დღე: მარტი 23, 2025

ეკრემ იმამოღლუმ თურქეთის მოქალაქეებს მოუწოდა, იბრძოლონ თავიანთი უფლებებისთვის და შეუერთდნენ საპროტესტო აქციებს მთელი ქვეყნის მასშტაბით. “მოვუწოდებ ჩემი თანამოქალაქეებს, ყველას, 86 მილიონ ადამიანს, მივიდნენ საარჩევნო ყუთებთან და აჩვენონ მსოფლიოს ჩვენი ბრძოლა დემოკრატიისა და სამართლიანობისთვის. მე ვდგავარ თავაწეული. ყველაფერი გაცილებით უკეთესად იქნება“– წერს იმამოღლუ სოციალურ ქსელში. დღეს სტამბოლის სასამართლომ ეკრემ იმამოღლუს წინასწარი პატიმრობა შეუფარდა. იმამოღლუს დაკავებას სტამბოლსა და ანკარაში საპროტესტო გამოსვლები მოჰყვა.  

იემენელი „ჰუსიტები“ აცხადებენ, რომ ისრაელში, თელ-ავივის ბენ-გურიონის აეროპორტის მიმართულებით ბალისტიკური რაკეტა გაისროლეს. დაჯგუფების სამხედრო პრესსპიკერის, იაჰია სარის თქმით, თავდასხმა რაკეტა „პალესტინა-2”-ით განხორციელდა. მანამდე ისრაელმა განაცხადა, რომ რაკეტა მანამდე მოიგერია, სანამ ის ქვეყნის ტერიტორიაზე შევიდოდა. ანასთან, იაჰია სარის თქმით, ისინი ასევე თავს დაესხნენ ამერიკულ ავიამზიდ USS Harry S. Truman-ს.

უკრაინის საგარეო საქმეთა მინისტრი, ანდრეი სიბიგა კიევსა და უკრაინის სხვა ქალაქებზე რუსეთის მიერ ბოლოდ დროს განხორციელებულ თავდასხმებს ეხმაურება და აცხადებს, რომ ეს ძირს უთხრის აშშ-სა და სხვა ქვეყნების სამშვიდობო ძალისხმევას. „რუსეთმა წუხელ კიევზე დრონებით მასიური თავდასხმა განახორციელა, სამიზნე იყო საცხოვრებელი ადგილები და სახლებში მძინარე მშვიდობიანი მოსახლეობა. დაიღუპა სულ მცირე სამი ადამიანი, მათ შორის მამა და მისი ხუთი წლის ქალიშვილი, რვა კი დაშავდა. ეს მოხდა კროპივნიცკის, ზაპოროჟიეს, ოდესასა და სხვა ქალაქებში ბოლო დღეებში განხორციელებული მსგავსი თავდასხმების შემდეგ. რუსეთის სისტემატური და მიზანმიმართული ტერორი მშვიდობიანი მოსახლეობის მიმართ ეწინააღმდეგება მის განცხადებებს მშვიდობის შესახებ და ძირს…

კირ სტარმერი ამბობს, რომ  28 თებერვალს თეთრ სახლში ტრამპსა და ზელენსკის შორის მომხდარი დაპირისპირების შემდეგ ვაშინგტონი ზეწოლას ახორციელებდა ბრიტანეთზე და ზელენსკის მისამართით კრიტიკული განცხადებების გაკეთებას მოითხოვდა. ამის შესახებ დიდი ბრიტანეთის პრემიერ-მინისტრმა „ნიუ იორკ თაიმსთან“ განაცხადა. „იმ დღეს ოვალურ კაბინეტში პრეზიდენტ ტრამპსა და პრეზიდენტ ზელენსკის შორის შეხვედრა არცთუ ისე კარგად წარიმართა. ჩვენზე ზეწოლას ახდენდნენ, რომ ძალიან კრიტიკულად გამოვსულიყავით, გამოგვეყენებინა მკაფიო ზედსართავები, რათა აღგვეწერა ის, თუ რას გრძნობდნენ სხვები. მე მივიჩნევდი, რომ უმჯობესია ყურმილის აღება და ორივე მხარესთან დალაპარაკება, რათა მეცადა, დამებრუნებინა ისინი ერთსა და იმავე გვერდზე“ – განაცხადა მან.

