისრაელის წინააღმდეგ რაკეტის გაშვებას ადასტურებს ისრაელის თავდაცვის ძალები.

“ჰამასი” დათანხმდა ღაზის სექტორში ცეცხლის შეწყვეტის წინადადებას, რომელიც შუამავლებისგან, ეგვიპტისა და კატარისგან, ორი დღის წინ მიიღო. ამის შესახებ “ჰამასის” ხელმძღვანელმა, ხალილ ალ-ჰაიამ განაცხადა. “ორი დღის წინ მივიღეთ წინადადება ეგვიპტელი და კატარელი შუამავლებისგან. დადებითად განვიხილეთ და მივიღეთ” – განაცხადა ხალილ ალ-ჰაიამ. გავრცელებული ინფორმაციით, ეგვიპტემ მიიღო დადებითი მინიშნებები ისრაელისგან ცეცხლის შეწყვეტის ახალ წინადადებასთან დაკავშირებით.  

აშშ-ის პრეზიდენტი, დონალდ ტრამპი „სიგნალის“ ჯგუფურ ჩატში ჟურნალისტის დამატების ამბავს ეხმაურება, სადაც იემენელ „ჰუსიტებზე“ თავდასხმის საკითხები განიხილებოდა. შეკითხვაზე, აქვს თუ არა ნდობა ეროვნული უსაფრთხოების საკითხებში პრეზიდენტის მრჩევლის, მაიკ უოლცის და თავდაცვის მდივნის, პიტ ჰეგსეთის მიმართ, ტრამპმა უპასუხა, რომ აქვს ნდობა მათ მიმართ. „ვფიქრობ, რომ ეს მხოლოდ კუდიანებზე ნადირობაა და ყალბი ამბები, როგორც თქვენ მუდმივად ლაპარაკობთ ამაზე, მაგრამ ეს მხოლოდ კუდიანებზე ნადირობაა და არ უნდა იყოს ამაზე საუბარი. საოცრად წარმატებული დარტყმა გვქონდა. ჩვენ ძალიან ძლიერად და ძალიან სასიკვდილოდ დავარტყით. და არავის სურს ამაზე საუბარი. სისულელეზე სურთ საუბარი. ეს ყალბი ამბავია. წარმოდგენა…

პოლონეთის საგარეო საქმეთა მინისტრმა, რადოსლავ სიკორსკიმ განაცხადა, რომ რუსეთი დარჩება საფრთხედ, ვიდრე მას ვლადიმერ პუტინი ხელმძღვანელობს. სიკორსკიმ ხაზგასმით აღნიშნა, რომ რუსეთი დღეს არის სისხლიანი დიქტატურა, რომელსაც ჰყავს უფრო მეტი პოლიტიკური პატიმარი, ვიდრე საბჭოთა კავშირს ჰყავდა. „ვფიქრობ, ჩვენ ვერ ვიქნებით დარწმუნებული, რას გააკეთებს ჩვენი დიდი მეზობელი რუსეთი, სანამ ამ ქვეყანას სათავეში ვლადიმერ პუტინი უდგას. რუსეთმა ააგო ტვინის გამორეცხვის იდეოლოგია იმპერიის დაბრუნების შესახებ. ამიტომ, რუსეთი ამ ხელმძღვანელობით და ამ სახელმწიფო იდეოლოგიით იქნება საფრთხე მანამ, სანამ მას ეს ხელმძღვანელობა ეყოლება“ – აღნიშნა რადოსლავ სიკორსკიმ.

რუსებმა 30 მარტის ღამეს უკრაინის ტერიტორიაზე იერიში ბალისტიკური რაკეტით და Shahed-ისა და სხვა ტიპის 111 დრონით მიიტანეს. ინფორმაციას უკრაინული მედია ავრცელებს. მათივე ინფორმაციით, უკრაინელებმა 65 დრონი ჩამოაგდეს, 35 კი – დაიკარგა. უპილოტო საფრენი აპარატების ჩამოგდება დადასტურდა ქვეყნის ჩრდილოეთით, სამხრეთით, აღმოსავლეთით და ცენტრალურ ნაწილში. თავდასხმის შედეგად დაზარალდა ხარკოვის, სუმის, ოდესის და დონეცკის ოლქები.

აშშ-ის პრეზიდენტი დონალდ ტრამპი აცხადებს, რომ აშშ გრენლანდიას 100%-ით მიიღებს. „ჩვენ მივიღებთ გრენლანდიას. დიახ, 100%-ით“ – თქვა ტრამპმა. როგორც ტრამპმა აღნიშნა, არის კარგი შესაძლებლობა, რომ ეს მოხდეს სამხედრო ძალის გარეშე, თუმცა, არაფერს გამორიცხავს. ეს განცხადება დონალდ ტრამპმა მას შემდეგ გააკეთა, რაც ვიცე-პრეზიდენტი, მეუღლესთან ერთად, ვიზიტით გრენლანდიაში იმყოფებოდა, სადაც ამერიკული ბაზა მოინახულა.

ღაზაში ცეცხლის შეწყვეტისა და მძევლების გათავისუფლების მოთხოვნით თელ ავივში მორიგი საპროტესტო აქცია გაიმართა.  აქციაში ათობით ათასი ადამიანი მონაწილეობდა. დემონსტრანტები ასევე პრემიერ-მინისტრ ბენიამინ ნეთანიაჰუს მთავრობის გადადგომას ითხოვდნენ. აქციის მონაწილეებსა და პოლიციას შორის დაპირისპირების შემთხვევები იყო. პოლიციამ რამდენიმე ადამიანი დააკავა. საპროტესტო გამოსვლები გაიმართა ისრაელის სხვა ქალაქებშიც. აქციამდე ცოტა ხნით ადრე დაჯგუფება „ჰამასმა“ ერთ-ერთი მძევლის ვიდეო გაავრცელა, რომელშიც ის გათავისუფლებას ითხოვს. „ჰამასის“ ტყვეობაში ამ დროისთვის 59 მძევალი რჩება, რომელთაგან ცოცხალი, სავარაუდოდ, 24 ადამიანია. ისრაელმა ღაზის სექტორში სამხედრო ოპერაცია 18 მარტს განაახლა.  

უკრაინის შეიარაღებული ძალების გენერალური შტაბი, ხარკოვზე რუსული იერიშების შესახებ განახლებულ ინფორმაციას აქვეყნებს, რომლის მიხედვითაც, ოკუპანტების თავდასხმისას სამხედრო ჰოსპიტალზე, იქ სამკურნალოდ მყოფი ჯარისკაცები დაშავდნენ. “29 მარტს საღამოს, საერთაშორისო ჰუმანიტარული სამართლის ნორმების მორიგი ცინიკური დარღვევით, რუსი ტერორისტები თავს დაესხნენ ქალაქ ხარკოვში სამხედრო ჰოსპიტალს. “შაჰედის” დრონების შედეგად დაზიანდა საავადმყოფოს შენობა და მიმდებარე საცხოვრებელი კორპუსები. წინასწარი მონაცემებით, სამედიცინო ცენტრში მკურნალ სამხედრო მოსამსახურეებს შორის არიან დაშავებულები…ომის დანაშაულებს ვადა არ აქვს”- აცხადებენ  უკრაინის გენშტაბი.