შეერთებული შტატების შუამავლობით უკრაინასა და რუსეთს შორის სამშვიდობო მოლაპარაკებები საუდის არაბეთის ქალაქ ჯიდაში დღეს დაიწყება. შეხვედრის დაწყების ზუსტი დრო უცნობია. შეერთებული შტატების დელეგაცია ჯერ უკრაინის დელეგაციას შეხვდება, შემდეგ, კი მოლაპარაკებები რუსეთის მხარესთან გაგრძელდება. არსებული ცნობით, ერთ-ერთი საკითხი ტერიტორიების გაყოფა იქნება.  

თეთრი სახლი მიზნად ისახავს, რომ უკრაინაში ცეცხლის შეწყვეტის შეთანხმების მიღწევა 20 აპრილამდე მოხდეს, როდესაც მართლმადიდებლური და დასავლური ეკლესიები აღდგომის დღესასწაულს აღნიშნავენ. ინფორმაციას Bloomberg-ი ავრცელებს. თეთრი სახლი აღიარებს, რომ ვადები შეიძლება შეიცვალოს ორი მხარის პოზიციებს შორის დიდი უფსკრულის გათვალისწინებით. Bloomberg-ი წერს, რომ რუსეთმა შეთანხმების მისაღწევად მაქსიმალისტური მოთხოვნები წამოაყენა, მათ შორის უკრაინისთვის იარაღის მიწოდების შეწყვეტა. ეს პოზიცია კი კიევმა და მისმა მოკავშირეებმა უარყვეს.

უკრაინის პრეზიდენტმა, ვოლოდიმირ ზელენსკიმ განაცხადა, რომ საჭიროა ახალი გადაწყვეტილებები და ახალი ზეწოლა მოსკოვზე. მისი თქმით, ღამით რუსეთი უკრაინას 150 დრონით დაესხა თავს. „ამ დროისთვის ათი ადამიანია დაშავებული, მათ შორის ჩვილი. კიევში, თავდასხმამ სამი ადამიანის სიცოცხლე იმსხვერპლა, მათ შორის მამის და მისი ხუთი წლის ქალიშვილის. გუშინ ზაპოროჟიეში, სამი ადამიანი დაიღუპა, ოჯახი: მამა, დედა და მათი 17 წლის ქალიშვილი. ჩემი სამძიმარი ოჯახებსა და ახლობლებს. ეს თავდასხმები ყოველდღიური რეალობაა. მხოლოდ ამ კვირაში, ჩვენი ხალხის წინააღმდეგ გამოყენებული იყო 1 580-ზე მეტი ბომბი, თითქმის 1 100 დრონი და 15 სხვადასხვა ტიპის რაკეტა. საჭიროა ახალი გადაწყვეტილებები…

უნგრეთის საგარეო საქმეთა მინისტრის, პიტერ სიიარტოს განცხადებით, მისი ქვეყანა უკრაინის ევროკავშირში გაწევრიანებას მანამდე დაბლოკავს, სანამ უკრაინის ტრანსკარპათიის ოლქში მცხოვრებ უნგრელებს 2015 წელს ჩამორთმეული უფლებები არ დაუბრუნდებათ. „სატელეფონო საუბარი მქონდა ბეატე მაინლ-რაისინგერთან ტრანსკარპათიაში უნგრელების უფლებების შესახებ. დაპირებების მიუხედავად, უკრაინას ჯერ კიდევ არ აღუდგენია უნგრელი უმცირესობის 2015 წელს წართმეული უფლებები. სანამ ეს არ შეიცვლება, ვერ იქნება პროგრესი ევროკავშირში გაწევრიანებასთან დაკავშირებით“ – წერს სიიარტო. მისი მტკიცებით, კიევის პოლიტიკა უმცირესობებთან დაკავშირებით მიუღებელია და აშკარად ეწინააღმდეგება საერთო ევროპულ წესებსა და პრინციპებს.

სტამბოლის კორუფციაში ეჭვმიტანილი მერი, ექრემ იმამოღლუ დაპატიმრების. გადაწყვეტილება ქვეყნის სასამართლომ მიიღო. კორუფციასთან და ტერორიზმთან სავარაუდო კავშირების საქმეზე მიმდინარე გამოძიების ფარგლებში დაკავებული სტამბოლის მერის, თურქეთის მთავარი ოპოზიციური „რესპუბლიკური სახალხო პარტიის“ წევრის, ექრემ იმამოღლუს მხარდასაჭერად საპროტესტო აქციები თურქეთის ქალაქებში რამდენიმე დღეა მიმდინარეობს. სამართალდამცავებმა ასობით მომიტინგე დააკავეს. „რესპუბლიკურმა სახალხო პარტიამ“ იმამოღლუს დაკავებას პოლიტიკურად მოტივირებული უწოდა და მხარდამჭერებს მშვიდობიანი დემონსტრაციებისკენ მოუწოდა.  

თურქეთში ღამის განმავლობაში ქვეყნის მასშტაბით სტამბოლის მერის, ეკრემ იმამოღლუს მხარდამჭერ საპროტესტო აქციებზე 323 ადამიანი დააკავეს. ღამის განმავლობაში სტამბოლის მუნიციპალიტეტის შენობასთან შეკრებილ დემონსტრანტებსა და პოლიციას შორის დაპირისპირება რამდენჯერმე მოხდა. პოლიციამ აქციის მონაწილეების დასაშლელად ცრემლსადენი გაზი და წიწაკის სპრეი არაერთხელ გამოიყენა. გარდა ამისა,  400-მა თურქმა ხელოვანმა ღია წერილით მიმართა სასამართლოს და იმამოღლუს მიმართ მხარდაჭერა გამოხატა.

რუსებმა უკრაინას წუხელ 147 უპილოტო საფრენი აპარატით შეუტიეს, აქედან 97 – უკრაინელებმა ჩამოაგდეს.  ინფორმაციას უკრაინული მედია ავრცელებს.  მათივე ცნობით, 25 დრონი დაიკარგა. საოკუპაციო ძალებმა დრონები რუსეთის ქალაქებიდან: მილეროვოდან, ბრიანსკიდან, კურსკიდან და პრიმორსკო-ახტარსკიდან გაუშვეს. დრონებით თავდასხმის შედეგად კიევში დაიღუპა სამი მშვიდობიანი მოქალაქე, მათ შორის მამა და მისი ხუთი წლის ქალიშვილი. დაშავდა კიდევ 10 ადამიანი, მათ შორის 11 თვის ბავშვი. უკრაინული მედია წერს, რომ საჰაერო თავდაცვა ზედიზედ მესამე დღეა 100-მდე რუსულ დრონს ანადგურებს, კერძოდ, უკრაინელებმა გუშინ 100, გუშინწინ კი – 114 დრონი ჩამოაგდეს.

ღაზის სექტორის ქალაქ ხან-იუნისზე ისრაელის საჰაერო თავდასხმის შედეგად „ჰამასის“ ერთ-ერთი პოლიტიკური ლიდერი, სალაჰ ალ-ბარდაველი დაიღუპა. ინფორმაციას,  „ჰამასის“ წარმომადგენლები ავრცელებენ. ადგილობრივების თქმით, ისრაელის საჰაერო იერიშს პოლიტიკური ოფისის წევრი, სალაჰ ალ-ბარდაველი და მისი ცოლი ემსხვერპლნენ. შეგახსენებთ, ისრაელმა ღაზაზე დარტყმები სამშაბათს განაახლა და „ჰამასი“ ცეცხლის შეწყვეტის შეთანხმების გაგრძელების ჩაშლაში დაადანაშაულა.